2023 جىلدىڭ باسىنان 2021-2025 جىلدارعا ارنالعان كاسىپكەرلىكتى دامىتۋ جونىندەگى ۇلتتىق جوبا شەڭبەرىندە جاڭا بيزنەس-يدەيالاردى ىسكە اسىرۋ ءۇشىن 5 316 گرانت بەرىلدى.
2023 جىلى بارلىعى 9 000 گرانت بەرۋ جوسپارلانۋدا، دەپ حابارلايدى Almaty-akshamy.kz Astanatv.kz-كە سىلتەمە جاساپ.
ءبىرىنشى جانە ەكىنشى لەك بويىنشا گرانتتار الۋعا وتىنىمدەر وسى جىلعى ناۋرىز جانە مامىر ايلارىندا بەكىتىلگەن كەستەگە سايكەس قابىلداندى.
وسىلايشا، وتكەن ەكى لەك شەڭبەرىندە ۇمىتكەرلەردەن بارلىعى 51،2 مىڭ، ونىڭ ىشىندە كوپبالالى وتباسىلاردان – 30،1 مىڭ، مۇگەدەكتىگى بار ادامداردان – 8،7 مىڭ، مۇگەدەكتىگى بار بالاعا كۇتىم جاسايتىن ادامداردان – 6،1 مىڭ، اتاۋلى الەۋمەتتىك كومەك الۋشىلاردان – 2،7 مىڭ ءوتىنىش قابىلداندى. سونداي-اق، اسىراۋشىسىنان ايىرىلعان 2،01 مىڭ ادام، 160 قانداس جانە 506 قونىس اۋدارۋشى ءوتىنىش بەردى.
وتىنىمدەردىڭ ەڭ كوپ سانى تۇركىستان (11،6 مىڭ) جانە جامبىل (5،5 مىڭ) وبلىستارىنىڭ جانە شىمكەنت قالاسىنىڭ (6 مىڭ)، ەڭ از سانى ۇلىتاۋ (365) جانە اقمولا (611) وبلىستارىنىڭ ۇمىتكەرلەرىنەن كەلىپ ءتۇستى.
مەملەكەتتىك گرانت – نىسانالى ماقساتى جاڭا بيزنەستى باستاۋ جانە دامىتۋ بولىپ تابىلاتىن قايتارىمسىز بەرىلەتىن باستاپقى كاپيتال. گرانت مولشەرى 400 اەك-كە دەيىن (1 380 000 تەڭگە). ءاربىر قاتىسۋشى ونى تەك ءبىر رەت قانا الا الادى.
گرانتتاردى حالىقتى جۇمىسپەن قامتۋ ورتالىقتارى گرانت الۋعا ۇمىتكەرلەردىڭ وتىنىشتەرىن قاراۋ جونىندەگى اۋداندىق/قالالىق كوميسسيانىڭ شەشىمى نەگىزىندە بەرەدى.
ۇمىتكەرلەر وزدەرىنىڭ بيزنەس-جوبالارىن كوميسسيا وتىرىستارىندا تانىستىرادى. كوميسسيا وتىرىسىنىڭ وتكىزىلەتىن ورنى، كۇنى مەن ۋاقىتى تۋرالى حابارلاما Business.enbek.kz پورتالىندا گرانت الۋعا ءوتىنىش بەرۋشىنىڭ جەكە كابينەتىندە كورسەتىلەدى.
بۇل رەتتە كوميسسيانىڭ ءاربىر مۇشەسى بيزنەس-جوسپاردى باعالايدى جانە باعالاۋ پاراعىن مىناداي كريتەرييلەر بويىنشا تولتىرادى: بيزنەس-يدەيانىڭ باسەكەگە قابىلەتتىلىگى، وتكىزۋ نارىقتارىنىڭ پىسىقتالۋى، بيزنەس-جوبانىڭ قارجىلىق ومىرشەڭدىگى، كاسىپكەرلىك داعدىلاردىڭ دەڭگەيى، جاڭا جۇمىس ورىندارىن قۇرۋ.
وسىلايشا، گرانت بەرۋ تۋرالى شەشىم كوميسسيالىق جانە ۇمىتكەرلەردىڭ بيزنەس-جوبالارىنىڭ پىسىقتالۋىن باعالاۋدىڭ ناقتى كريتەرييلەرى نەگىزىندە قابىلدانادى.
كوميسسيانىڭ شەشىمى ۇمىتكەردىڭ Business.enbek.kz پورتالىنداعى جەكە كابينەتىنە جىبەرىلەدى. كوميسسيا وڭ شەشىم قابىلداعان جاعدايدا ۇمىتكەر بانكتىك دەرەكتەمەلەردى ۇسىنادى، شارتقا قول قويادى جانە ودان ءارى توقسان سايىن بولىنگەن قاراجاتتىڭ پايدالانىلۋى تۋرالى ەسەپتەردى ۇسىنادى. مۇنىڭ ءبارى حالىقتى جۇمىسپەن قامتۋ ورتالىقتارىنا بارماي-اق، ەلەكتروندىق فورماتتا جاسالادى.
گرانت الۋ ءۇشىن وتىنىشتەردى قابىلداۋ لەكتەر بويىنشا جۇزەگە اسىرىلادى. كەلەسى لەك وسى جىلدىڭ قىركۇيەك ايىندا بولادى دەپ كۇتىلۋدە. بۇل ق ر الەۋمەتتىك كودەكسىن ىسكە اسىرۋ شەڭبەرىندە وبلىستار مەن مەگاپوليستەر دەڭگەيىندە 20 ەڭبەك موبيلدىلىگى ورتالىعىن قۇرۋعا جانە 2023 جىلعى شىلدەدە قازىرگى حالىقتى جۇمىسپەن قامتۋ ورتالىقتارىن ولاردىڭ فيليالدارى رەتىندە قايتا قۇرىلۋىنا بايلانىستى بولىپ وتىر.
گرانت الۋعا وتىنىشتەردى قابىلداۋدى باستاۋ تۋرالى حابارلاندىرۋ ق ر ەڭبەك جانە حالىقتى الەۋمەتتىك قورعاۋ مينيسترلىگىنىڭ جانە حالىقتى جۇمىسپەن قامتۋ ماسەلەلەرى جونىندەگى ورگانداردىڭ رەسمي ينتەرنەت-رەسۋرسىندا وتىنىشتەردى قابىلداۋدان 10 كۇنتىزبەلىك كۇن بۇرىن جاريالاناتىنىن اتاپ ءوتۋ قاجەت. Business.enbek.kz پورتالىندا وتىنىشتەردى قابىلداۋ مەرزىمى ءار لەكتە 10 (ون) جۇمىس كۇنىن قۇرايدى.