عالىمداردىڭ ەڭبەگى باعالاندى
«ۇزدىك عىلىمي قىزمەتكەر — 2021» سىيلىعىنىڭ قورىتىندىسى بەلگىلى بولدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
عىلىمي-زەرتتەۋ ينستيتۋتتارى مەن جوعارى وقۋ ورىندارىنىڭ 50 عالىمى جەڭىمپاز اتاندى. ولاردىڭ ءارقايسىسى 2 000 اەك، ياعني 5 ملن 834 مىڭ تەڭگە كولەمىندە كۋالىك پەن سىياقى الادى. ەل پرەزيدەنتى ق.ك. توقايەۆ عالىمداردى قولداۋعا ەرەكشە كوڭىل بولەدى.
مەملەكەت باسشىسىنىڭ تاپسىرماسى بويىنشا بيىل 500-گە جۋىق عالىمنىڭ عىلىمي تاعىلىمدامادان وتۋىنە ستيپەنديا تاعايىندالدى، سونىمەن قاتار پوستدوكتورانتۋرا ءۇشىن جاس عالىمدارعا 1000 گرانت ءبولىندى. پرەزيدەنت تاراپىنان عالىمداردى قولداۋدىڭ كەزەكتى شاراسى جىل سايىنعى «ۇزدىك عىلىمي قىزمەتكەر» سىيلىعىن تاعايىنداۋ بولدى. ول عىلىم مەن تەحنيكانىڭ دامۋىنا ەلەۋلى ۇلەس قوسقان عالىمداردى، عىلىمي قىزمەتكەرلەردى قولداۋعا باعىتتالعان.
«مەملەكەت باسشىسىنىڭ تاپسىرماسى بويىنشا ءبىلىم جانە عىلىم مينيسترلىگى عالىمدار مەن عىلىمي ۇيىمداردىڭ، جوعارى جانە جوعارى وقۋ ورنىنان كەيىنگى ءبىلىم بەرۋ ۇيىمدارىنىڭ قىزمەتكەرلەرىن جان-جاقتى قولداۋ ماسەلەلەرىنە نازار اۋدارادى. بيىل مينيسترلىك العاش رەت ەلىمىزدىڭ ۇزدىك عالىمدارى ءۇشىن سىياقى تاعايىندادى. كونكۋرسقا قاتىسۋعا وتىنىمدەر وسى كونكۋرس ءۇشىن ارنايى قۇرىلعان جانە اۆتوماتتى تۇردە سەگىز ولشەمشارت بويىنشا بالدارى بار اقپاراتتىق جۇيە ارقىلى قابىلداندى. عىلىمي جەتىستىكتەردى باعالاۋ كريتەرييلەرى عىلىمي جانە ساراپتامالىق قاۋىمداستىقپەن بىرگە جاسالدى. بارلىق قاتىسۋشى ءوتىنىم بەرۋ كەزەڭىندە ءوز بالىن كورە الدى. ولاردى كوميسسيا قارادى جانە ساراپتامالىق توپتار ۇسىنىلعان قۇجاتتاردىڭ بەكىتىلگەن كريتەرييلەرگە سايكەستىگىن سەكسيالاردا تەكسەردى. كوميسسيا مەن ساراپشىلار توبىنىڭ قۇرامىندا جەتەكشى عالىمدار، تاۋەلسىز ساراپشىلار، مەملەكەتتىك ورگانداردىڭ وكىلدەرى، جاس عالىمدار كەڭەسى مەن جاس عالىمدار اليانسىنىڭ مۇشەلەرى جۇمىس ىستەدى»،- دەپ اتاپ ءوتتى ق ر بعم عىلىم كوميتەتىنىڭ ءتورايىمى جاننا قۇرمانعالييەۆا.
كونكۋرسقا قاتىسۋ ءۇشىن بارلىعى 7 باعىت بويىنشا 575 ءوتىنىم كەلىپ ءتۇستى. ولاردىڭ اراسىندا جاراتىلىستانۋ عىلىمدارى، ينجينيرينگ جانە تەحنولوگيالار، مەديسينا جانە دەنساۋلىق ساقتاۋ، الەۋمەتتىك جانە گۋمانيتارلىق عىلىمدار، اۋىل شارۋاشىلىعى جانە ۆەتەريناريا عىلىمدارى، اسكەري عىلىمدار جانە ۇلتتىق قاۋىپسىزدىك عالىمدارى بولدى.
ناتيجەسىندە كوميسسيا 6 عىلىمي زەرتتەۋ ينستيتۋتتارى مەن 16 جوعارى وقۋ ورىنىنان 50 عالىمعا «ۇزدىك عىلىمي قىزمەتكەر-2021» سىيلىعىن بەرۋ تۋرالى شەشىم قابىلدادى.
ولاردىڭ اراسىندا ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەسسورى راحمەتقاجى بەرسىمباي، يادرولىق فيزيكا ينستيتۋتى فيليالىنىڭ جەتەكشىسى ماكسيم زدوروۆەس، قاراعاندى تەحنيكالىق ۋنيۆەرسيتەتىنىڭ پروفەسسورى اريستوتەل يساعۇلوۆ، ونكولوگيا جانە راديولوگيا عىلىمي زەرتتەۋ ينستيتۋتىنىڭ باسقارما ءتورايىمى ديليارا قايداروۆا، ءال-فارابي اتىنداعى قازاق ۇلتتىق ۋنيۆەرسيتەتىنىڭ پروفەسسورى PhD دوكتورى قايرات داۋلەتوۆ، قازاق ۇلتتىق اگرارلىق زەرتتەۋ ۋنيۆەرسيتەتىنىڭ پروفەسسورى قايسار تابىنوۆ جانە باسقالار بار.