ق ر ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا ۇكىمەت وتىرىسىندا حالىقتى جۇمىسپەن قامتۋ بويىنشا قابىلدانىپ جاتقان شارالار تۋرالى ايتتى.
9 ايدىڭ قورىتىندىسى بويىنشا 734 مىڭ ادام جۇمىسقا ورنالاستىرىلدى، ونىڭ 50%-ى جاستار. قازاقستاندىقتاردىڭ كاسىپكەرلىك باستامالارىن قولداۋ ءۇشىن 5،3 مىڭنان استام گرانت جانە 4،7 مىڭنان استام جەڭىلدەتىلگەن ميكروكرەديت بەرىلدى، دەپ حابارلايدى Almaty-akshamy.kz ەڭبەك جانە حالىقتى الەۋمەتتىك قورعاۋ مينيسترلىگىنىڭ سايتىنا سىلتەمە جاساپ.
سۆەتلانا جاقىپوۆا مەملەكەت باسشىسى 2029 جىلعا دەيىن 3،3 ملن ادامدى، ونىڭ ىشىندە 2،3 ملن جاستاردى جۇمىسقا ورنالاستىرۋدى، سونداي-اق جاستار ءۇشىن قايتارىمسىز گرانتتار مەن جىلدىق مولشەرلەمەسى 2،5%-دىق جەڭىلدەتىلگەن ميكروكرەديتتەر بەرۋ ارقىلى ازاماتتاردىڭ كاسىپكەرلىك باستامالارىن قولداۋدى قامتاماسىز ەتۋدى تاپسىرعانىن ەسكە سالدى.
«جىل باسىندا بارلىق وڭىرلەردىڭ اكىمدەرىمەن بەكىتىلگەن 20 وڭىرلىك جۇمىسپەن قامتۋ كارتالارى شەڭبەرىندە ۇلتتىق جوبالار، «10 مىڭ حالىققا 100 جۇمىس ورنى»، مەملەكەتتەن سۋبسيديالاناتىن جۇمىس ورىندارى، جۇمىس بەرۋشىلەرمەن ۇسىنىلاتىن بوس جۇمىس ورىندارى، حالىقتىڭ ەڭبەك موبيلدىلىگى باعدارلامالارى اياسىندا جۇمىسپەن قامتۋدىڭ ناقتى شارالارى بەكىتىلگەن.
وڭىرلىك جۇمىسپەن قامتۋ كارتالارى شەڭبەرىندە وسى جىلعا 947 مىڭنان استام ازاماتتى جۇمىسپەن قامتۋ بويىنشا شارالار كوزدەلگەن. 9 ايدىڭ قورىتىندىسى بويىنشا 734 مىڭ ادام جۇمىسقا ورنالاستىرىلدى، بۇل جىلدىق كورسەتكىشتىڭ 77%-ىن قۇرايدى. ولاردىڭ ىشىندە جاستاردىڭ ۇلەسى 50% - عا جەتەدى. قازىرگى ۋاقىتتا جۇمىسقا ورنالاستىرىلعان ازاماتتاردىڭ 76%-ى ءۇشىن زەينەتاقى اۋدارىمدارى اۋدارىلۋدا، بۇل ولاردىڭ تۇراقتى تۇردە جۇمىس ىستەپ جاتقاندارىن راستايدى»، – دەدى مينيستر.
ول جۇمىسپەن قامتۋعا جاردەمدەسۋدىڭ نەگىزگى شارالارى تۋرالى ەگجەي-تەگجەيلى ايتىپ بەردى.
ۇلتتىق جوبالاردى ىسكە اسىرۋ اياسىندا 45 مىڭنان استام جاڭا جۇمىس ورنى قۇرىلدى. جۇمىس ورىندارىنىڭ باسىم كوپشىلىگى «قۋاتتى وڭىرلەر – ەل دامۋىنىڭ درايۆەرى» – 13 098، «كاسىپكەرلىكتى دامىتۋ» – 11 489، «اگروونەركاسىپ كەشەنىن دامىتۋ» – 6 354 ۇلتتىق جوبالارى شەڭبەرىندە اشىلادى.
ۇلتتىق جوبالار اياسىندا جۇمىسقا ورنالاستىرىلعان ازاماتتاردىڭ 45%-ىن جاستار (20 573 ادام) مەن مۇگەدەكتىگى بار ادامدار (1 961 ادام) قۇراۋدا.
«توعىز ايدىڭ قورىتىندىسى بويىنشا 228،7 مىڭ ادام جۇمىس بەرۋشىلەر ۇسىنعان ورىندارىنا ورنالاستىرىلدى. ونىڭ 62%-ى اۋىل شارۋاشىلىعى جانە بالىق شارۋاشىلىعى، قۇرىلىس جانە ءوندىرىس، ءبىلىم بەرۋ، دەنساۋلىق ساقتاۋ جانە الەۋمەتتىك قىزمەت كورسەتۋ سالالارىندا جۇمىسپەن قامتىلىپ وتىر. تۇراقتى جۇمىسقا ورنالاستىرىلعان ازاماتتاردىڭ 46%-ى جاستار»، – دەدى سۆەتلانا جاقىپوۆا.
مەملەكەت باسشىسىنىڭ ءاربىر 10 مىڭ حالىققا 100 جاڭا جۇمىس ورنىن قۇرۋ جونىندەگى باستاماسىن ىسكە اسىرۋ اياسىندا 212،9 مىڭ كاسىپكەرلىك سۋبەكتىسىندە 278،5 مىڭنان استام ازامات جۇمىسقا ورنالاستىرىلدى. جۇمىسپەن قامتىلعان ادامداردىڭ 4 مىڭنان استامى مۇگەدەكتىگى بار ازاماتتاردىڭ قاتارىنان بولسا، 161 مىڭنان استامى جاستاردىڭ قاتارىنان بولىپ وتىر.
مەملەكەت سۋبسيديالايتىن جۇمىس ورىندارىنا 181،5 مىڭ ازامات جۇمىسقا ورنالاستىرىلدى، ونىڭ 44% - ىن جاستار قۇرايدى. ونىڭ ىشىندە قوعامدىق جۇمىستارعا – 114 843، الەۋمەتتىك جۇمىس ورىندارىنا – 16 908، جاستار پراكتيكاسىنا – 27 456، «كۇمىس جاس» – 14 027، «العاشقى جۇمىس ورنى» – 7 859، «ۇرپاقتار كەلىسىمشارتى» جوبالارى اياسىندا – 406 ازامات جۇمىسپەن قامتىلدى.
«جۇمىسپەن قامتىلعان ازاماتتاردىڭ جالپى سانىنىڭ 50%-عا جۋىعى (365،8 مىڭ) 35 جاسقا دەيىنگى جاستار. سونىمەن بىرگە جۇمىسپەن قامتىلعانداردىڭ باسىم كوپشىلىگى (49%) تۇركىستان (15%)، جامبىل (9%)، اقتوبە (7%)، الماتى، قاراعاندى جانە قىزىلوردا وبلىستارىنىڭ (6%) ازاماتتارى.
سونداي-اق، جاسالىپ جاتقان جۇمىس ناتيجەسىندە جۇمىسپەن قامتىلعان ازاماتتاردىڭ 67 پايىزىنىڭ (490 مىڭ) وتباسى قۇرامىندا كەمىندە ءبىر ادام جۇمىس ىستەي باستادى، 244 مىڭ ازاماتتىڭ وتباسى قۇرامىندا ەكى جانە ودان دا كوپ ادام جۇمىس ىستەيدى. جۇمىسپەن قامتىلعان ازاماتتاردىڭ 51%-ى اۋىل تۇرعىندارى»، – دەدى سۆەتلانا جاقىپوۆا.
سونداي-اق، مينيستر مەملەكەت باسشىسىنىڭ تاپسىرماسىن ىسكە اسىرۋ اياسىندا جاستارعا ميكروكرەديت بەرۋ جۇمىستارى جۇرگىزىلىپ جاتقانىن ايتتى. بۇگىنگى تاڭدا 7 116 ءوتىنىم قابىلداندى، ونىڭ ىشىندە جالپى سوماسى 21،3 ملرد تەڭگەگە 4 734 ميكروكرەديت بەرىلدى.
بۇدان باسقا 418 بيزنەس-جوبا وڭىرلىك كوميسسيالاردىڭ قاراۋىندا جانە 637 ءوتىنىم اگروكرەديتتىك كورپوراسيانىڭ وڭىرلىك فيليالدارىنىڭ قاراۋىندا.
«جۇمىسپەن قامتۋعا جاردەمدەسۋدىڭ بەلسەندى شارالارىنىڭ كەلەسى باعىتى مەملەكەتتىك گرانتتار بەرۋ بولىپ تابىلادى. العاشقى ەكى لەكتىڭ ناتيجەسىندە حالىقتىڭ وسال توپتارى اراسىنان 5 316 ازامات گرانت الدى. جالپى رەسپۋبليكا بويىنشا گرانت الۋشىلاردىڭ باسىم كوپشىلىگى كوپ بالالى وتباسىلاردىڭ قاتارىنان – 2899 گرانت، مۇگەدەكتىگى بار ازاماتتاردىڭ قاتارىنان 1038 ادام، مۇگەدەكتىگى بار بالانى قاراۋشىلار قاتارىنان 631 ادام، اتاۋلى الەۋمەتتىك كومەك الۋشى 365 ادام ەكەندىگىن اتاپ ءوتۋ قاجەت.
2 062 ادام تەحنولوگيالىق جابدىقتى ساتىپ الۋ ءۇشىن، 1 568 ادام – ءىرى جانە ۇساق مال ساتىپ الۋ ماقساتىندا، 957 ادام – ەڭبەك قۇرال سايماندارىن ساتىپ الۋ ءۇشىن گرانتتار الدى»، – دەدى سۆەتلانا جاقىپوۆا.
ەحاقم باسشىسى قازاقستان رەسپۋبليكاسىنىڭ كوشى-قون ساياساتىنىڭ جاڭا تۇجىرىمداماسىنا سايكەس ازاماتتاردى ەڭبەك كۇشى ارتىق وڭىرلەردەن ەڭبەك كۇشى تاپشى وڭىرلەرگە كوشىرۋ تەتىگى قايتا قارالعانىن ايتتى.
«قونىس اۋدارۋدى ىنتالاندىرۋ ءۇشىن جۇمىس بەرۋشى راستاعان جۇمىس ورنى بولعان كەزدە جاڭا ورىنداعى تۇرعىن ءۇي قۇنىنىڭ 50% مولشەرىندە قارجىلىق كومەك الۋعا قۇقىق بەرەتىن ەكونوميكالىق ۇتقىرلىق سەرتيفيكاتى ەنگىزىلدى. وسىعىن وراي قازىرگى تاڭدا 7،5 مىڭ. ادام سولتۇستىك جانە شىعىس وڭىرلەرگە قونىس اۋداردى، نەمەسە جىلدىق جوسپاردىڭ 87%-ى ورىندالدى. ىشكى قونىس اۋدارۋشىلار نەگىزىنەن تۇركىستان جانە الماتى وبلىستارىنىڭ بۇرىنعى تۇرعىندارى.
كوشىپ كەلگەن ەڭبەككە قابىلەتتى ازاماتتاردىڭ 73%-ى جۇمىسپەن قامتۋ شارالارىمەن قامتىلدى، 5،2 مىڭ ادام كوشۋ شىعىستارىن وتەۋ ءۇشىن ءبىر جولعى ءبىر ماتەريالدىق كومەك الدى. 622 وتباسى ەكونوميكالىق ۇتقىرلىق سەرتيفيكاتىن الدى، 395 وتباسى سولتۇستىك وڭىرلەردە تۇرعىن ۇيمەن قامتاماسىز ەتىلدى»، – دەپ تۇيىندەدى ءسوز سوڭىن سۆەتلانا جاقىپوۆا.