ا.بايتۇرسىنۇلىنا ارنالعان پوشتا ماركاسى شىقتى

مەرەيتولىق ماركا 2 ميلليون دانا مولشەرىندە باسىپ شىعارىلدى

ۇلت ۇستازى، ءتىل ءبىلىمى عىلىمىنىڭ اتاسى، رەفورماتور، تۇركى جۇرتىنا ورتاق ۇلى تۇلعا احمەت بايتۇرسىن ۇلىنىڭ 150 جىلدىعىنا ارنالعان مەرەيتويلىق پوشتا ماركاسى شىقتى دەپ حابارلايدى almaty-akshamy.kz

پوشتا ماركاسى قاي ەلدى دە بولماسىن الەمگە تانىتۋدا سول ەلدىڭ “ءۆيزيتتى كارتوچكاسى” سانالاتىنى بەلگىلى.

ديزاينى «قازپوشتا» اق-مەن كەلىسىلگەن ماركا ەندى ۇلى تۇلعانى تەك الەم جۇرتشىلىعىنا تانىتىپ عانا قويمايدى، سونىمەن قاتار ا. بايتۇرسىن ۇلى بەينەسى سان عاسىرلار بويى ۇرپاقتار جادىندا ساقتالاتىن بولادى.

قازاقستان رەسپۋبليكاسى سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگىنىڭ اقپاراتىنا سايكەس اتالعان مينيسترلىكتىڭ 2022 جىلعى 31 مامىرداعى «قازاقستان رەسپۋبليكاسى پوشتا تولەمىنىڭ مەملەكەتتىك بەلگىلەرىنىڭ تۇرلەرى مەن كولەمدەرىن بەكىتۋ جانە پوشتا اينالىمىنا ەنگىزۋ تۋرالى» بۇيرىعىمەن 2022 جىلعى 3 ماۋسىمنان پوشتا ماركاسى 2 000 000 (2 ميلليون) دانا مولشەرىندە باسىپ شىعارىلىپ، اينالىمعا ەنگىزىلدى.

ارنايى ءمورقالىبتى ماركا كونۆەرتتەرى الەم فيلاتەليستەرى كوللەكسيالارىنان ورىن الارى ءسوزسىز.