ءابۋ دابيدە ءوتىپ جاتقان «تولەرانتتىلىق ءۇشىن دۇنيەجۇزىلىك ۇكىمەتتەردىڭ ينكۋباتورى» فورۋم مەملەكەتتەر تولەرانتتىلىق، قوعامدىق كەلىسىم مەن تۇراقتىلىق ءۇشىن نە ىستەي الادى، دەسكريميناسيا مەن توزىمسىزدىكپەن قالاي كۇرەسەمىز دەگەن سۇراققا جاۋاپ ىزدەيدى. بىرنەشە ەلدىڭ سالالىق ۆەدومستۆولارى قاتىسقان جيىندا اقپارات جانە قوعامدىق دامۋ ءمينيسترى دارحان ءقىدىرالى ءسوز سويلەدى، دەپ حابارلايدى Almaty-akshamy.kz.
«وزدەرىڭىزگە بەلگىلى، XXI عاسىرداعى الەم جۇرتشىلىعىن دۇرلىكتىرىپ وتىرعان سىن-قاتەرلەرگە تويتارىس بەرۋدە تولەرانتتىلىق، ادامي باۋىرلاستىق، تاتۋلىق قۇندىلىقتارى ەرەكشە مانگە يە. ءبىز بۇل قاستەرلى قۇندىلىقتىڭ قادىر-قاسيەتى مەن ءمان-ماڭىزىن كۇنى كەشە دۇنيە ءجۇزىن اپ-ساتتە شارپىپ وتكەن كوروناۆيرۋس ىندەتى كەزىندە بايقادىق دەگەن ويدامىن. ءبىر قوعامدا ءومىر سۇرە وتىرىپ، ءجۇرىس-تۇرىسى شەكتەلىپ، ۆيرتۋالدى بايلانىسقا تۇسكەن كەزدە، تانىس تا بەيتانىس ادامدار ءوزارا تۇسىنىستىك تانىتا وتىرىپ قانا وسى قيىندىقتى ەڭسەردى»، - دەدى مينيستر.
سونداي-اق مينيستر قازاقستانداعى ەتنوسارالىق جانە كونفەسسياارالىق كەلىسىمدى نىعايتۋ ءۇشىن اتقارىلىپ جاتقان جۇمىستار تۋرالى ايتتى.
«بىرىككەن ۇلتتار ۇيىمىندا باسقارۋشى قىزمەت اتقارعان پرەزيدەنت قاسىم-جومارت كەمەل ۇلى توقايەۆ الەمنىڭ كۇن تارتىبىندەگى وزەكتى ماسەلەلەر مەن ەلدەگى تىنىشتىقتىڭ تۇراقتى بولۋىنا ۇنەمى نازار اۋدارىپ وتىر. بۇعان قوسا، قازاقستان الەمدىك جانە ءداستۇرلى ءدىن كوشباسشىلارىنىڭ ديالوگ الاڭىنا اينالدى. ءدىن قايراتكەرلەرىنىڭ باسىن قوساتىن الەمدىك جانە ءداستۇرلى ءدىن ليدەرلەرىنىڭ سەزى استانادا جەتىنشى رەت وتكىزىلدى»، - دەدى د.ءقىدىرالى.
سونداي-اق مينيستر تولەرانتتىلىقتى ناسيحاتتاۋداعى ماسس مەديانىڭ ماڭىزى ەرەكشە ەكەنىنە توقتالدى.
«مەديادا ارازدىق ءتىلىنىڭ قولدانىلماۋىن قاداعالاپ، كەرىسىنشە، ەلدى بىرلىككە، تاتۋلىققا ۇندەۋ، حالىقتى رۋحاني جاقىنداستىرۋدا اقپارات قۇرالدارىنىڭ ءرولى زور. بۇگىنگى كونفەرەنسيا دا وسى ماقساتتىڭ ورىندالۋىنا ءوز ۇلەسىن قوسادى دەپ سەنەمىن جانە ۇيىمداستىرۋشىلارعا العىس ايتامىن»، - دەدى دارحان ءقىدىرالى.
ايتا كەتەيىك، بىرىككەن اراب امىرلىكتەرىنىڭ استاناسى ءابۋ دابيدە «تولەرانتتىلىق ءۇشىن دۇنيەجۇزىلىك ۇكىمەتتەردىڭ ينكۋباتورى» اتتى فورۋم ءوتىپ جاتىر. جيىنعا امىرلىكتىڭ تولەرانتتىلىق جانە قاتار ءومىر ءسۇرۋ ءمينيسترى ناحايان بەن مۋباراك ءال ناحايان قاتىستى.