جاڭا رەزەرۆتىك سۋمەن جابدىقتاۋ جۇيەسى مەدەۋ اۋدانىنداعى سۋ تاپشىلىعى ماسەلەسىن شەشتى
الماتىدا مەدەۋ اۋدانىن سۋمەن جابدىقتاۋدىڭ جاڭا رەزەرۆتىك جۇيەسى ەنگىزىلدى
الماتىدا اكىم ەربولات دوسايەۆتىڭ تاپسىرماسىمەن مەدەۋ اۋدانىنىڭ وڭتۇستىك بولىگىندە سۋ تاپشىلىعىن جويۋ ءۇشىن قىسقا مەرزىم ىشىندە سۋمەن جابدىقتاۋدىڭ جاڭا رەزەرۆتىك جۇيەسى قۇرىلدى، دەپ حابارلايدى aqshamnews.kz
جوبانى جۇزەگە اسىرۋ قالانىڭ جوعارعى جاعىندا اۋا-رايىنان زارداپ شەككەن جەر ءۇستى سۋ كوزدەرىنە تاۋەلدىلىگىن جويۋعا مۇمكىندىك بەردى.
قۇرىلىس بيىل اقپاندا باستالىپ، شىلدەدە ءبىتتى. رەزەرۆتىك سحەمانىڭ ارقاسىندا بۇگىندە مەدەۋ اۋدانىنىڭ وڭتۇستىك جانە ورتالىق بولىكتەرىنىڭ 50 مىڭ تۇرعىنى سۋمەن تۇراقتى تۇردە قامتاماسىز ەتىلگەن.
«الماتى سۋ» كمك سۋمەن جابدىقتاۋ دەپارتامەنتىنىڭ ديرەكتورى ولەگ يۋگاي ايتقانداي، جوبانىڭ ەرەكشەلىگى تالعار جەر استى سۋلارى كەن ورنىنان كاسكادتى تاسىلمەن سۋ بەرۋ جانە كەرى رەجيمدە جۇمىس ىستەۋ مۇمكىندىگى، ياعني قاجەت بولسا سۋدىڭ سولتۇستىكتەن وڭتۇستىككە جانە كەرى باعىتتا دا اعۋ باعىتىن وزگەرتۋ بولىپ تابىلادى.
«جۇمىس 8 سۋمەن جابدىقتاۋ نىسانىندا جۇرگىزىلدى. ونىمدىلىك 60%-عا ارتىپ، 14 بىرلىك سورعى جابدىعى ورناتىلدى. 6 جاڭا سۋ جيناۋ ۇڭعىماسى پايدالانۋعا بەرىلدى، كولەمى 3 مىڭ م3 تازا سۋ رەزەرۆۋارى قايتا جاڭارتىلدى. سونىمەن قاتار، تىرەك-رەتتەگىش ارماتۋرالار اۋىستىرىلدى، جاڭا سۋ قۇبىرى جەلىلەرى سالىندى جانە كابەل جەلىلەرى اۋىستىرىلدى»، – دەدى ولەگ يۋگاي.
مەدەۋ اۋدانىنىڭ جوعارعى جاعىنىڭ تۇرعىندارى سۋمەن جابدىقتاۋ بەرىلگەن ساتتەن باستاپ پروبلەما جوق ەكەنىن اتادى.
«اۋدانىمىزدا سۋمەن جابدىقتاۋدىڭ قانشالىقتى جاقسارعانىن كورىپ وتىرمىز. بۇرىن سۋدىڭ قىسىمى مەن ۇزىلۋىنە بايلانىستى ماسەلە تۋىنداعان. مەن كوپبالالى انامىن، سوندىقتان كۇندەلىكتى قاجەتتىلىك ءۇشىن تازا سۋعا تۇراقتى قول جەتكىزۋدىڭ قانشالىقتى ماڭىزدى ەكەنىن بىلەمىن. قابىلدانعان شارالار ءۇشىن العىس ايتامىز، ءبىز ءقازىر جايلى جاعدايدا ءومىر ءسۇرىپ جاتىرمىز»، – دەدى مەدەۋ اۋدانىنىڭ تۇرعىنى زارينا ماعايبەكوۆا.
ەستەرىڭىزگە سالا كەتەيىك، بۇعان دەيىن مەدەۋ اۋدانىندا «بالقاش» تازا سۋ رەزەرۆۋارى پايدالانۋعا بەرىلگەن بولاتىن، بۇل «كامەنسك ءۇستىرتى» شاعىن اۋدانىندا اۋىز سۋ تاپشىلىعى ماسەلەسىن شەشۋگە مۇمكىندىك بەردى.
جالپى، بىلتىر مەگاپوليستە 117 كم سۋ قۇبىرى سالىندى جانە 46 كم جاڭعىرتىلدى، بۇل الماتى حالقىنىڭ 99،3%-ى ورتالىق سۋمەن جابدىقتاۋعا قول جەتكىزۋدى قامتاماسىز ەتۋگە مۇمكىندىك بەردى. الاتاۋ، بوستاندىق جانە ناۋرىزباي اۋداندارىنىڭ تۇرعىندارىن سۋمەن جابدىقتاۋ ماسەلەسىن شەشۋ ءۇشىن 4 سۋ جيناعىشتىڭ قۇرىلىسى ءجۇرىپ، جوبالانىپ جاتىر. وسى جىلعا 142 كم ينجەنەرلىك كوممۋنيكاسيا سالۋ جانە 48 كم جەلىلەردى جوندەۋ جوسپارلانعان. قابىلدانعان شارالار جىل سوڭىنا دەيىن تۇرعىنداردىڭ 99،6%-ى ورتالىق سۋمەن قامتاماسىز ەتۋگە جانە جەلىلەردىڭ توزۋ دەڭگەيىن 53،8%-عا دەيىن تومەندەتۋگە مۇمكىندىك بەرەدى.
ايتا كەتەيىك، جۇمىس جۇرگىزۋ كەزەڭىندە سۋمەن جابدىقتاۋ تۇراقتى جۇزەگە اسىرىلادى، قالانىڭ نەگىزگى كوشەلەرىندە كولىك قوزعالىسى شەكتەلمەيدى.