الماتى قالاسىندا مەرەيتوي قارساڭىندا «Abay Plaza» اتتى جاڭا ساۋدا ورتالىعى ءوز ەسىگىن ايقارا اشتى.
جاڭا ساۋدا كەشەنى اباي داڭعىلى مەن التىنسارين كوشەسىنىڭ قيىلىسىندا، «تيگروحاۋد» كەشەنىنىڭ جانىندا ورنالاسقان. ساۋدا ورتالىعىنىڭ اشىلۋىنا اۋەزوۆ اۋدانىنىڭ اكىمدىگى مەن الماتى قالاسىنىڭ كاسىپكەرلىك باسقارماسىنىڭ وكىلدەرى جانە تۇرعىندار قاتىستى.
عيماراتتا ءارتۇرلى تۇتىنۋ تاۋارلارى، سونىڭ ىشىندە ەۋروپالىق وندىرۋشىلەردىڭ كيىمدەرى ۇسىنىلعان زاماناۋي ساۋدا ورىندارى ورنالاسقان. سونداي-اق، كەلۋشىلەرگە ارنالعان مەيرامحانا كەشەنى، قوعامدىق تاماقتانۋ ورىندارى مەن سۇلۋلىق سالوندارى جۇمىس ىستەيدى.
«تيگروحاۋد» ج ش س باس ديرەكتورى ازامات شاگيتوۆتىڭ ايتۋىنشا، «Abay Plaza» ساۋدا ورتالىعىنىڭ قۇرىلىسى 2024 جىلدىڭ ءساۋىر ايىندا باستالىپ، جوسپارعا سايكەس اياقتالعان. قۇرىلىستى جۇزەگە اسىرۋعا الماتى قالاسىنىڭ كاسىپكەرلىك باسقارماسى مەن اۋەزوۆ اۋدانىنىڭ اكىمدىگى قولداۋ كورسەتكەن. سونىمەن قاتار، «Almaty Finance» تاراپىنان ينۆەستيسيالىق قولداۋ كورسەتىلگەن. قازىرگى ۋاقىتتا «Abay Plaza» كەشەنىندە 50-دەن استام ساۋدا نۇكتەسى جۇمىس ىستەيدى.
اتالعان نىسان – تەك زاماناۋي ارحيتەكتۋرالىق شەشىم ەمەس، ۇلتتىق رۋح پەن ءتول مادەنيەتتىڭ ۇيلەسىم تاپقان كەڭىستىگى. «Abay Plaza» – ءسان-سالتاناتى كەلىسكەن ساۋدا، قوعامدىق جانە زياتكەرلىك ورىن، ءارى قازاق حالقىنىڭ مادەني كودى مەن بولمىسىن زاماناۋي فورماتتا ۇسىناتىن ەرەكشە كەڭىستىك. عيماراتتىڭ ىشكى جانە سىرتقى كورىنىسى مەن بەزەندىرۋىندە اباي ءداۋىرىنىڭ بوياۋى، قازاقى ورنەك، ۇلتتىق ناقىش كەڭىنەن قولدانىلعان. كىلەم مەن كەستە ەلەمەنتتەرى، كيىز ءۇي فورماسىنداعى شاعىن دەمالىس ايماقتارى كەلۋشىگە رۋحاني اسەر سىيلاپ، ۇلتتىڭ وتكەنى مەن بۇگىنىن بايلانىستىرادى.
اشىلۋ راسىمىنەن ەرەكشە اسەر العان قوناق ساۋلە باتىربەكوۆا:
– اباي – تەك وتكەننىڭ ەمەس، بۇگىن مەن بولاشاقتىڭ دا شامشىراعى. بۇل ورتالىقتىڭ اشىلۋى – ونىڭ مۇراسىن ۇلىقتاپ، ۇرپاق ساناسىنا جەتكىزۋ جولىنداعى ۇلكەن قادامداردىڭ ءبىرى. اباي قۇنانباي ۇلىنىڭ «تولىق ادام» تۇجىرىمداماسى، ادامگەرشىلىك پەن بىلىمگە نەگىزدەلگەن ءىلىمى – ورتالىقتىڭ يدەيالىق وزەگىنە اينالماق.
بۇل – تەك ءبىر عيمارات ەمەس، ۇلت ساناسىنا وي سالار، جاستارعا باعىت-باعدار بەرەر، رۋحانياتتى تىرىلتەر جاڭا كەڭىستىك بولارىنا سەنەمىن»، – دەپ اتاپ ءوتتى.
ۇلى ابايدىڭ تۋعان كۇنىندە وسىنداي يگى ءىستىڭ جۇزەگە اسۋى – ەلدىڭ رۋحاني جاڭعىرۋ جولىنداعى ناقتى قادامى. «Abay plaza» – زياتكەرلىك كەڭىستىك پەن مادەني قۇندىلىقتار ۇيلەسىم تاپقان ورتالىققا اينالارى ءسوزسىز.