جاڭا مارتەبە ەرەكشە جاۋاپكەرشىلىك جۇكتەيدى. 8 ماۋسىمنان باستاپ قونايەۆ رەسمي تۇردە وبلىس ورتالىعى مارتەبەسىن الادى دەپ حابارلايدى Almaty-akshamy.kz 24.kz-كە سىلتەمە جاساپ.
قالا تۇرعىندارى بۇل باستاما العاش جاريالانعان كۇننەن باستاپ، ونىڭ «گۇلدەنۋى مەن دامۋىنا بارىنشا ۇلەس قوسامىز» دەپ بەلسەندىلىك تانىتىپ وتىر. مەملەكەتتىك رامىزدەردىڭ 30 جىلدىعى قونايەۆ قالاسىندا بىردەن بىرنەشە اۋقىمدى شارالارمەن اتاپ ءوتىلدى. كوك تۋىمىز جەردە عانا ەمەس، سۋ ۇستىندە دە جەلبىرەدى. ايتۋلى كۇنگە وراي جەرگىلىكتى ونەرپازدار پاتريوتتىق اندەر شىرقادى. بالالار مەن جاسوسپىرىمدەر سپورتتىق شارالار مەن فلەشموبقا قاتىستى. كەمەگە ەنى 5، ۇزىندىعى 10 مەتر بولاتىن مەملەكەتتىك تۋ ءىلىندى. بۇل جەلكەندى قايىق سپورت فەدەراسياسىنىڭ قونايەۆ قالاسىنىڭ تۇرعىندارىنا رامىزدەر كۇنىنە ارناعان تارتۋى. جانىنا ۇلكەن تۋ تارتىلعان كەمە قاپشاعاي سۋ قويماسىنىڭ ۇستىمەن جەلكەندى قايىقتارمەن بىرگە ءجۇزىپ ءوتتى. بۇل شارانى ۇيىمداستىرۋشىلار رامىزدەرگە دەگەن قۇرمەتتى، ونى ناسيحاتتاۋدى اركىم وزىنەن باستاۋ كەرەك، دەپ سانايدى.
ناتاليا نوسوۆا، قونايەۆ قالاسىنىڭ قۇرمەتتى ازاماتى:
- بۇل شارانى وتكىزۋىمىز تەگىن ەمەس. ءبىزدىڭ قالامىزدى، وسى قاپشاعاي سۋ قويماسىن قونايەۆ سالدىردى. ءبىز ول كىسىنىڭ اتىنا كىر كەلتىرمەي، ەسىمىن قۇرمەتپەن الىپ جۇرەمىز دەپ ايتا الامىن. سەبەبى قالانىڭ اتى دا، ءوزى دە ءبىزدىڭ جۇرەگىمىزگە ىستىق. جانىمىزعا جاقىن.
شاھار 50 جىلدان استام قاپشاعاي اتالىپ كەلدى. پرەزيدەنت جارلىعىمەن وعان كورنەكتى مەملەكەت جانە قوعام قايراتكەرى دىنمۇحاممەد قونايەۆتىڭ ەسىمى بەرىلگەندە مۇنداعى جۇرتشىلىق قاتتى قۋاندى. ەسكە سالا كەتەيىك، بۇل ەلدى مەكەن قازاقستان كارتاسىندا 1970 جىلى پايدا بولدى. ونىڭ ىرگەتەسىن قالاعان قونايەۆ بولاتىن. ءقازىر مۇندا جاسالىپ جاتقان تابيعي گاز تارتۋ، كوشە جولدارى مەن اۋلالاردى جوندەۋ، جالپى تۇرعىن ءۇي سەكتورىن جاڭعىرتۋ جۇمىستارى ۇلكەن ءىستىڭ باسى عانا.
سەرگەي گوريۋنوۆ، قالالىق ءماسليحاتتىڭ دەپۋتاتى:
- مەملەكەتتىك باعدارلاما بويىنشا 10 ءۇي سالىنادى. سونىمەن قوسا الداعى جىلدارى10 شاعىن اۋدان جاڭادان بوي كوتەرەدى. بۇل شامامەن 60 مىڭ وتباسى باسپانالى بولادى دەگەندى بىلدىرەدى.
قالادا تۋريزم يندۋسترياسىن دامىتۋعا مۇكىندىك كوپ. بىلتىر قاپشاعاي سۋ قويماسىنىڭ جاعاسىندا 126 نىسان ءجۇمىس ىستەپ، ول جەردە 900 مىڭنان اسا ادام دەامالعان. ال بيىل تۋريستىك نىساندار سانى تاعى ونعا ارتتى. وسى جىلى مۇندا ميلليوننان ارتىق دەمالۋشى كەلەدى دەگەن جوسپار بار. مەملەكەت باسشىسىنىڭ جارلىعىنا سايكەس، 8 ماۋسىمنان باستاپ قونايەۆ رەسمي تۇردە الماتى وبلىسىنىڭ اكىمشىلىك ورتالىعىنا اينالادى. وسى كۇنگە رامىزدەر كۇنى دە تۇسپا-تۇس كەلىپ وتىر. سوعان وراي مەرەكەلىك باعدارلاما ۇيىمداستىرىلدى. ورتالىق ساياباقتا وتكەن بۇل شارا كونايەۆ قالاسىنىڭ تۇرعىندارى مەن قوناقتارىنا ەرەكشە كوڭىل-كۇي سىيلادى. مەرەكەلىك باعدارلاما شىعارماشىلىق ۇجىمدار مەن تالانتتاردىڭ باسىن قوستى. كونسەرتپەن قوسا جاس سپورتشىلار مەن مەكتەپ وقۋشىلارى سالاۋاتتى ءومىر سالتىن فلەشموب وتكىزىپ ناسيحاتتادى.
ءقازىر قونايەۆتاعى حالىق سانى ماڭىنداعى ەكى اۋىلدىق وكرۋگتىڭ تۇرعىندارىن قوسقاندا 62 مىڭنان استى. وبلىس ورتالىعى مارتەبەسىنە يە بولۋىنا باينالىستى الداعى ۋاقىتتا بۇل كورسەتكىش 10 ەسەگە كوبەيەدى، دەگەن جوسپار بار.