پوليسيا اباي وبلىسىنىڭ تۇرعىندارىن ورماندا جوعالعان ەر ادامدى ىزدەۋگە كومەكتەسۋگە شاقىردى، - دەپ حابارلايدى Aqshamnews.kz ءتىلشىسى.
پوليسيانىڭ مالىمەتىنشە، 25 شىلدەدە ارداق بايدۇيسەن ورمان القابىنا كەتكەننەن كەيىن ورالماعان. ءقازىر ونى ىزدەۋ جۇمىستارى بارلىق اۋماقتا جۇرگىزىلىپ جاتىر. وبلىس تۇرعىندارىنان ىزدەۋ جۇمىستارىنا كومەكتەسۋ سۇرالدى.
رەسمي دەرەكتەرگە سايكەس، 2025 جىلعى 27 شىلدەدە پوليسياعا جوعالعان ەر ادامنىڭ ايەلى حابارلاسقان. ول 1968 جىلى تۋعان ارداق بايدۇيسەننىڭ جوعالعانىن مالىمدەگەن.
"25 شىلدەدە ول كىشى اقتوبە اۋماعىنداعى ورمانعا كەتكەن، سودان بەرى ونىڭ قايدا ەكەنى بەلگىسىز. ءقازىر پوليسيا قىزمەتكەرلەرى جەدەل-ىزدەستىرۋ شارالارىن بەلسەندى تۇردە جۇرگىزىپ جاتىر. ەرتەڭنەن باستاپ ىزدەۋگە ۇلتتىق ۇلان ساربازدارى تارتىلادى"، – دەپ حابارلادى اباي وبلىستىق پوليسيا دەپارتامەنتىنىڭ باسپا ءسوز قىزمەتى.
ورمان القابىنىڭ اۋماعى وتە ۇلكەن بولعاندىقتان، اباي وبلىسىنىڭ تۇرعىندارىنان جوعالعان ادامدى ىزدەۋگە اتسالىسۋ سۇرالىپ جاتىر.
"بىزگە سىزدەردىڭ كومەكتەرىڭىز قاجەت. 31 شىلدەدە ەرىكتىلەر جينالادى. جينالۋ ورنى – كىشى اقتوبە اۋماعى. بەيجاي قارامايتىن بارلىق ازاماتتى ىزدەۋ جۇمىستارىنا قاتىسۋعا شاقىرامىز"، – دەدى پوليسيا دەپارتامەنتىنىڭ باسپا ءسوز قىزمەتى.
جينالۋ ۋاقىتى مەن ناقتى ورنى قوسىمشا حابارلاناتىن بولادى.