ترەنينگ "مەكتەپتى باسقارۋ جۇيەسى" تاقىرىبىندا ءوتتى
شارا بارىسىندا مەكتەپ ديرەكتورىنىڭ، قامقورشىلىق كەڭەسىنىڭ رولىنە جانە باسقارۋ ماقساتتارىنا جەتۋدەگى قارجىلاندىرۋعا ەرەكشە نازار اۋدارىلدى، دەپ حابارلايدى Almaty-akshamy.kz.
پرورەكتور ستۋدەنتتەرمەن Harvard Business Review-تە جاريالانعان مەكتەپ كوشباسشىلارىنىڭ تۇرلەرى بويىنشا زەرتتەۋ ناتيجەلەرى تۋرالى ايتىپ، رفمم كەيسى جانە وسى مەكتەپتەگى جۇمىس تاجىريبەسىمەن ءبولىستى، الەمنىڭ بارلىق وركەنيەتتى ەلدەرىندە باستى باسىمدىق ءبىلىم بەرۋگە بەرىلەتىنىن، ول دامۋدىڭ باستى كورسەتكىشى ەكەنىن اتاپ ءوتتى. ول ءۇشىن مىقتى كادرلار، اسىرەسە كاسىبي پەداگوگتار قاجەت.
«باسەكەگە قابىلەتتى كادرلاردى قالىپتاستىرۋدا مەكتەپ مۇعالىمدەرى مەن جوعارى وقۋ ورىندارى وقىتۋشىلارىنىڭ اتقاراتىن ءرولى وتە ماڭىزدى. سوندىقتان جوعارى بىلىكتى مامانداردى دايارلاۋ – اباي اتىنداعى قازۇپۋ ءۇشىن دە باستى مىندەت سانالادى. وسى جىلدىڭ قىركۇيەك ايىندا Honors College ستۋدەنتتەرى ەلىمىزدەگى ەڭ مىقتى ورتا وقۋ ورىندارىنىڭ ءبىرى – الماتى رفمم-دە وندىرىستىك تاجىريبەدەن ءوتتى. بولاشاقتا مۇنداي ترەنينگتەر جالعاسىن تاباتىن بولادى»، – دەپ ءوز ويىن تۇيىندەدى شىڭعىس نۇرلانوۆ.