اباي داڭعىلى 2021 جىلى مومىش ۇلى كوشەسىنەن ناۋرىزباي اۋدانىنىڭ اكىمشىلىك ورتالىعىنا دەيىن ۇزاراتىن بولادى
الماتى اكىمى باقىتجان ساعىنتايەۆ «الماتى» تەلەارناسىنداعى جول ينفراقۇرىلىمىن دامىتۋ جونىندەگى ونلاين- تانىستىرىلىم بارىسىندا ماگيسترالدى جولداردى ۇڭگىلەۋ جۇمىستارىنىڭ بارىسى مەن قارقىنى تۋرالى ايتتى، دەپ حابارلايدى Almaty-akshamy.kz.
باقىتجان ساعىنتايەۆتىڭ ايتۋىنشا، وسىنداي ءتورت جوبا جۇزەگە اسىرىلۋدا. اباي داڭعىلىن مومىش ۇلى كوشەسىنەن قالا شەكاراسىنا دەيىن ۇزارتۋ 4،8 شاقىرىمدى قۇرايدى. ياسساۋي كوشەسىنەن شۇعىلا شاعىناۋدانىنداعى بەرەكە كوشەسىنە دەيىنگى ىسكە اسۋى ءتيىس ۋچاسكەنىڭ ۇزىندىعى 3 شاقىرىم.
جوبا بويىنشا 6 جولاقتى جولدىڭ قۇرىلىسى قاراستىرىلعان، ءار باعىت بويىنشا 3 جولاق، جاياۋ جۇرگىنشىلەر تروتۋارلارى، ۆەلوسيپەد جولدارى بولماق. سونىمەن قاتار، ءاشىموۆ كوشەسىنىڭ قيىلىسىندا جولايرىق جانە 4 جەرۇستى جاياۋ جۇرگىنشىلەر وتكەلىن سالۋ كوزدەلگەن.
قازىرگى كەزدە ينجەنەرلىك جەلىلەردى قايتا تارتۋ، ءتورت جاياۋ جۇرگىنشىلەر وتكەلىن سالۋ جۇمىستارى جۇرۋدە.
سونىمەن بىرگە، قۇرىلىس سالىناتىن جەرلەردەگى جەر ۋچاسكەلەرىن ساتىپ الۋ جۇمىستارى جۇرگىزىلۋدە. ءقازىردىڭ وزىندە 182 ۋچاسكە ساتىپ الىندى، قالعان 13 ۋچاسكەنى ساتىپ الۋ پىسىقتالۋدا. اتالعان جەر ۋچاسكەلەرى ۋاقتىلى ساتىپ الىنسا، وندا جۇمىستى اعىمداعى جىلدىڭ سوڭىنا دەيىن اياقتاۋ جوسپارلانۋدا.
سترويتەلنايا كوشەسىنەن قالا شەكاراسىنا دەيىنگى ۇزىندىعى 600 مەتر بولاتىن ۋچاسكەدەگى جۇمىستى 2023 جىلدىڭ سوڭىنا دەيىن اياقتاۋ جوسپارلانۋدا. جولدىڭ قالالىق شەكارادان باكاد-قا دەيىنگى بولىگىن الماتى وبلىسىنىڭ اكىمدىگى 2023 جىلدىڭ سوڭىنا دەيىن دە جۇزەگە اسىرادى. بۇدان وزگە، ۇزىندىعى 500 مەتر بولاتىن مومىش ۇلى كوشەسىنەن ياسساۋي كوشەسىنە دەيىنگى ۋچاسكەدەگى جۇمىس مەتروپوليتەننىڭ ەكىنشى كەزەڭىندەگى «دوستىق» بەكەتىنىڭ قۇرىلىسى اياسىندا جۇزەگە اسىرىلادى.
وسىلايشا، بيىلعى جىلدىڭ سوڭىنا دەيىن اباي داڭعىلى مومىش ۇلى كوشەسىنەن ناۋرىزباي اۋدانىنىڭ اكىمشىلىك ورتالىعىنا دەيىن، ال 2023 جىلدىڭ سوڭىندا باكاد-تان قالا شەكاراسىنا دەيىن ۇزاراتىن بولادى.
سايىن كوشەسىن رىسقۇلوۆ داڭعىلىنان موڭكە بي كوشەسىنە دەيىن 3،2 شاقىرىمعا ۇزارتۋ جوسپارلانعان. جوبا بويىنشا 6 جولاقتى جولدىڭ قۇرىلىسى، ءار باعىتتا 3 جولاق، جاياۋ جۇرگىنشىلەر تروتۋارلارى، ۆەلوسيپەد جولدارى جانە جاياۋ جۇرگىنشىلەر وتكەلدەرى قاراستىرىلعان.
كوشەنىڭ وسى بولىگىنىڭ قۇرىلىسى جولايرىعىمەن قوسا العاندا الاتاۋ اۋدانىنىڭ شاعىناۋداندارى مەن قالا ماڭىنداعى ەلدى مەكەندەردى قالانىڭ نەگىزگى ماگيسترالدارىمەن بايلانىستىرادى جانە ماڭىزدى كولىك ءدالىزىن جاسايدى.
ناۋرىزباي اۋدانىنداعى الاتاۋ كوشەسى كوشەسى سابدەنوۆ كوشەسىنەن رايىمبەك داڭعىلىنا دەيىن سوزىلادى، ۇزىندىعى – 2 كم. جوبا بويىنشا 4 جولاقتى جول قاراستىرىلعان. جۇمىستى قىركۇيەك ايىنا دەيىن تولىق اياقتاۋ جوسپارلانۋدا.
وسى ۋچاسكە قۇرىلىسىنىڭ اياقتالۋى اباي داڭعىلىن ۇڭگىلەۋمەن بىرگە ناۋرىزباي اۋدانىنىنىڭ ورتالىعىن قالانىڭ نەگىزگى كوممۋنيكاسيالارىمەن بايلانىستىرۋعا مۇمكىندىك بەرەدى.
اۋەزوۆ كوشەسىن سولتۇستىك باعىتتا گوگول كوشەسىنەن رايىمبەك داڭعىلىنا دەيىن ۇڭگىلەۋ قالانى دامىتۋدىڭ باس جوسپارىندا قاراستىرىلعان. اۋەزوۆ كوشەسىندەگى وسى ۋچاسكە قۇرىلىسى 4 جولاقتى بولادى ءارى سولتۇستىك-وڭتۇستىك باعىتىندا كولىك وتكىزۋ قابىلەتىن ەداۋىر ارتتىرادى.
جاڭا ۋچاسكەنىڭ كولىك وتكىزۋ قابىلەتى تاۋلىگىنە شامامەن 36 مىڭ كولىكتى قۇرايدى، بۇل كورشى كوشەلەردەگى جۇكتەمەنى ەداۋىر جەڭىلدەتەدى.