سەرجانت ايدوس توعىزبايەۆ اۋرۋحانادا كوز جۇمدى.
اباي وبلىسىندا تابيعي ءورتتى ءسوندىرۋ كەزىندە 3 ءورت ءسوندىرۋشى كۇيىك جاراقاتىن الىپ، ولاردىڭ ءبىرى اۋرۋحانادا كوز جۇمدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ءمالىم ەتىلگەندەي، 7 قىركۇيەك كۇنى ساعات 13.35-تە «112» كەزەكشى پۋلتىنە اباي وبلىسى جارما اۋدانىنىڭ بوزجىرا اۋىلدىق وكرۋگى ءبىرىنشى اۋىلىنىڭ ۋچاسكەسىندە قۇرعاق ءشوپ جانىپ جاتقانى تۋرالى حابارلاما تۇسكەن. شاقىرۋ ورنىنا №22 ءورت ءسوندىرۋ بەكەتىنىڭ قىزمەتكەرلەرى جىبەرىلگەن.
«شاقىرۋ ورنىنا كەلگەن ءورت سوندىرۋشىلەر دەرەۋ جالىنمەن كۇرەسكە كىرىستى. ءورت ءسوندىرۋ اۆتوسيستەرناسى وتتى ءسوندىرۋ ءۇشىن سۋ جەتكىزىپ جۇرگەن باقىرشىق تاۋ-كەن ءوندىرۋ كاسىپورنىنىڭ كاماز (12 تەكشە مەتر) كولىگىنەن سۋ الىپ جاتقان ەدى. وسى كەزدە جەل باعىتى وزگەرىپ، لاۋلاعان وت اۆتوسيستەرناعا قاراي جىلجىدى. تەحنيكانى ەۆاكۋاسيالاۋ جولدارىنىڭ بارلىعى جان-جاعىنان وتقا ورانىپ كەتتى. بيىكتىگى ەكى مەتر قاراعاشتار جانىپ جاتتى.
ءورت سوندىرۋشىلەر ورت-تەحنيكالىق قارۋ-جاراقتى جيناۋدى توقتاتىپ، شۇعىل ەۆاكۋاسيالاۋعا كىرىستى. اۆتوسيستەرنا مەن سۋ تاسىمالدايتىن كاماز كولىگى تولىعىمەن جانىپ كەتتى.
سالدارىنان ءورت ءسوندىرۋ بەكەتىنىڭ بولىمشە كومانديرى امانگەلدى تۇرلىبەكوۆ پەن ءورت ءسوندىرۋ بەكەتىنىڭ جۇرگىزۋشى-قىزمەتكەرى ايدوس توعىزبايەۆ، ءورت ءسوندىرۋشى-قۇتقارۋشى نۇرلان ءسالىمجان ءتۇرلى دارەجەدە كۇيىك الىپ، جارما اۋدانى شار قالالىق اۋرۋحاناسىنا جەتكىزىلدى»، - دەلىنگەن مينيسترلىك حابارلاماسىندا.
سەرجانت ايدوس توعىزبايەۆ اۋرۋحانادا كوز جۇمعان. ول قىزمەتتىك بورىشىن ورىنداۋ كەزىندە كورسەتكەن باتىلدىعى مەن جانقيارلىق ەرلىگى ءۇشىن ءىىى دارەجەلى «ايبىن» مەملەكەتتىك ناگراداسىنا ۇسىنىلدى. جاسى 36-دا بولعان. ازاماتتىق قورعاۋ ورگاندارىندا 2019 جىلدان باستاپ قىزمەت ەتكەن. ارتىندا ايەلى مەن 5 بالاسى قالدى.
«توتەنشە جاعدايلار مينيسترلىگى ايدوس توعىزبايەۆتىڭ تۋعان-تۋىستارى مەن جاقىندارىنا قايعىرا كوڭىل ايتادى. ايدوس ءوز ءىسىنىڭ مامانى رەتىندە ارىپتەستەردىڭ ەسىندە ماڭگى قالادى. تجم قايتىس بولعان ءورت ءسوندىرۋشىنىڭ وتباسىنا جان-جاقتى كومەك پەن قولداۋ كورسەتەدى. اباي وبلىستىق تجد پسيحولوگتارى ءورت ءسوندىرۋشىنىڭ تۋىستارىنا كومەك كورسەتىپ جاتىر»، - دەدى مينيسترلىكتەن.
جالىن 500 گا اۋماقتى شارپىعان. ءتىلسىز جاۋ 8 قىركۇيەك كۇنى ساعات 5.40-تا ءسوندىرىلدى.
«ءورتتى سوندىرۋگە توتەنشە جاعدايلار دەپارتامەنتى مەن جەرگىلىكتى اتقارۋشى ورگانداردىڭ جەكە قۇرامىنان 14 ادام مەن 5 تەحنيكا جۇمىلدىرىلدى. قازىرگى ۋاقىتتا وقيعانىڭ ءمان-جايى انىقتالۋدا. ەلىمىزدە قىزمەتتىك مىندەتتەرىن اتقارۋ كەزىندە ورتكە قارسى جانە قۇتقارۋ قىزمەتتەرىنىڭ 65 قىزمەتكەرى قازا بولدى»، - دەدى ق ر تجم باسپا ءسوز قىزمەتىنەن.