Atamnyn Amanaty قوعامدىق بىرلەستىگى ۇلى وتان سوعىسىنىڭ مايدان دالاسىندا قازا تاپقان كادىربەك داۋلەتقۇلوۆتىڭ سۇيەگىن كىندىك قانى تامعان تۋعان جەرىنە قايتا جەرلەۋ ءۇشىن جامبىل وبلىسىنا جەتكىزدى. بۇل ءۇشىن قازاقستان قارۋلى كۇشتەرى اۋە قورعانىسى كۇشتەرىنىڭ اسكەري-كولىكتىك ۇشاعى ارنايى رەيستى جۇزەگە اسىردى.
قازاقستاندىق جاۋىنگەردىڭ سۇيەگىن قارسى الۋعا ارنالعان ءراسىم تاراز قالاسى اۋەايلاعىنىڭ اسكەري سەكتورىندا اسكەري وركەستردىڭ ورىنداۋىنداعى مارشتىڭ سۇيەمەلدەۋىمەن بارلىق اسكەري راسىمدەردى ساقتاي وتىرىپ ۇيىمداستىرىلدى، دەپ حابارلايدى اlmaty-akshamy.kz.
ءىس-شاراعا جامبىل وبلىسىنىڭ قورعانىس ىستەرى جونىندەگى دەپارتامەنتىنىڭ، «وڭتۇستىك» وڭىرلىك قولباسشىلىعى اسكەرلەرىنىڭ جانە ارداگەرلەر ۇيىمدارىنىڭ وكىلدەرى قاتىستى.
جامبىل وبلىسىنىڭ تۋماسى كادىربەك داۋلەتقۇلوۆتىڭ سۇيەگىن 2023 جىلدىڭ قاراشا ايىندا رەسەيدىڭ «اۋليە يليا مۋرومەس زاستاۆاسى» ىزدەۋ جاساعى تاپقان بولاتىن. ىزدەۋشىلەر سۇيەكتىڭ كىمگە تيەسىلى ەكەنىن مەدالونداعى دەرەكتەر ارقىلى انىقتاي العان.
– كادىربەك داۋلەتقۇلوۆ تۋرالى كوپتەگەن اسكەري اقپارات قۇپيا. ويتكەنى ول كەڭەس ارمياسى قاتارىندا شەكاراشى قىزمەتىن اتقارعان، – دەپ اتاپ ءوتتى Atamnyn Amanaty قوعامدىق بىرلەستىگىنىڭ وكىلى ابۋباكىر سمايىلوۆ. – ونىڭ 1920 جىلى جامبىل وبلىسىندا تۋعانى، 1943 جىلدىڭ جازىندا كۋرسك دوعاسىنداعى قاندى شايقاستا قازا تاپقانى بەلگىلى.
قوعامدىق بىرلەستىك وكىلدەرى انىقتاعانداي، كادىربەك داۋلەتقۇلوۆ ۇيلەنبەگەن. قازا تاپقان جاۋىنگەردىڭ جامبىل وبلىسىندا تۇرعان اعاسىنىڭ ۇرپاقتارى تابىلدى. تۋعان جەرى – تۇرار رىسقۇلوۆ اۋدانىندا جەر قوينىنا تاپسىرۋ ءۇشىن ساربازدىڭ سۇيەگى تۋىستارىنا تاپسىرىلدى. سونداي-اق ونىڭ مەدالونى، كاسكاسى، ساپەر كۇرەگى جانە سارباز كرۋجكاسى دا اعايىندارىنا بەرىلدى.
جاۋىنگەردىڭ سۇيەگىن تاپسىرۋ ءراسىمى جەڭىس قالالىق ساياباعىندا ورنالاسقان «داڭق» جاۋىنگەرلىك داڭق زالىندا جالعاستى. وڭتۇستىك ءوڭىردىڭ اسكەري قىزمەتشىلەرى مەن قۇرمەتتى قاراۋىل روتاسىنىڭ ساربازدارى سوڭعى قۇرمەت كورسەتتى. كادىربەك داۋلەتقۇلوۆتىڭ تۋىستارى ءىس-شارانى ۇيىمداستىرۋشىلارعا شىنايى العىسىن جەتكىزدى.
– سوعىس باستالعاندا كادىربەك اعامىز نەبارى 21 جاستا ەكەن. ول، ءتىپتى، شاڭىراق كوتەرىپ تە ۇلگەرمەپتى، – دەدى جاۋىنگەردىڭ نەمەرە قارىنداسى ورازكۇل داۋلەتقۇلوۆا. – الايدا ءبىز ول كىسى تۋرالى ۇزدىكسىز اقپارات ىزدەگەن تۋىستارىمىزدان بىلەتىن ەدىك. ەندى، مىنە، 80 جىلدان سوڭ تۋىسقانىمىزدىڭ سۇيەگى تۋعان وتانىنا ورالىپ وتىر. ءبىز ىزدەستىرۋ ۇيىمدارىنا، سونداي-اق اعامىزدىڭ سۇيەگىن تۋعان جەرىنە جەتكىزگەن اسكەري قىزمەتشىلەرگە ريزامىز.
Atamnyn Amanaty قوعامدىق بىرلەستىگى 2019 جىلدان باستاپ ۇلى وتان سوعىسى جىلدارىندا قازا تاپقان قازاقستاندىق جاۋىنگەرلەردى جۇيەلى تۇردە ىزدەۋمەن جانە جەرلەۋمەن اينالىسىپ كەلەدى. قوعامدىق بىرلەستىك وسى ۋاقىتقا دەيىن قورعانىس مينيسترلىگىمەن بىرلەسىپ 19 ساربازدىڭ سۇيەگىن ەلىمىزگە جەتكىزىپ، قايتا جەرلەۋدى ۇيىمداستىردى.