پرەزيدەنتتىڭ تاپسىرماسىن ورىنداۋ ءۇشىن مەملەكەتتىك كوميسسيا قۇرىلىپ، زەرتتەۋ جۇمىستارى ءجۇرىپ جاتىر.
عالىمدار مەن ات سپورتى فەدەراسياسىنىڭ وكىلدەرى ماڭعىستاۋ وبلىسىنىڭ اۋىلدارىن ارالاپ، جىلقى تۋرالى مالىمەت جيناپ ءجۇر، دەپ حابارلايدى Almaty-akshamy.kz
اداي جىلقىسى قازاق باعزىدان سالت مىنەتىن جىلقى تۇقىمى. توزىمدىلىگى تۋرالى ءتۇرلى اڭىز-اڭگىمە كوپ. ارنايى قۇرىلعان مەملەكەتتىك كوميسسيا مۇشەلەرى وبلىستىڭ بارلىق اۋدانىن ارالاپ، تىڭ دەرەكتەر جينادى. ءارى جىلقىنىڭ گەنەتيكالىق قۇرىلىمىن عىلىمي سىناقتان وتكىزدى.
"اداي جىلقىسى، قازاقى جىلقى تۇقىمدارى، مۇنىڭ ءبارى حالىق سەلەكسياسىمەن شىعارىلعان. بۇل جەردە ناقتى مىنا كىسى جاسادى دەپ ايتا المايمىز. ەڭ الدىمەن، بۇل حالىق سەلەكسيالىق جاڭا تۇقىم بولىپ شىعادى. ال كەيىن زاڭعا قاراي قالعان اۆتورلاردى قوسۋعا بولادى"، - دەيدى كوميسسيا مۇشەسى سەيىلحان راحمانوۆ.
اداي جىلقىلارىنا اسىل تۇقىمدى مال مارتەبەسىن بەرۋ ءۇشىن ايماقتا بىرنەشە شارا ۇيىمداستىرىلدى. ناتيجەسى جوق ەمەس. بۇل تۋرالى ماماندار وبلىس اكىمىمەن كەزدەسۋدە ايتتى. ەندى ارنايى اكت جاسالادى. ارتىنشا پاتەنت الۋ ءۇشىن قۇجات اۋىل شارۋاشىلىعى جانە ادىلەت مينيسترلىگىنە جىبەرىلەدى.
"مەملەكەت باسشىسى ماڭعىستاۋ وبلىسىنا كەلگەندە تاپسىرما بەرگەن بولاتىن. ۇلكەن جۇمىس اتقارىلدى. عاسىرلار بويى اتا-بابالارىمىزدىڭ اتقارعان، ەشكىمنەن قۇن سۇراماي، ەشكىمگە بالدەنبەي، ايانباي، كۇندەپ، ساعاتتاپ، ايلاپ، جىلداپ اتقارعان ىستەرىنىڭ ناتيجەسى مىنە ءقازىر رەسمي تالاپتارعا رەڭ الىپ كەلە جاتىر. سول ەندى رەتتەلۋى كەرەك"، - دەيدى وبلىس اكىمى نۇرلان نوعايەۆ.