7 وبلىستا 3 745 جەر ءۇي سۋ استىندا قالدى. بۇل تۋرالى تجم ازاماتتىق قورعانىس جانە اسكەري بولىمدەر كوميتەتىنىڭ اعا وفيسەرى ەراسىل سايپاش ايتتى، دەپ حابارلايدى اlmaty-akshamy.kz.
«سۋ تاسقىنى باستالعالى بەرى 75 982 ادام، ونىڭ ىشىندە 18 681 بالا قۇتقارىلدى. تارتىلعان اۋە كەمەلەرىنىڭ كومەگىمەن 2 811 ادام، ونىڭ ىشىندە 865 بالا قۇتقارىلدى. ۋاقىتشا ورنالاسۋ پۋنكتتەرىنە 7 مىنان استام ادام، ونىڭ ىشىندە 2 794 بالا ورنالاستىرىلدى. 69 971 جانۋار قاۋىپسىزدىك جەرگە ايدالدى. زارداپ شەككەن وڭىرلەرگە 126 توننا گۋمانيتارلىق كومەك جەتكىزىلدى. بىرلەسكەن كۇشتەرمەن 7،7 ملن استام تەكشە مەتر ەرىگەن قار سۋى سورىلدى. 993 مىڭ قاپشىق جانە 982 مىڭ توننا ينەرتتى ماتەريال توسەلدى. 1 739 تۇرعىن ءۇي مەن 1 743 اۋلا اۋماعىنان سۋ بۇرىلدى»،- دەدى ول ورتالىق كوممۋنيكاسيالار قىزمەتىندەگى بريفينگتە.
ونىڭ دەرەگىنشە، تاۋلىك بويى اۆاريالىق-قۇتقارۋ جۇمىستارىنا 16 375 ادام، 1 651 تەحنيكا، 377 سۋ سورۋ جانە 81 ءجۇزۋ قۇرالى، 15 اۋە كەمەسى جۇمىلدىرىلدى.
«وسى ساعاتتا اتىراۋ، اقتوبە، اقمولا، قوستاناي، شىعىس قازاقستان، سولتۇستىك قازاقستان جانە پاۆلودار وبلىستارىندا 3 745 جەر ءۇي، 421 اۋلا اۋماعى سۋ استىندا قالۋدا. سۋ شايعان 105 اۆتوجول، ونىڭ ىشىندە 4 كوپىر مەن 101 جول توسەمى باقىلاۋدا تۇر. كولىك قاتىناسىنسىز قالعان 65 ەلدى مەكەن باقىلاۋدا. اتىراۋ، اقتوبە، اقمولا، قوستاناي، شىعىس قازاقستان، سولتۇستىك قازاقستان جانە پاۆلودار وبلىستارى رەسپۋبليكالىق شتابتىڭ باقىلاۋىندا. «جەدەل جەلى» تەلەفونىنا 1 052 قوڭىراۋ ءتۇستى. رەسپۋبليكالىق جانە جەدەل شتابتار جۇمىس ىستەيدى. بارلىق كۇشتەر مەن قۇرالدار توتەنشە جاعدايلاردىڭ الدىن الۋ مەن جويۋعا جۇمىلدىرىلدى. جاعداي كۇردەلەنەتىن بولسا، شۇعىل شارالار قابىلدانادى»، - دەدى ەراسىل سايپاش.
سۋ باسقان ايماقتى ينسپەكسيالاۋ بارىسىندا پرەمەر-مينيستردىڭ ءبىرىنشى ورىنباسارى رومان سكليار سولتۇستىك قازاقستان وبلىسى تايىنشا اۋدانى كراسنايا پوليانا اۋلىنىڭ تۇرعىندارىمەن كەزدەستى، وندا 8 ءۇي سۋ استىندا قالدى.
جەرگىلىكتى تۇرعىندارمەن اڭگىمەلەسۋ بارىسىندا ءبىرىنشى ۆيسە-پرەمەر زارداپ شەككەندەرگە كەلتىرىلگەن بارلىق زالال وتەلەتىنىن، ماتەريالدىق شىعىندى مەملەكەت جاباتىنىن مالىمدەدى.