اعىمداعى جىلى ورتاشا جوندەۋ جۇمىستارى اياسىندا ۇزىندىعى 6،5 شاقىرىم قۇرايتىن اباي داڭعىلىنىڭ تىلەندييەۆ كوشەسىنەن دوستىق داڭعىلىنا دەيىنگى بولىگىندە ورتاشا جوندەۋ جۇمىستارى جوسپارلانعان بولاتىن، دەپ حابارلايدى almaty-akshamy.kz
الدىڭعى ورتاشا جوندەۋ جۇمىستارى بۇل بولىكتە 2012 جىلى جۇرگىزىلگەن. جوندەۋارالىق مەرزىمنىڭ وتۋىنە بايلانىستى تەكسەرۋ جۇرگىزىلىپ، ونىڭ بارىسىندا اسفالتبەتون جابىنىندا شۇڭقىرلار، جارىقتار تورى، ۇساقتالۋ تۇرىندەگى اقاۋلار انىقتالدى جانە جولدىڭ اعىمداعى جاعدايى تۋرالى تەحنيكالىق قورىتىندى جاسالدى. تەحنيكالىق قورىتىندى نەگىزىندە اباي داڭعىلىن ورتاشا جوندەۋ جوسپارىنا ەنگىزۋ تۋرالى شەشىم قابىلداندى.
وسىلايشا، شىلدە ايىندا ورتاشا جوندەۋ جۇمىستارى باستالىپ، ونى اعىمداعى جىلدىڭ 31 تامىزىنا دەيىن اياقتاۋ جوسپارلانعان بولاتىن. قالا تۇرعىندارىنا ىڭعايلى بولۋ ءۇشىن جۇمىستار تۇندە جۇرگىزىلدى. جوندەۋ جۇمىستارى بارىسىن جىلدامداتۋ ماقساتىندا داڭعىل بويىنشا ەكى مەردىگەر ۇيىم قاتار جۇمىس جاساپ، كولىك جۇرەتىن بولىكتى 12 تامىز كۇنى اياقتاۋعا مۇمكىندىك تۋىندادى. تروتۋارلاردى جوندەۋ جۇمىستارى 31 تامىزعا دەيىن اياقتالاتىن بولادى.
قازىرگى تاڭدا داڭعىل بويىنشا جول تاڭبالارىن سالۋ جۇمىستارى جۇرگىزىلىپ جاتىر.
ەسكە سالا كەتەيىك، بيىلعى جول جوندەۋ ماۋسىمىندا قالادا العاش رەت پوليمەرلى اسفالتبەتون جابىنى قولدانىلۋدا. جول قۇرىلىسىندا پوليمەر قوسپاسىن پايدالانۋ جابىن ساپاسى مەن توزىمدىلىگىن ارتتىرىپ، بيتۋمنىڭ جۋىلىپ كەتۋىنىڭ الدىن الادى. سونىمەن قاتار، پوليمەر جول جابىنىنىڭ پايدالانۋ ۇزاقتىعىن ارتتىرىپ، بەرىكتىگى مەن ايازعا توزىمدىلىگىن قامتاماسىز ەتەدى.
جالپى، قالا اكىمدىگى بيىل 200 شاقىرىمنان اساتىن 230 كوشەنى ورتاشا جوندەۋمەن قامتۋدى جوسپارلاپ وتىر. قالا بويىنشا 3097 شاقىرىمدى قۇرايتىن 2746 كوشە بار. جاقسى جانە قاناعاتتانارلىق جاعدايداعى جولداردىڭ ۇلەسىن بيىل 86%-دان 89%-عا، ال 2025 جىلعا دەيىن 95%-عا جەتكىزۋ جوسپارلانعان، اتالعان ماقساتتا جىل سايىن كەمىندە 200 كم جول جوندەلىپ وتىرۋى قاجەت. وسىلايشا، كورسەتىلگەن جۇمىس كولەمى جول ينفراقۇرىلىمىن جاقسارتۋ جوسپارلارىنا سايكەس كەلەدى.