جىل سايىن 50 مىڭ ازامات جاڭادان كەزەككە تۇرادى.
جىل سايىن باسپانا كەزەگىندەگى 20 مىڭ ادام ءۇيلى بولسا، ولاردىڭ ورنىنا 50 مىڭ ازامات جاڭادان كەزەككە تۇرادى. يندۋستريا جانە ينفراقۇرىلىمدىق دامۋ ءمينيسترىنىڭ ورىنباسارى ەركەبۇلان داۋىلبايەۆ سەناتتىڭ ۇكىمەت ساعاتىندا وسىنداي دەرەك ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«بۇگىندە اكىمدىكتەردە 623 مىڭ ازامات كەزەكتە تۇر. ونىڭ 400 مىڭنان استامى حالىقتىڭ الەۋمەتتىك جاعىنان وسال توبىنا جاتادى.
بۇل رەتتە، مەملەكەتتىك قولداۋ شارالارى شەڭبەرىندە ءبىر جىلدا نەبارى 20 مىڭ ازامات تۇرعىن ۇيمەن قامتىلادى. ولاردىڭ ورنىنا 50 مىڭ ازامات جاڭادان كەزەككە تۇرادى.
كەزەكتىلىكتىڭ ارتۋى، بيۋدجەتكە ايتارلىقتاي اۋىرتپالىق تۇسىرەدى جانە الەۋمەتتىك تۇرعىن ءۇي قۇرىلىسى مەن جەڭىلدەتىلگەن كرەديت بەرۋ ءۇشىن قوماقتى ينۆەستيسيالاردى، سونداي-اق كوممۋنالدىق تۇرعىن ءۇي قورىن كۇتىپ-ۇستاۋدى قاجەت ەتەدى»، - دەدى ۆيسە-مينيستر.
سونداي-اق، ول كەلەشەكتە باسپانا كەزەگىنە اكىمدىك ارقىلى تۇرۋ پراكتيكاسى جويىلاتىنىن ەسكە سالدى. بۇل قىزمەت تۇگەلدەي «وتباسى بانك» اق-عا بەرىلمەك.