تورونتو اۋەجايىندا Delta Air Lines ۇشاعى اۋدارىلىپ، 15 ادام زارداپ شەكتى.
كاناداداعى تورونتو قالاسىندا ورنالاسقان لەستەر ب. پيرسون اتىنداعى حالىقارالىق اۋەجايدا Delta Air Lines اۋەكومپانياسىنا تيەسىلى جولاۋشىلار ۇشاعى قونۋ كەزىندە اۋدارىلىپ قالدى. وقيعا سالدارىنان كەمىندە 15 ادام جاراقات العان، دەپ حابارلايدى aqshamnews.kz.
New York Post باسىلىمىنىڭ حابارلاۋىنشا، توتەنشە جاعداي قىزمەتكەرلەرى وقيعاعا جەدەل ارەكەت ەتكەن. ميننەاپوليستەن كەلگەن ۇشاق قالىڭ قار باسقان ۇشۋ-قونۋ جولاعىندا اۋدارىلعان. الەۋمەتتىك جەلىلەردە تاراعان سۋرەتتەر مەن ۆيدەولاردان اۋە كەمەسىنىڭ قاتتى زاقىمدانعانى بايقالادى.
كانادالىق CP24 تەلەارناسىنىڭ مالىمەتىنشە، جاراقات العانداردىڭ ىشىندە ءۇش ادامنىڭ جاعدايى اۋىر، ولاردىڭ ءبىرى – بالا. قالعان 12 ادامنىڭ جاراقاتتارى جەڭىل دەپ باعالانعان. بارلىق زارداپ شەككەندەر دەرەۋ اۋرۋحاناعا جەتكىزىلدى.
جاريالانعان كادرلاردان ۇشاقتىڭ ءبىر قاناتى ايتارلىقتاي مايىسقانى، ال قۇيرىق بولىگىنىڭ ءىشىنارا زاقىمدانعانى كورىنەدى. وقيعا قارلى داۋىل كەزىندە ورىن العان. دەمالىس كۇندەرى جاۋعان قالىڭ قار سالدارىنان اۋەجاي قىزمەتكەرلەرى ءتۇن بويى ۇشۋ-قونۋ جولاعىن تازالاۋ جۇمىستارىن جۇرگىزگەن.
اۋەجاي اكىمشىلىگىنىڭ حابارلاۋىنشا، اپاتتان كەيىن اۋە ايلاعىنداعى بارلىق رەيستەر ۋاقىتشا توقتاتىلدى.