ا. بايتۇرسىن ۇلىنىڭ مۋزەي-ۇيى رەەكسپوزيسيادان كەيىن اشىلدى

بيىل ۇلت ۇستازى، مەملەكەت جانە قوعام قايراتكەرى، عالىم-رەفورماتور احمەت بايتۇرسىن ۇلىنىڭ تۋعانىنا 150 جىل تولدى.

الماتى قالاسى مادەنيەت باسقارماسىنىڭ قولداۋىمەن ا. بايتۇرسىن ۇلى مۋزەي-ۇيىنە كۇردەلى جوندەۋ جۇرگىزىلىپ، ەكسپوزيسياسى جاڭارتىلدى، دەپ حابارلايدى Almaty-akshamy.kz

حح عاسىردىڭ ۇلى رەفورماتورى، قوعام جانە مەملەكەت قايراتكەرى، لينگۆيست-عالىم، قازاق فيلولوگيا عىلىمىنىڭ نەگىزىن قالاۋشى، اقىن-اۋدارماشى، تۇركىتانۋشى احمەت بايتۇرسىن ۇلىنىڭ مۋزەي-ۇيى 1993 جىلى اشىلدى. مۋزەي-ۇيدىڭ جانىنداعى ا. بايتۇرسىن ۇلىنىڭ ءبيۋستى 1998 جىلى ورناتىلعان.

الماتى قالاسى اكىمىنىڭ 2021 جىلعى 13 قازانداعى №4/508 قاۋلىسىمەن مۋزەي-ۇي جەكە مەنشىكتەن الماتى قالاسىنىڭ كوممۋنالدىق مەنشىگىنە بەرىلدى.

جاڭارعان مۋزەي-ۇي ءۇش ەكسپوزيسيالىق جانە ءبىر ءدارىس زالىنان تۇرادى. قازىرگى ۋاقىتتا مۋزەيدە عالىمنىڭ ءومىرى مەن شىعارماشىلىعى تۋرالى 500-گە جۋىق ەكسپونات جيناقتالعان. بۇل – مەملەكەتتىك ارحيۆتەن الىنعان ءتۇپنۇسقا قۇجاتتار، جەكە جانە ۇجىمدىق فوتوسۋرەتتەر.

مۋزەي زاماناۋي تەحنولوگيالارمەن جابدىقتالىپ، جاڭا مازمۇنمەن تولتىرىلىپ، جاڭا سيپات الدى. ارنايى سەنسورلى تاقتالاردا مۋزەي-ۇيدىڭ قۇرىلۋ تاريحى، ارحيۆتىك ماتەريالدار، فوتوسۋرەتتەر جانە رەفورماتوردىڭ ءومىرى مەن شىعارماشىلىق جولى تۋرالى مول ماعلۇمات بەرەتىن قۇندى مالىمەتتەر بار.

مۋزەي-ۇي دۇيسەنبىدەن باسقا كۇندەرى ساعات 10.00-دەن 19.00-گە دەيىن كەلۋشىلەر ءۇشىن اشىق.

مۋزەيدىڭ مەكەنجايى: الماتى قالاسى، بايتۇرسىن ۇلى كوشەسى، 60.

ا. بايتۇرسىن ۇلىنىڭ مۋزەي-ۇيى.

بايلانىس تەل.: +7 747 836 76 06.

e-mail: museumalmaty@mail.ru.