ۆاكسينا سالدىرعان قارت ادام قاي جاستا دا ادام ءوز دەنساۋلىعىنا ءمان بەرۋى كەرەك دەپ سانايدى
قىزىلوردا وبلىسى قازالى اۋدانى، بەكارىستان بي اۋىلىنىڭ تۇراتىن 98 جاستاعى قاباق سماعۇل كوروناۆيرۋسقا قارسى ەكپە سالدىردى، دەپ حابارلايدى Almaty-akshamy.kz
مايدانگەر دەنساۋلىق زور بايلىق ەكەنىن العا تارتتى. سوندىقتان ءقازىر الەمدى جايلاعان ءقاۋىپتى دەرتتىڭ بەتىن قايتارۋ ءۇشىن ەلدى ەكپە قابىلداۋعا شاقىردى.
«ءقازىر الەم حالقى پاندەميانىڭ اۋىر زاردابىن تارتىپ كەلەدى. ودان قۇتىلۋدىڭ باستى جولى - ۆاكسينالاۋ. مەن عاسىرلىق جاسقا قادام باستىم. دەسە دە، قاي جاستا دا ادام ءوزىنىڭ دەنساۋلىعىنا ماڭىز بەرۋى ءتيىس. سوندىقتان كوروناۆيرۋسقا قارسى ۆاكسينا قابىلداۋدى ءجون سانادىم»، - دەدى قارت مايدانگەر.
1923 جىلدىڭ 1 شىلدەسىندە دۇنيەگە كەلگەن قاباق اقساقال 1942 جىلى سوعىسقا اتتانعان. تۋلا قالاسىن ازات ەتۋگە قاتىسقان. 1943 جىلى اۋىر جارالانىپ ەلگە ورالعان. بەيبىت ومىردە بىلەك سىبانا ەڭبەك ەتتى.
مايدانگەر اعارتۋ ءۇيىنىڭ مەڭگەرۋشىسى، اۋىلدىق كەڭەستىڭ حاتشىسى لاۋازىمىن اتقاردى. ەسەپشىلىك سالاسىندا تۋرا 40 جىل جۇمىس جاسادى. جۇبايى كۇلجان ەكەۋى ون بالا ءوسىرىپ، ەل قاتارىنا قوستى. بالالارىنىڭ بارشاسى جوعارى ءبىلىم الدى. بۇل كۇندەرى نەمەرە-شوبەرە، شوپشەك ءسۇيىپ وتىر. ەلدىڭ دامۋى ءۇشىن قىزمەت جاساعان مايدانگەر كوپتەگەن وردەن، مەدالداردىڭ يەگەرى.
وبلىستا ۆاكسينانىڭ ءبىرىنشى كومپونەنتىمەن ەگىلگەندەر سانى 329492 ادامدى قۇرايدى. ال ۆاكسينامەن تولىقتاي قامتىلعاندار سانى 271 173 ادامعا جەتتى.
ەسكە سالساق، قىزىلوردادا ەكپە قابىلداۋعا قابىلەتتى ازاماتتاردىڭ 72 پايىزى ۆاكسينا سالدىردى.