الماتىدا دەمالىس كۇندەرى اباي داڭعىلى بويىنداعى ۋچاسكەلەردىڭ بىرىندە اۆتوكولىك قوزعالىسى شەكتەلەدى
2024 جىلعى 2-تامىزداعى ساعات 23:00-دەن 5 -تامىزداعى ساعات 08:00-گە دەيىن الماتى قالاسىنىڭ اۋەزوۆ اۋدانىندا اباي داڭعىلى بويىمەن سايىن كوشەسىنەن باتىس باعىتتا «Qazaq Oil» جانارماي قۇيۋ بەكەتىنە دەيىن كولىك قوزعالىسىنا ءىشىنارا شەكتەۋ قويىلادى. اباي داڭعىلىنىڭ وڭتۇستىك جاعى بويىمەن ەكى جاقتى كولىك قوزعالىسى ۇيىمداستىرىلادى.
ۋاقىتشا شەكتەۋلەر 1991 جىلدان بەرى پايدالانىلىپ كەلە جاتقان، جالپى ۇزىندىعى 1838 مەتر بولاتىن، كولىك جولى بولىگىنىڭ استىنان وتەتىن قۇبىردى جاڭعىرتۋ ۋچاسكەسىندە جوسپارلى جۇمىستاردى جۇرگىزۋ قاۋىپسىزدىگىن قامتاماسىز ەتۋ ءۇشىن ەنگىزىلىپ وتىر.
بۇل قۇبىر 406 كوپپاتەرلى تۇرعىن ءۇيدى، 105 جەكە تۇرعىن ءۇيدى، 4 بالاباقشانى، 1 دەنساۋلىق ساقتاۋ نىسانىن جانە 6 باسقا نىساندى جىلۋمەن جانە ىستىق سۋمەن قامتاماسىز ەتەدى. جاڭعىرتۋ جۇمىستارى كەزەڭىندە اتالعان تۇتىنۋشىلار ىستىق سۋمەن بۇرىنعىسىنشا ۇزدىكسىز قامتاماسىز ەتە بەرىلەتىن بولادى.
ەستەرىڭىزگە سالا كەتەيىك، قوزعالىستى شەكتەۋگە قاتىستى بارلىق اقپارات Almaty.kz سايتىندا، @AlmatyJoly Telegram-ارناسىندا، اۋدان اكىمدىكتەرى مەن باسقارمالارىنىڭ الەۋمەتتىك جەلىلەرىندە، سونداي-اق «2GIS» جانە «ياندەكس كارتالارى» سەرۆيستەرىندە ورنالاستىرىلعان.
ۋاقىتشا قولايسىزدىقتارعا تۇسىنىستىكپەن قاراۋلارىڭىزدى سۇرايمىز.
«الماتى جىلۋ جۇيەسى» ج ش س