اباي وبلىسىنداعى ورمان ءورتى: اۋىل تۇرعىندارى ءقاۋىپسىز جەرگە كوشىپ جاتىر

سەبەبى ءورت ەلدى مەكەنگە تاياپ قالعان

اباي وبلىسى بەرەزوۆكا اۋىلىنىڭ تۇرعىندارى ءقاۋىپسىز جەرگە كوشۋگە قامدانىپ جاتىر، دەپ حابارلايدى Almaty-akshamy.kz «حابار 24» ارناسىنا سىلتەمە جاساپ.

جەرگىلىكتى بيلىك ازىرگە ءقاۋىپ جوق ەكەنىن ايتادى. دەگەنمەن كوشەمىن دەگەندەرگە ارنايى كولىكتەر دايىنداپ قويعان. سونىمەن قاتار يۆانوۆكا جانە اۋىل ەلدى مەكەندەرىنىڭ تۇرعىندارى ءۇشىن اۆتوبۋستار ءازىر تۇر. اتالعان اۋىلداردىڭ حالقى ازىرگە قوزعالا قويمادى.

ايتا كەتەيىك، قۇتقارۋشىلار مەن ورمانشىلار كەشەدەن بەرى قىزىل جالىنمەن ارپالىسىپ جاتىر. 400-دەن استام ادام، 100-گە تارتا تەحنيكا مەن 2 تىكۇشاق جۇمىلدىرىلدى. الايدا قاتتى جەل بولىپ، ءورتتى ءسوندىرۋ قيىنداپ كەتتى. تاڭەرتەڭنەن بەرى تىكۇشاقتار كوكتەن 157 توننا سۋ شاشقان. الدىن الا بولجام بويىنشا، 1،5 مىڭ گەكتارعا جۋىق القاپ ورتەنىپ كەتتى.

«بورودۋليحا اۋىلىندا اپايىم تۇرادى. سوعان كەتىپ بارا جاتىرمىز. ءقازىر ءورت جاقىنداپ قالعانىن پوليسيا كەلىپ ايتتى»، - دەيدى بەرەزوۆكا اۋىلىنىڭ تۇرعىنى ەرلان بيعازييەۆ.

«ەلدى مەكەندەرگە ءقاۋىپ ءتونىپ تۇرعان جوق. دەگەنمەن تۇرعىنداردى كوشىرۋ ءۇشىن اۆتوبۋس دايىنداپ قويدىق. حالىققا ءتۇسىندىرۋ جۇمىسىن جۇرگىزدىك»، - دەدى اباي وبلىسى اكىمىنىڭ ورىنباسارى ديميتريي گاريكوۆ.