ساياحاتشى جاياۋ مارافونىن 31 ناۋرىزدا باستاعان بولاتىن
ۇلىتاۋ وبلىسىنىڭ 72 جاستاعى ساياحاتشىسى سارسەنباي قوتىراشوۆ ماڭعىستاۋ وبلىسىنىڭ بەينەۋ اۋدانىنا جاياۋ جەتتى. ونى ماڭعىستاۋلىق جول ساقشىلارى قارسى الدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«اقساقالدى بەينەۋ-بورانقۇل تاسجولىندا پاترۋلدىك پوليسيا روتاسىنىڭ قىزمەتكەرلەرى ن.شىڭعىس پەن ق.ءپىرجانوۆ قارسى الدى. ولار ساياحاتشىنىڭ قال-جاعدايىن ءبىلىپ، الداعى ساپارىنا ساتتىلىك تىلەپ شىعارىپ سالدى»، - دەپ ءمالىم ەتتى ماڭعىستاۋ وبلىسى پوليسيا دەپارتامەنتىنەن.
ۇلىتاۋ ۇلتتىق تاريحي-مادەني جانە تابيعي مۇراجاي-قورىعىنىڭ قىزمەتكەرى جانە ەڭبەك ارداگەرى سارسەنباي قوتىراشوۆ ەل وڭىرلەرى بويىنشا جاياۋ مارافونىن 31 ناۋرىزدا باستاعان بولاتىن. 72 جاستاعى اقساقال قاراشا ايىنا دەيىن بۇكىل ەلدى ارالاپ شىقپاق.
ۇلىتاۋدان شىققان قاريا 13 كۇندە قىزىلورداعا جەتتى. 11 مامىردا 1 700 شاقىرىمدى ارتقا تاستاپ، الماتى قالاسىنا كەلدى. كەيىن توعىزىنشى ءوڭىر – پاۆلودار وبلىسىنا ايالدادى. 60 كەلىلىك ارباسىن سۇيرەگەن ساياحاتشى شىلدە ايىنىڭ باسىندا استانا قالاسىنا جەتتى. ودان ءارى جاياۋ مارافونشى 4،5 مىڭ شاقىرىمدى ارتقا تاستاپ، پەتروپاۆلعا ات باسىن تىرەدى. تىلشىلەرگە سۇحبات بەرگەن ول ءۇش اي بويى 12 وبلىستى، 15 قالانى ارالاپ وتكەنىن ايتتى. جولدا التى اياق كيىم اۋىستىرعان. الدا 5 وبلىس – 3،5 مىڭ شاقىرىمدى ەڭسەرۋى كەرەكتىگىن جەتكىزدى.
قاريا بۇل ساپارىن التى جىل بۇرىن جوسپارلاعان. ساياحاتشىنىڭ ەڭ سوڭعى توقتالاتىن نۇكتەسى اقتاۋ قالاسى بولماق.