قازاقستاندا 800 مەكتەپ كىتاپحاناسىنىڭ مودەرنيزاسياسى اياقتالىپ، 280 مىڭنان استام بالا جاڭارتىلعان رەسۋرستارعا قول جەتكىزدى، دەپ حابارلايدى aqshamnews.kz.
بۇل تۋرالى ق ر وقۋ-اعارتۋ مينيسترلىگىنىڭ باسپا ءسوز قىزمەتى مالىمدەيدى.
مەكتەپ كىتاپحانالارىنىڭ ماتەريالدىق-تەحنيكالىق بازاسىن نىعايتۋ 1000 اۋىل مەكتەبىن مودەرنيزاسيالاۋ باعدارلاماسىنىڭ ءبىر بولىگى بولىپ تابىلادى.
«مەملەكەت جىل سايىن مەكتەپ ينفراقۇرىلىمىن جاقسارتۋعا قاراجات بولەدى. بيىل مودەرنيزاسيا اياسىندا 800 مەكتەپ كىتاپحاناسى جاڭارتىلىپ، ولاردىڭ قورى جاڭا كوركەم ادەبيەتپەن تولىقتىرىلدى. سونىمەن قاتار، كىتاپحانالارداعى جيھازدار جاڭارتىلدى»، — دەپ اتاپ ءوتتى ينفراقۇرىلىمدى دامىتۋ دەپارتامەنتى ديرەكتورىنىڭ ورىنباسارى روزا سەمبايەۆا.
بۇدان بولەك، «بالالار كىتاپحاناسى» جوباسى اياسىندا مەكتەپ كىتاپحانالارىن دامىتۋ جانە وقۋشىلاردىڭ كىتاپ وقۋعا دەگەن قىزىعۋشىلىعىن ارتتىرۋ باعىتىندا جۇيەلى جۇمىستار جۇرگىزىلۋدە. بۇگىنگى تاڭدا مەكتەپ كىتاپحانالارىنىڭ قورىنا 1،6 ميلليون دانا كوركەم ادەبيەت قوسىلىپ، جالپى كىتاپ قورى 141 ميلليوننان استى.
سونداي-اق، مەكتەپ كىتاپحاناشىلارىنىڭ بىلىكتىلىگىن ارتتىرۋعا ەرەكشە كوڭىل بولىنۋدە. 2024 جىلى 1 775 مامان ارنايى كۋرستان ءوتتى، ونىڭ ىشىندە 1 239-ى مەكتەپ كىتاپحاناشىسى، 536-سى كوللەدج كىتاپحاناشىسى. بۇل شارا كىتاپحانا قىزمەتكەرلەرىنىڭ كاسىبي دەڭگەيىن كوتەرىپ، ولاردىڭ جۇمىس ساپاسىن جاقسارتۋعا ىقپال ەتەدى.
