جىل سوڭىندا قۋانىش ەسەلەنە ءتۇستى
اتالعان پاتەرلەر مۇمكىندىگى شەكتەۋلى بۇلدىرشىندەردى تاربيەلەپ وتىرعان وتباسىلار، جۇرگىزۋشى، قاراپايىم جۇمىسشىلارعا تابىستالدى، دەپ حابارلايدى Almaty-akshamy.kz.
«نۇرقازعان» كەنىشىندە جۇرگىزۋشى بولىپ ەڭبەك ەتەتىن نارتاي ينەياتوۆ قالانىڭ قاق ورتاسىنان ويىپ تۇرىپ پاتەر العانىنا ءالى دە سەنەر ەمەس. بىرنەشە جىل بويى تەمىرتاۋ قالاسىندا 4 بالاسىمەن ءۇي جالداپ، قينالىپ كەلگەن. ونىڭ ۇستىنە ۇلكەن ۇلى قانت ديابەتىمەن اۋىراتىندىقتان دارىگەرگە قارالۋ ءۇشىن قاراعاندىعا ءجيى قاتىنايدى ەكەن. ەندى ول بەينەتتەن قۇتىلدى، ەمحانا جانىندا. ءتورت بولمەلى باسپانانىڭ ءىشى جيھازبەن، تۇرمىستىق تەحنيكامەن تۇگەل جابدىقتالعان. جانۇيا جاڭا جىلدى جاڭا ۇيدە قارسى الادى.
«ارينە، بۇلاي بولادى دەپ كۇتكەن جوقپىز. تاماشا، بارلىق جاعدايىمەن. وتە ادەمى. جاقسى. كەڭ. ءتورت بولمە وتە قاتتى ۇنادى. بالالاردىڭ كوڭىلىنەن وتە قاتتى قۋانىش كوردىم. جۇگىرىپ، قۋانىپ ءجۇر»، - دەدى قاراعاندى قالاسىنىڭ تۇرعىنى نارتاي ينەياتوۆ.
بۇل كۇنى بىردەن 53 وتباسى قۋانىشقا كەنەلدى. باسپاناعا مۇقتاج، ءارى مۇمكىندىگى شەكتەۋلى بۇلدىرشىندەردى تاربيەلەپ وتىرعان جانۇيالارعا پاتەر كىلتتەرىن كومپانيا باسشىلارى سالتاناتتى جاعدايدا تابىستادى. قونىستوي يەلەرى قاراعاندى، بالقاش جانە جەزقازعان قالالارىنداعى «قازاقمىس» كومپانياسىنا قاراستى ءوندىرىس وشاقتارىندا ەڭبەك ەتەدى.