الماتىدا 35 جوو ورنالاسقان، وندا 188 مىڭنان استام ستۋدەنت ءبىلىم الادى، ونىڭ 120 مىڭنان استامى باسقا قالالاردان كەلگەن. وسىعان بايلانىستى جاتاقحانالاردا ورىن تاپشىلىعى وزەكتى ماسەلە بولىپ وتىر. رەسپۋبليكادا توسەك-ورىن تاپشىلىعى – 70 مىڭ، ونىڭ جارتىسىنا جۋىعى – 30 مىڭنان استامى – الماتى قالاسىندا.

بۇل ماسەلەنى جۇيەلى تۇردە شەشۋ ءۇشىن الماتىدا ەلىمىزدە العاش رەت جوبالىق كەڭسە اشىلدى، ونىڭ مىندەتى – بارلىق قاتىسۋشىلاردىڭ – ينۆەستورلار، ۋنيۆەرسيتەتتەر، اكىمدىك، «قارجى ورتالىعى» اق-تىڭ ءتيىمدى سەرىكتەستىگى ءۇشىن جاعداي جاساۋ. بۇگىنگى تاڭدا «ءبىر تەرەزە» قاعيداتى بويىنشا جۇمىس ىستەيتىن جوبالىق كەڭسەگە 70-تەن استام ينۆەستور ءوتىنىش بىلدىرگەن. بۇل جۇمىس پرەزيدەنتتىڭ تاپسىرماسى بويىنشا جۇزەگە اسىرىلىپ جاتىر، سۋبسيديالاۋ تەتىگى ازىرلەنىپ، جەر تەلىمىن الۋ راسىمدەرى جەڭىلدەتىلدى.

جوو رەكتورلارى مەن جاتاقحانا سالۋعا ات سالىسىپ جاتقان كاسىپكەرلەردىڭ قاتىسۋىمەن وتكەن كەڭەستە پروبلەمالىق ماسەلەلەر تالقىلاندى. اتاپ ايتقاندا، توسەك-ورىندارى از جاتاقحانالاردى سۋبسيديالاۋدى قولعا الۋ، عيماراتتاردى جاتاقحاناعا اينالدىرۋ كەزىندە مەملەكەتتىك قولداۋ كولەمىن 92-دەن 230 اەك-كە دەيىن ارتتىرۋ ۇسىنىلدى.

ا. كولگىنوۆ تاپشىلىق ماسەلەسى بيۋدجەت قاراجاتى ەسەبىنەن عانا ەمەس، سونداي-اق ينۆەستورلاردى تارتۋ ارقىلى شەشىلەتىنىن اتاپ ءوتتى. سوندىقتان جاڭا جاتاقحانالار سالۋعا، بار جاتاقحانالاردى رەكونسترۋكسيالاۋعا جانە عيماراتتاردى ستۋدەنتتەر جاتاقحاناسىنا اينالدىرۋعا نيەت بىلدىرگەن ينۆەستورلارعا بارىنشا كومەك كورسەتۋ قاجەت. سونىمەن قاتار ۆيسە-پرەمەر ءاربىر جوبا بويىنشا جول كارتاسىن ازىرلەۋدى، جوبالىق كەڭسەنىڭ جۇمىسىنا ساۋلەت جانە قۇرىلىس سالاسى ماماندارىن تارتۋدى تاپسىردى.

«رەسپۋبليكادا ستۋدەنتتەر جاتاقحانالارىنىڭ تاپشىلىعى جىل سايىن ارتىپ كەلەدى. ەگەر بۇل ماسەلە ۋاقىتىلى شەشىلمەسە، ول تەك ۋشىعا تۇسپەك. جوعارى وقۋ ورىندارىنىڭ رەكتورلارى ستۋدەنتتەرگە جاعداي جاساۋعا مۇددەلى بولۋعا ءتيىس، ال ۇكىمەت تاراپىنان ينۆەستورلارعا جان-جاقتى كومەك كورسەتىلەدى. الماتىداعى جوبالىق كەڭسە باسقا وڭىرلەرگە ۇلگى بولۋعا ءتيىس»، — دەدى پرەمەر-مينيستردىڭ ورىنباسارى.

سونىمەن قاتار ا. كولگىنوۆ «عىلىم ورداسى» عىلىمي نىساندار كەشەنىنە باردى. ونداعى ۇلتتىق عىلىم اكادەمياسى، عىلىمي-زەرتتەۋ ينستيتۋتتارى، عىلىمي ارحيۆ جانە ت.ب. نىساندارعا كۇردەلى جوندەۋ جۇمىستارىن جۇرگىزۋ كەرەك. جاقىن ارادا اتالعان جۇمىستار جۇرگىزىلەتىن بولادى.

كاسىپورىننىڭ نەگىزگى قۇرىلىمدىق بولىمشەسى – 6 ملن كىتاپ ساقتالعان ورتالىق عىلىمي كىتاپحانا. كوشىرمەلەرى جوق ماتەريالداردى ساقتاۋ ءۇشىن سيرەك كەزدەسەتىن كىتاپتاردى، قولجازبالار مەن ارحيۆ ماتەريالدارىن قالپىنا كەلتىرۋ جانە ساقتاۋ ورتالىعى قۇرىلدى، ول بىرەگەي قۇرالدارمەن جابدىقتالعان.

سونىمەن قاتار ق ر پرەمەر-مينيسترىنىڭ ورىنباسارى ءال-فارابي اتىنداعى قازاق ۇلتتىق ۋنيۆەرسيتەتىنە باردى، وندا دا جاتاقحانا ماسەلەسى بار. ماسكەۋ ينجەنەرلىك-فيزيكالىق ينستيتۋتىمەن بىرگە ۋنيۆەرسيتەت بازاسىندا 100 جوبا ىسكە اسىرىلۋدا، ولاردى كوممەرسيالاندىرۋ بويىنشا جۇمىستار ءجۇرىپ جاتىر.

Covid-19 پاندەمياسى جان-جاقتى مەديسينالىق كومەك كورسەتۋگە جانە توتەنشە جاعدايلارعا دايىن بولۋدىڭ ماڭىزىن كورسەتتى، وسى ورايدا پرەمەر-مينيستردىڭ ورىنباسارى سالىنىپ جاتقان رەسپۋبليكالىق جۇقپالى اۋرۋلار عىلىمي ورتالىعىنىڭ عيماراتىنا باردى. 350 توسەك-ورنى بار اۋرۋحانا وزەكتى ستاندارتتارعا سايكەس جابدىقتالادى. سوڭىندا ورتالىقتىڭ قۇرىلىسىن بەلگىلەنگەن مەرزىمدە اياقتاۋ تاپسىرىلدى.