الماتى قۇتقارۋشىلارى قىس ماۋسىمىندا قالانىڭ سۋ قويمالارىندا رەيد جۇرگىزۋدە
وڭىرلىك كوممۋنيكاسيالار قىزمەتىنىڭ بريفينگىندە الماتى قالاسى تجد ازاماتتىق قورعانىس باسقارماسىنىڭ باسشىسى يسحار ساۆازوۆ قىس ماۋسىمىنداعى قاۋىپسىزدىكتىڭ نەگىزگى ەرەجەلەرىن ەسكە سالدى، دەپ حابارلايدى اlmaty-akshamy.kz.
اۋا تەمپەراتۋراسىنىڭ تومەندەۋىنەن سۋ قويمالارىندا مۇز پايدا بولادى، ءبىراق ول ادام سالماعىن كوتەرە المايدى. جىل سايىن جۇقا مۇز ادامداردىڭ ولىمىنە سەبەپ بولىپ جاتادى.
سپيكەر قىس مەزگىلىندە سۋ ايدىندارىندا ادامداردىڭ قازا بولۋىنا بايلانىستى توتەنشە جاعدايلاردىڭ الدىن الۋ ماقساتىندا اۋداندىق توتەنشە جاعدايلار باسقارمالارىمەن، اۋدان اكىمدىكتەرىمەن بىرلەسىپ، «ابايلاڭىز، جۇقا مۇز!» «بالىق اۋلاۋعا تىيىم سالىنادى!» سياقتى تىيىم سالاتىن 22 بەلگى ورناتقانىن اتاپ ءوتتى. سونىمەن قاتار، وتكەن كۇزگى-قىسقى كەزەڭدە 120 رەيد جۇرگىزىلىپ، 1500-گە جۋىق جادىناما تاراتىلدى.
«بالىق اۋلايتىن دۇكەندەر مەن بالىق اۋلاۋ قۇرالدارى ساتىلاتىن ورىنداردا 300-دەن استام جادىنامالار تاراتىلدى. كۇن سايىن حالىق كوپ جينالاتىن ءبىلىم بەرۋ، دەنساۋلىق ساقتاۋ نىساندارىندا (سوسو، ساۋدا ۇيلەرى، حالىققا قىزمەت كورسەتۋ ورتالىعى، ۆوكزال، اۋەجاي، مەتروپوليتەن)، سونداي-اق الماتى قالاسىنىڭ جول بويىندا ورناتىلعان بارلىق سمارت تاقتالار مەن LED-ەكرانداردا «ابايلاڭىز، جۇقا مۇز!» تاقىرىبىندا بەينەروليكتەر كورسەتىلەدى»، - دەدى ي.ساۆازوۆ.
سونداي-اق، ي.ساۆازوۆ كۇن سايىن مەملەكەتتىك جانە ورىس تىلدەرىندە كۇنىنە ەكى رەت «راديو سيتي» جانە «نارودنوە راديو» ارنالارىندا تاقىرىپتىق اۋديوجازبا تاراتىلعانىن، «الماتى» تەلەارناسىندا بەينەروليكتەر كورسەتىلگەنىن ايتتى. قالالىق ءبىلىم باسقارماسىمەن بىرلەسە وتىرىپ، قىس مەزگىلىندەگى توتەنشە جاعدايلاردىڭ الدىن الۋعا، سونداي-اق ۇسىك شالعاندا العاشقى مەديسينالىق كومەك كورسەتۋگە ماشىقتاندىرۋعا باعىتتالعان ينتەراكتيۆتى ساباقتار وتكىزىلدى.
الماتى قالاسىنىڭ توتەنشە جاعدايلار بويىنشا دەپارتامەنتى قىس ماۋسىمىندا قاۋىپسىزدىكتىڭ نەگىزگى ەرەجەلەرىن ەسكە ساقتاۋعا كەڭەس بەرەدى:
- مۇزعا قاراڭعى كەزدە جانە ناشار كورىنەتىن كەزدە شىقپاڭىز؛
- سۋ ايدىندارىنىڭ قورشالماعان جانە قورعالماعان جەرلەرىنەن وتۋگە نەمەسە كولىكپەن جۇرۋگە تىيىم سالىنادى؛
- بالىق اۋلاۋ ءۇشىن نەمەسە باسقا ماقساتتا مۇزدى تەسۋگە، ويۋعا تىيىم سالىنادى؛
- مۇز ۇستىنە جالعىز شىقپاڭىز؛
- مۇزدىڭ قاتتىلىعىن اياقپەن تەكسەرمەڭىز؛
- اباي بولىڭىزدار، قار استىندا جىلىم، جارىقتار نەمەسە تەسىكتەر بولۋى مۇمكىن؛
- ەگەر استىڭىزدا مۇز جارىلىپ، جارىقتار پايدا بولسا، قورقىپ، قاۋىپتەن قاشۋدىڭ قاجەتى جوق، مۇزدىڭ ۇستىنە باياۋ جاتىپ، ءقاۋىپسىز جەرگە دومالاۋ كەرەك؛
- ەگەر جىلىمعا تۇسسەڭىز، ۇرەيگە بوي الدىرماڭىز، مۇز ۇستىنە قولدارىڭىزدى كەڭىنەن اشقان كۇيى جىلجىڭىز؛
- قۇتقارۋ كەزىندە جىلدام ءارى شەشىمدى تۇردە، ءبىراق بارىنشا بايقاپ ارەكەت ەتىڭىز. قۇتقارۋشى قۇرالدى 3-4 مەترلىك قاشىقتىقتان بەرىڭىز.