الماتىدا ابىلاي حاننىڭ 310 جىلدىعىنا وراي عىلىمي-پراكتيكالىق كونفەرەنسيا ۇيىمداستىرىلدى
الماتىدا «ابىلاي حان جانە قازاق مەملەكەتتىلىگى: تاريحي ۇدەرىستەر مەن ساباقتاستىق» اتتى حالىقارالىق عىلىمي-پراكتيكالىق كونفەرەنسياسى ءوتتى، دەپ حابارلايدى Almaty-akshamy.kz
بەلگىلى تاريحشى، تاريح عىلىمدارىنىڭ دوكتورى، پروفەسسور زاردىحان قينايات ۇلىنىڭ ءى-شى وقۋلارى اياسىندا ابىلاي حاننىڭ 310 جىلدىعىنا وراي ۇيىمداستىرىلعان «ابىلاي حان جانە قازاق مەملەكەتتىلىگى: تاريحي ۇدەرىستەر مەن ساباقتاستىق» اتتى حالىقارالىق عىلىمي-پراكتيكالىق كونفەرەنسياسى عىلىم ورداسىنىڭ ش.ش.ءۋاليحانوۆ اتىنداعى تاريح جانە ەتنولوگيا ينستيتۋتىندا ءوتتى.
كونفەرەنسيا جۇمىسىنا كورنەكتى عالىمدار مەن جازۋشىلار، دوكتورانتتار مەن ماگيسترانتتار قاتىستى. نەگىزگى بايانداما جاساۋشىلار ز.قينايات ۇلىنىڭ ءومىر بەلەستەرى مەن عىلىمي ىزدەنىستەرىنىڭ تاريحىمىزعا قوسقان ۇلەسى تۋرالى ايتسا، ابىلاي حان جانە قازاق مەملەكەتتىلىگى تاقىرىبىنا قاتىستى بايانداما جاساعان عالىمدار ابىلاي حاننىڭ قازاق تاريحىنداعى تاريحي رولىنە سول كەزەڭنىڭ تاريحي كونتەكسىندە قاراستىردى.
«زاردىحان قينايات ۇلى – كوپتەگەن ەڭبەكتەر جازدى. بۇل كىسىنىڭ نەگىزگى زەرتتەۋ باعىتى – ورتا عاسىرلار، شىڭعىس حان قۇرعان يمپەريا، ونىڭ قازاقستانعا قاتىستى تۇستارى. بۇگىنگى كونفەرەنسيا زاردىحان اعامىزدى ەسكە الىپ، سونىڭ اياسىندا ابىلايحان بابامىزدىڭ تاعدىرىن زەردەلەپ، تاريح تۇلعالاردى ناسيحاتتاۋ ماقساتىندا ۇيىمداستىرىلدى. سونداي-اق جيناق شىعارىپ جاتىرمىز. بۇل جيناققا ەلىمىزگە تانىمال عالىمداردىڭ باياندامالارى ەندى. بۇل شارا ءبىر ساتتىك ەمەس، جىل سايىن وتكىزىلىپ وتىرادى» – دەدى ەجەلگى جانە ورتا عاسىرداعى قازاقستان مەن ىرگەلەس ەلدەر ءبولىمىنىڭ مەڭگەرۋشىسى جومارت جەڭىس ۇلى.
كونفەرەنسيا بارىسىندا زاردىحان قينايات ۇلىنىڭ عىلىمي زەرتتەۋلەرى مەن ولاردىڭ تاريحي ماڭىزى، شەت ەلدەردەگى قازاق زەرتتەۋشىلەرىنىڭ ەڭبەكتەرىنىڭ زەردەلەنۋ جاعدايى، ابىلاي حان تۇسىنداعى قازاق حاندىعى تاريحىنىڭ مازمۇنىنا تۇجىرىمدامالىق جانە ءادىسنامالىق تاسىلدەر، التىن وردا مەن قازاق حاندىعىنىڭ ساباقتاستىعى ماسەلەلەرى جاگن قازاق حاندىعى تاريحىن زەرتتەۋدىڭ وزەكتى ماسەلەلەرى تالقىلاندى.
سونداي-اق جيىن اياسىندا كونفەرەنسيا ماتەريالدارىنىڭ جيناعىنىڭ تۇساۋكەسەر ءراسىمى ءوتتى.