بۇل تۋرالى باس پروكۋراتۋرانىڭ باسپا ءسوز قىزمەتى حابارلادى.
ادام ءولتىرۋ، تۇرعىنجايعا قولسۇعىلماۋشىلىقتى بۇزۋ جانە زاڭسىز قارۋ اينالىمى ءۇشىن قىلمىستىق جاۋاپتىلىققا تارتۋ ماقساتىندا قازاقستاننىڭ ەكى ازاماتى رەسەيدەن ەكستراديسيالاندى، دەپ حابارلايدى aqshamnews.kz.
كۇدىكتىلەر 2023 جىلدىڭ قاڭتارىندا شىمكەنت قالاسىندا باسقا ءۇش اداممەن بىرلەسىپ، جەكە ارازدىق نەگىزىندە تانىسىن ءولتىرۋدى جوسپارلاعان.
ويلارىن جۇزەگە اسىرۋ ماقساتىندا كۇدىكتىلەر تاپانشا، مەتالل شىبىقتار مەن بيتالارمەن قارۋلانىپ، قولعاپ پەن ماسكا كيىپ، تۇنگى ۋاقىتتا جابىرلەنۋشىنىڭ ۇيىنە كەلگەن.
ولار تەرەزەلەردى سىندىرىپ، ۇيگە كىرىپ، جابىرلەنۋشىگە اسا قاتىگەزدىكپەن كوپتەگەن دەنە جاراقاتتارىن كەلتىرگەن.
كەيىن ۇيدەگى باسقا ادامداردى ۇرىپ-سوعىپ، جابىرلەنۋشى ءومىر بەلگىلەرىن بەرمەگەنىنە كوز جەتكىزگەن سوڭ، وقيعا ورنىنان بوي تاسالاعان.
جابىرلەنۋشى اۋىر دەنە جاراقات سالدارىنان جەدەل جاردەم كولىگىندە قايتىس بولعان.
كۇدىكتىلەردىڭ ەكەۋى ءىزىن سۋىتپاي ۇستالىپ، ءارتۇرلى جازالارعا تارتىلعان. ال قالعان ءۇش كۇدىكتى ەلدەن قاشىپ ۇلگەرىپ، حالىقارالىق ىزدەۋگە جاريالانعان.
2024 جىلدىڭ مامىرىندا سىبايلاستارىنىڭ ءبىرى كورشىلەس ەلدەن ەكستراديسيالانىپ، سوتتالدى.
قالعان ەكى ىزدەۋدەگى كۇدىكتى وتكەن جىلدىڭ شىلدەسىندە رەسەي فەدەراسياسىنىڭ ماسكەۋ وبلىسىندا ۇستالىپ، قازاقستان باس پروكۋراتۋراسىنىڭ سۇراۋى بويىنشا ەلگە ەكستراديسيالاندى.
قازىرگى تاڭدا كۇدىكتىلەر تەرگەۋ يزولياتورىنا قامالدى.
ايىپتالىپ وتىرعان قىلمىستاردى جاساعانى ءۇشىن ولارعا 15 جىلدان 20 جىلعا دەيىنگى مەرزىمگە نەمەسە ءومىر بويىنا باس بوستاندىعىنان ايىرۋ جازاسى قاراستىرىلعان.
وسىلايشا، اتالعان قىلمىستارعا قاتىسى بار بارلىق تۇلعالار اشكەرەلەندى.