كۇن تۇتىلۋىن ەكران پروەكسياسى ارقىلى باقىلاعان دۇرىس
25 قازاندا كۇننىڭ جارتىلاي تۇتىلۋ قۇبىلىسى قازاقستاننىڭ بارلىق اۋماعىندا كورىنەدى، دەپ حابارلايدى Almaty-akshamy.kz inbusiness.kz-كە سىلتەمە جاساپ.
بۇل جاڭالىقتى ۆ.گ.فەسەنكوۆا اتىنداعى استروفيزيكا ينستيتۋتى جاريالادى. ينستيتۋت ماماندارى ەلىمىزدىڭ بىرنەشە وڭىرىنە كۇننىڭ تۇتىلۋ ۋاقىتىن ەسەپتەپ شىعاردى. كۇن تۇتىلۋىنىڭ ماكسيمالدى فازاسى استانادا بايقالادى. ەلوردادا كۇن تۇتىلۋ 16:06-دا باستالىپ، ماكسيمالدى فرازانى (83%) ەلوردا تۇرعىندارى ساعات 17:17-دە كورە الادى. الماتىدا كۇن تۇتىلۋىنىڭ باستالۋى جەرگىلىكتى ۋاقىت بويىنشا ساعات 16:26-دا، 17:35-تە ماكسيمالدى فازاسى باستالادى - 76%، پەتروپاۆلدا (80%) – ساعات 17:08-دە، پاۆلوداردا (79%) – 17:18-دە، ورالدا (71%) – ساعات 16:00-دە، اتىراۋدا (69%) - 16:07-دە، شىمكەنتتە (69%) - 17:32-دە.
سونىمەن قاتار ماماندار ەرەكشە استرولوگيالىق قۇبىلىستى تاماشالاۋ كەزىندە ساقتىق شارالارىن ۇمىتپاۋدى ەسكە سالدى.
"بۇل تاڭعاجايىپ استرونوميالىق قۇبىلىستى كورۋ كوزىمىزگە زيان كەلتىرمەۋ ءۇشىن ساقتىق شارالارىن ساقتاۋ قاجەت. كۇن تۇتىلۋىن ەكران پروەكسياسى ارقىلى باقىلاعان دۇرىس. سونىمەن قاتار كۇڭگىرت سۇزگى نەمەسە دانەكەرلەۋشى كوزىلدىرىگى ارقىلى كۇنگە تىكەلەي قاراۋعا بولادى"، - دەدى ۆ.گ.فەسەنكوۆا اتىنداعى استروفيزيكا ينستيتۋتى ديرەكتورىنىڭ ورىنباسارى ر. ۆاليۋللين.