اباي ۋنيۆەرسيتەتىنىڭ باستاماسىمەن اباي اتىنداعى عىلىمي-مادەني ورتالىق اشىلدى
2024 جىلدىڭ 19 قاراشاسىندا اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ باستاماسىمەن سەمەي قالاسىنداعى ابايدىڭ «جيدەباي-بورىلى» مەملەكەتتىك تاريحي-مادەني جانە ادەبي-مەموريالدىق مۋزەي-قورىعى بازاسىندا اباي اتىنداعى عىلىمي-مادەني ورتالىقتىڭ سالتاناتتى اشىلۋ ءراسىمى ءوتتى، دەپ حابارلايدى aqshamnews.kz
ءىس-شاراعا قازاقستان رەسپۋبليكاسى مادەنيەت جانە اقپارات مينيسترلىگىنىڭ، ق ر عىلىم جانە جوعارى ءبىلىم مينيسترلىگىنىڭ وكىلدەرى، جوعارى وقۋ ورىندارىنىڭ باسشىلارى مەن جەتەكشى عالىمدارى، بەلگىلى قوعام جانە مەملەكەت قايراتكەرلەرى، اباي وبلىسى اكىمدىگى مەن زيالى قاۋىم وكىلدەرى قاتىستى.
ورتالىقتى اشۋدىڭ نەگىزگى ماقساتى – اباي ۋنيۆەرسيتەتى، «جيدەباي-بورىلى» مەملەكەتتىك قورىق-مۋزەيى جانە «ابايتانۋ اكادەمياسى» عىلىمي-زەرتتەۋ ينستيتۋتى اراسىنداعى ىنتىماقتاستىقتى نىعايتۋ. بۇل باستاما ابايدىڭ شەتەلدەگى ورتالىقتارىمەن بايلانىسىن كەڭەيتىپ، ۇلى ويشىلدىڭ مۇراسىن جاستار اراسىندا ناسيحاتتاۋدىڭ جاڭاشىل تاسىلدەرىن ەنگىزۋ الاڭىنا اينالۋعا باعىتتالعان. ابايدىڭ «تولىق ادام» تۇجىرىمداماسىن عىلىمي-ادىستەمەلىك تۇرعىدان ناسيحاتتاۋ، ونىڭ شىعارمالارى ارقىلى وسكەلەڭ ۇرپاقتى تاربيەلەۋ ەرەكشە نازاردا بولدى.
ورتالىق قازىرگى جاھاندانۋ جاعدايىندا مادەني، وقۋ-اعارتۋ جانە عىلىمي جۇمىستار ءۇشىن زاماناۋي مۋزەيدىڭ مۇمكىندىكتەرىن ءتيىمدى پايدالانۋعا باعىتتالعان. بۇل مۋزەيگە كەلۋشىلەردىڭ قاتارىن ارتتىرۋدىڭ جاڭا جولدارىن ىزدەۋگە، ولكەتانۋ باعىتىنداعى مادەني ءتۋريزمدى دامىتۋعا، سونداي-اق مۋزەي مەن ۋنيۆەرسيتەت اراسىنداعى عىلىمي ىنتىماقتاستىقتى نىعايتۋعا ىقپال ەتپەك.
ءىس-شارا بارىسىندا ق ر عىلىم جانە جوعارى ءبىلىم ءمينيسترى ساياسات نۇربەكتىڭ قۇتتىقتاۋ حاتى وقىلدى. حاتتا اباي مۇراسىن زەردەلەۋ، دارىپتەۋ جانە ناسيحاتتاۋدىڭ نەگىزگى الاڭى رەتىندە ورتالىقتىڭ ماڭىزدىلىعى ەرەكشە اتاپ ءوتىلدى.
اباي ۋنيۆەرسيتەتىنىڭ رەكتورى بولات تىلەپ ورتالىقتىڭ اشىلۋىنىڭ ماڭىزدىلىعىن اتاپ ءوتىپ، ۇلى ويشىلدىڭ مۇراسىن رەسپۋبليكالىق جانە حالىقارالىق دەڭگەيدە ناسيحاتتاۋعا ارنالعان باستامالار تۋرالى باياندادى:
«ەل پرەزيدەنتى قاسىم-جومارت توقايەۆ ۇلى ويشىل، ۇلتتىق رۋحانياتتىڭ تەمىرقازىعى اتانعان اباي قۇنانباي ۇلىنىڭ شىعارماشىلىعىن كەڭىنەن ناسيحاتتاۋعا ەرەكشە كوڭىل بولۋدە. ابايدىڭ «تولىق ادام» ءىلىمى جاستاردى تاربيەلەۋدە ماڭىزدى باعدار بولسا، ونىڭ مۇرالارىن ۇلىقتاۋ جانە ناسيحاتتاۋ جاۋاپكەرشىلىگى ونىڭ ەسىمىمەن اتالاتىن مادەنيەت، ونەر جانە ءبىلىم بەرۋ مەكەمەلەرىنە جۇكتەلەدى. ۇلى اباي عۇمىر كەشكەن، قىزمەت ەتكەن كيەلى ولكەدە ورنالاسقان «جيدەباي-بورىلى» مەملەكەتتىك مۋزەي-قورىعىنىڭ بازاسىندا عىلىمي-مادەني ورتالىق اشۋ ءبىز ءۇشىن ۇلكەن مارتەبە»، – دەدى ول.
ورتالىقتىڭ اشىلۋى اياسىندا اباي ۋنيۆەرسيتەتىنىڭ ابايتانۋشى عالىمدارى سەمەي قالاسىنداعى ءاليحان بوكەيحان اتىنداعى ۋنيۆەرسيتەتتىڭ ۇجىمىمەن كەزدەسۋلەر وتكىزدى. ستۋدەنتتەر ءۇشىن اباي فيلوسوفياسى، شىعارماشىلىعى مەن ىلىمىنە ارنالعان اشىق دارىستەر ۇيىمداستىرىلدى.
ورتالىقتىڭ اشىلۋى ۇلى ويشىل اباي قۇنانباي ۇلىنىڭ مۇراسىن ناسيحاتتاۋعا باعىتتالعان ماڭىزدى قادام بولدى. بۇل باستاما مادەنيەت پەن ءبىلىم بەرۋ سالاسىندا ىلگەرىلەۋدىڭ، ۇلت رۋحانياتىن جاڭا دەڭگەيگە كوتەرۋدىڭ جارقىن كورىنىسى بولىپ تابىلادى.