وسىدان ءتورت جىل بۇرىن سالىق كودەكسىندە ورتاق يپوتەكاعا ارنالعان سالىق شەگەرىمدەرىنىڭ كۇشىنە ەنۋى 2025 جىلعا دەيىن كەيىنگە قالدىرىلعان بولاتىن. ول ۋاقىتتا شەگەرىم تەك تۇرعىن ءۇي قۇرىلىس جيناق جۇيەسى بويىنشا جۇمىس ىستەپ تۇردى. ەندى، 2025 جىلدىڭ 1 قاڭتارىنان بەرى شەگەرىم بارلىق يپوتەكانى قامتيدى. ونىڭ ىشىندە "7-20-25" پەن "باسپانا حيت" يپوتەكالارى دا بار.
شەگەرىم سىزگە ايلىقتان تولەنەتىن جەكە تابىس سالىق مولشەرىن قىسقارتىپ، قولىڭىزعا كوبىرەك جالاقى الۋعا مۇمكىندىك بەرەدى. ءسال دە بولسا ۇنەمدەيسىز.
اي سايىن يپوتەكاعا تولەيتىن سومانىڭ ىشىندەگى بانك پروسەنتى وسى شەگەرىم ىشىنە كىرەدى. مىسالى، ءسىزدىڭ جالاقىڭىز (وكلاد) 400 000 تەڭگەنى قۇرايدى دەيىك. ودان الىناتىن زەيناتاقى جارناسىن ەسەپتەيىك: 400 000 / 10% = 40 000 تەڭگە. ال سىزدەن الىناتىن جەكە تابىس سالىعى بىلاي ەسەپتەلىنەدى: (جالاقى – زەينەتاقى جارناسى – 1 تومەنگى ايلىق كورسەتكىش) / 10%. تيىسىنشە ول (400 000 – 40 000 – 85 000) / 10% = 27 500 تەڭگە. سوندا 400 مىڭ تەڭگە ايلىعىڭىز بولسا، ءسىز: 27 500 تەڭگە تابىس سالىعىن (يپن) تولەيسىز، 40 000 تەڭگە زەينەتاقى قورىنا كەتەدى، 8 000 تەڭگە وسمس الىنادى. قولىڭىزعا تيەتىنى — 324 500 تەڭگە.
ەندى، ەگەر ءسىز اي سايىن يپوتەكا تولەپ وتىرساڭىز، سالىق شەگەرىمدەرى ارقىلى قانداي سوما ۇنەمدەيتىنىڭىزدى ەسەپتەپ كورەيىك. مىسالى، ءسىز 4 جىل بۇرىن «7-20-25» يپوتەكاسىن العانسىز. ءقازىر تولەپ ءجۇرسىز دەيىك: پاتەر قۇنى — 20 000 000 تەڭگە العاشقى جارنا — 20% — 4 000 000 تەڭگە نەسيە مولشەرى - 16 000 000 تەڭگە تولەم ءتيپى - اننۋيتەت پروسەنتى - 7% نەسيە مەرزىمى — 15 جىل. ايىنا تولەيتىن يپوتەكاڭىز 143 800 تەڭگە. ونىڭ ىشىندە شامامەن قازىرگى ۋاقىتتا (180 ايدىڭ 60 ايى وتكەننەن كەيىن) بانك پروسەنتى 72 000 تەڭگەدەي بولۋى كەرەك. اي سايىن ول شامامەن 450 تەڭگەگە ازايىپ وتىرادى. ەندى سالىق شەگەرىمىن ىسكە قوسساق، قانشا سوما ۇنەمدەيمىز؟ وكلاد – زەيناتاقى جارناسى – 1 تومەنگى ايلىق كورسەتكىش — وسمس — (اي سايىنعى يپوتەكالىق تولەمنىڭ ىشىندەگى بانك سىياقىسى) / 10%، دەمەك (400 000 – 40 000 – 85 000 – 8 000 - 72 000) / 10% = 19 500 تەڭگە. بۇل ءبىز تولەيتىن جەكە تابىس سالىعى. ونىڭ الدىنداعى 27 500 سالىققا قاراعاندا 8 000 تەڭگەگە از. دەمەك قولىمىزعا ەندى 332 500 تەڭگە ءتيىپ وتىرادى. شەگەرىمگە دەيىن قولعا 324 500 الىپ كەلگەن ەدىك. سونىمەن، ەگەر يپوتەكالىق شەگەرىمدەردى ىسكە قوسساق، وندا ءبىز ايىنا ءدال ءقازىر 8 000 تەڭگەدەي ۇنەمدەيمىز.
ءبىراق اي سايىن بانك سىياقىسى 450 تەڭگەگە ازايىپ وتىراتىنىن ەسكەرسەك، ءبىزدىڭ ۇنەمدەۋىمىز دە اي سايىن شامامەن 45 تەڭگەگە قىسقارىپ وتىرادى. ەگەر ءسىز رەسمي ءبىر جەردە جۇمىس ىستەپ، ايلىق الاتىن بولساڭىز جانە "7-20-25" نەمەسە "باسپانا حيت" يپوتەكاسى تولەپ جۇرسەڭىز، وسى قارىز كەلىسىمشارتىن، ونىڭ ىشىندەگى گرافيكتى بىرگە الىپ، ءوز بۋحگالتەرياڭىزعا بارىڭىز. وندا سالىق شەگەرىمىنە ءوتىنىش جازاسىز. بۋحگالتەرىڭىز سىزگە اي سايىن شەگەرىم ەسەپتەپ وتىراتىن بولادى.