«بالقاش جىلۋ» ءجشس-نىڭ لاۋازىمدى تۇلعالارى جالپى سوماسى 677 ملن تەڭگە بيۋدجەت قاراجاتىن جىمقىردى دەگەن كۇدىككە ءىلىندى، دەپ حابارلايدى almaty-akshamy.kz ق ر قارجىلىق مونيتورينگ اگەنتتىگى باسپا ءسوز قىزمەتىنە سىلتەمە جاساپ.
اگەنتتىكتىڭ حابارلاۋىنشا، سوتقا دەيىنگى تەرگەپ-تەكسەرۋدى اگەنتتىكتىڭ قاراعاندى وبلىسى بويىنشا دەپارتامەنتى تىركەدى. بەلگىلى بولعانى «بالقاش جىلۋ» ءجشس-نىڭ بۇرىنعى باسشىلىعى 2020 جىلدىڭ ماۋسىمىنان 2023 جىلدىڭ قاڭتارىنا دەيىنگى ارالىقتا بالقاش جەو جانە بالقاش قالاسىنىڭ جىلۋمەن جابدىقتاۋ جەلىلەرىن جوندەۋگە جانە كۇتىپ ۇستاۋعا ارنالعان 677 ملن تەڭگە كولەمىندە بيۋدجەت قاراجاتىن جەكە شوتتارى مەن جالعان كاسىپورىنداردىڭ شوتتارىنا جىبەرۋ ارقىلى جىمقىرعان.
اتالعان تۇلعالار ۇستالىپ، تەرگەۋ يزولياتورىنا قامالدى. تەرگەۋ سۋدياسى ەكى اي مەرزىمگە «قاماۋ» شاراسىن سانكسيالادى.
«تەرگەۋ جالعاسۋدا. ق ر قپك 201-بابىنا سايكەس وزگە دە مالىمەتتەر جاريا ەتىلۋگە جاتپايدى»،-دەلىنگەن حابارلامادا.
ق ر كونستيتۋسياسىنىڭ 77-بابىنىڭ 3-تارماعىنىڭ 1-تارماقشاسىنا جانە ق ر قىلمىستىق-پروسەستىك كودەكسىنىڭ 19-بابىنىڭ 1-بولىگىنە سايكەس، قىلمىستىق قۇقىق بۇزۋشىلىق جاساۋداعى كىناسى سوتتىڭ زاڭدى كۇشىنە ەنگەن ۇكىمىمەن بەلگىلەنگەنگە دەيىن اركىم كىناسىز دەپ ەسەپتەلەدى.