ماماندار اتا-انالاردى بالالاردى قاراۋسىز قالدىرماۋعا شاقىردى.
استانادا 8ء-شى قاباتتاعى تەرەزەدەن سالبىراپ تۇرعان بالانى قۇتقارىپ قالعان ءسابيت شونتاقبايەۆ «توتەنشە جاعدايداعى ەرلىگى ءۇشىن» توسبەلگىسىمەن ماراپاتتالدى، دەپ حابارلايدى Almaty-akshamy.kz
«تج ءبىرىنشى ۆيسە-مينيسترى گەنەرال-لەيتەنانت كۇلشىمبايەۆ يبراگيم باتىر ازامات شونتاقبايەۆ ءسابيتتى «توتەنشە جاعدايداعى ەرلىگى ءۇشىن» توسبەلگىسىمەن ماراپاتتادى. ول ەلوردادا بالانى تەرەزەدەن قۇلاۋدان قۇتقاردى» دەلىنگەن تجم باسپا ءسوز قىزمەتىنىڭ حابارلاماسىندا.
مالىمەتكە ساي، 11 مامىر كۇنى ساعات 10:21-دە «ۇلى دالا كوشەسى، 27/1» مەكەنجايىنداعى ءۇيدىڭ 8-قاباتىنداعى تەرەزەدە بالانىڭ ءىلىنىپ تۇرعانى تۋرالى حابارلاما كەلىپ تۇسكەن. شاقىرتۋ ورنىنا جەكە قۇرامنان 7 ادام جانە 2 بىرلىك تەحنيكادان تۇراتىن نۇر-سۇلتان قالاسىنىڭ تجد بولىمشەلەرى جەدەل جىبەرىلگەن.
قۇتقارۋشىلار وقيعا ورنىنا كەلگەن كەزدە سەگىزىنشى قاباتتاعى بالكوننىڭ كارنيزىنە ىلىنگەن بالانى ەر ادام قۇتقارعانى انىقتالدى.
«2019 جىلى تۋعان قىز بالا تەرەزەدەن اۋىپ كەتكەن كەزدە ۇيدە ەشكىم بولماعان. قۋانتارلىعى، ءبىزدىڭ كەيىپكەرىمىز — 1985 جىلى تۋعان ءسابيت شونتاقبايەۆ، ونى قۇتقارىپ قالدى. قۇرمەتتى اتا-انالار، بۇل بالا امان-ەسەن قۇتقارىلعان ءساتتى وقيعا، ءبىراق قايعىلى ناتيجە بەرەتىن كوپتەگەن فاكتىلەر بار. بالالاردى قاراۋسىز قالدىرماڭىزدار! ەگەر ۇيدە كىشكەنتاي بالا بولسا، تەرەزەنى اشىق قالدىرماڭىزدار!»،- دەپ تۇيىندەلگەن تجم حابارلاماسى.
