ۇبت تاپسىرۋ كەزىندە 72 تالاپكەردىڭ ناتيجەسى جويىلدى
بۇل تۋرالى ق ر ۇلتتىق تەستىلەۋ ورتالىعىنىڭ ديرەكتورى رۋسلان ەمەلبايەۆ ءبىلىم جانە عىلىم مينيسترلىگىنىڭ اپپارات وتىرىسىندا ءمالىم ەتتى، دەپ حابارلايدى Almaty-akshamy.kz
«ۇلتتىق ءبىرىڭعاي تەستىلەۋگە جىبەرىلمەگەن جانە ناتيجەلەرى جويىلعان تەست تاپسىرۋشىلاردىڭ جالپى سانى 95 ادامدى قۇرادى. ونىڭ ىشىندە تەستىلەۋگە كىرگىزۋ بارىسىندا ءارتۇرلى تىيىم سالىنعان زاتتاردى الىپ كەلگەنى ءۇشىن تەستىلەۋگە جىبەرىلمەگەن 23 ادام بار. ال تەست تاپسىرۋ بارىسىندا تىيىم سالىنعان زاتتاردى قولدانعانى ءۇشىن 72 تالاپكەردىڭ ناتيجەسى جويىلدى»،– دەدى سپيكەر.
تۇلەكتەر پاندەمياعا بايلانىستى 42 تەست تاپسىرۋ پۋنكتىندە 50% تولىمدىلىقپەن ۇبت تاپسىرۋدا.
«ءبىر تالاپكەردىڭ دەنە قىزۋى جوعارى بولعاندىقتان، تەستىلەۋگە جىبەرىلمەدى. ول باسقا ۋاقىتتا تاپسىرادى. مۇمكىندىگى شەكتەۋلى، ەرەكشە ءبىلىم بەرۋ قاجەتتىلىگى بار 29 تالاپكەر تەست تاپسىردى. بيىل ولارعا قوسىمشا 40 مينۋت ۋاقىت جانە ارناۋلى ورىن بەلگىلەنگەن. تەست مازمۇنى دا ولاردىڭ ەرەكشەلىكتەرىن ەسكەرە وتىرىپ ازىرلەنگەن»، – دەدى ق ر ۇلتتىق تەستىلەۋ ورتالىعىنىڭ ديرەكتورى.