بيىلدان باستاپ زياندى ەڭبەك جاعدايلارىندا ۇزاق ۋاقىت جۇمىس ىستەپ جۇرگەن ازاماتتارعا 55 جاستان باستاپ ارناۋلى الەۋمەتتىك تولەم تولەنەدى.
ايتا كەتەيىك، وتكەن جىلدىڭ 21 جەلتوقسانىندا مەملەكەت باسشىسى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قوعامدىق بىرلەستىكتەر جانە ەڭبەك جاعدايلارى زياندى جۇمىستاردا ىستەيتىن ادامداردى الەۋمەتتىك قورعاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسىنىڭ زاڭىنا قول قويدى. وسى زاڭعا سايكەس، 2024 جىلدىڭ 1 قاڭتارىنان زياندى ەڭبەك جاعدايلارىندا ۇزاق ۋاقىت جۇمىس ىستەپ جۇرگەن ازاماتتارعا 55 جاستان باستاپ ارناۋلى الەۋمەتتىك تولەم ەنگىزىلىپ وتىر.
«زاڭدا كوپ وزگەرىستەر ەنگىزىلەدى. بىرىنشىدەن، ارنايى الەۋمەتتىك تولەم كوپ جىلدار بويى جۇمىس ىستەگەن، 55 جاسقا تولعان جانە 7 جىل بويى وزدەرىنە جيىنتىق جارنالار اۋدارعان ازاماتتارعا تولەنەدى. ارنايى الەۋمەتتىك تولەم ءتورت قاراجات كوزىنەن: رەسپۋبليكالىق بيۋدجەتتەن 2 ەڭ تومەن كۇنكورىس دەڭگەيى مولشەرىندە؛ ءومىردى ساقتاندىرۋ جونىندەگى كومپانيالاردان؛ جۇمىس بەرۋشىلەردىڭ قاراجاتىنان، بجزق-دان مىندەتتى كاسىپتىك زەينەتاقى جارنالارى ەسەبىنەن تولەنەدى»، - دەگەن ەدى ق ر ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا ورتالىق كوممۋنيكاسيالار قىزمەتىندەگى بريفينگتە.
تولەمدەردىڭ ورتاشا مولشەرى 208 مىڭعا جەتەدى جانە 63 جاسقا دەيىن تولەنەدى. ءاربىر جۇمىسكەر ءۇشىن تولەم مولشەرى بجزق-داعى جيناقتارىنا بايلانىستى بولادى.
ارنايى الەۋمەتتىك تولەمدەردى الۋ ءۇشىن ەڭبەك جاعدايلارى زياندى جۇمىستان – دەمالىسقا نەمەسە جەڭىلىرەك جۇمىسقا اۋىسۋى كەرەك. 2024 جىلى ارنايى الەۋمەتتىك تولەمگە 37 مىڭنان استام جۇمىسكەر، 2030 جىلى – 58 مىڭنان استام، 2035 جىلى – 95 مىڭنان استام جۇمىسكەر ۇمىتكەر بولا الادى.