«بيولوگيا» ءبىلىم بەرۋ باعدارلامالارى بويىنشا وقۋ-ادىستەمەلىك جابدىقتارمەن قامتاماسىز ەتۋدى جەتىلدىرۋ جانە سيفرلىق ورتادا ستۋدەنتتەردىڭ ءبىلىمىن ارتتىرۋ ماقساتىندا جاراتىلىستانۋ جانە گەوگرافيا ينستيتۋتىنىڭ جاس عالىمدارى مەن پروفەسسور-وقىتۋشىلار قۇرامى بيولوگيا عىلىمدارىنىڭ دوكتورى دوكتورحان ايداربايەۆانىڭ جەتەكشىلىگىمەن «گەنەتيكا» ەلەكتروندى وقۋ قۇرالىن ازىرلەدى، دەپ حابارلايدى Almaty-akshamy.kz.
گەنەتيكا – بيولوگيا عىلىمدارىنىڭ جىلدام دامىپ جاتقان سالالارىنىڭ ءبىرى، سوندىقتان اقپارات تا ۇدايى وزگەرىسكە ءتۇسىپ، جاڭارۋدا. ەلەكتروندىق وقۋ قۇرالىنىڭ ماقساتى – بيولوگ ستۋدەنتتەرگە ورگانيزمدەردىڭ تۇقىم قۋالاۋشىلىق پەن وزگەرگىشتىك زاڭدىلىقتارىن، تۇقىم قۋالاۋشىلىقتىڭ سيتولوگيالىق نەگىزدەرى تۋرالى تەرەڭ ءبىلىم بەرۋ.
ەلەكتروندىق وقۋ قۇرالى مازمۇنىنا كىرىسپە، ءدارىس تەزيستەرى، زەرتحانالىق جاتتىعۋلار، ستۋدەنتتەردىڭ ءوز بەتىمەن ورىندايتىن تاپسىرمالارى، تەست تاپسىرمالارى، گەنەتيكادان ءارتۇرلى تاقىرىپتاعى وقۋ فيلمدەرى ەنگىزىلگەن.
وقۋ قۇرالىنىڭ كومەگىمەن ستۋدەنتتەر قازىرگى گەنەتيكانىڭ ءارتۇرلى تاقىرىپتارى بويىنشا ءبىلىم الادى.