2،1 مىڭ ادام وقىپ، سەرتيفيكات الدى.
ارنايى اشىلعان بولىمگە 2،9 مىڭنان استام ادام تىركەلگەن، دەپ حابارلايدى Almaty-akshamy.kz
"كۇمىس جاس" جوباسى اياسىندا 50 جاستان اسقان قازاقستاندىقتار ودان ءارى جۇمىسقا ورنالاسۋ ءۇشىن Skills Enbek پلاتفورماسىندا جاڭا داعدىلاردى تەگىن ۇيرەنە الادى. مۇگەدەكتىگى بار ازاماتتاردىڭ جەكە كومەكشىسى بولعىسى كەلەتىندەر جانە مۇگەدەكتىگى نەمەسە سوزىلمالى اۋرۋى بار وتباسى مۇشەسىمەن بىرگە ەرىپ جۇرەتىندەرگە ارنالعان كاسىپتىك كۋرستار بۇل ساناتتاعى ازاماتتار اراسىندا كوبىرەك سۇرانىسقا يە.
سونىمەن قاتار ەڭبەك جانە حالىقتى الەۋمەتتىك قولداۋ مينيسترلىگىنىڭ مالىمەتىنشە، جوباعا قاتىسۋشىلار برويلەر بالاپانى مەن جىلىجايلاردا ليمون ءوسىرۋ، ارا شارۋاشىلىعى جانە تاعى باسقا كۋرستاردى وقۋدى ءجون كورەدى.
"Skills Enbek پلاتفورماسىنداعى "كۇمىس جاس" قوسىمشا بەتىندە اقپاراتتىق تەحنولوگيالار، اۋىل شارۋاشىلىعى، قارجى، ءبىلىم بەرۋ، الەۋمەتتىك قىزمەت كورسەتۋ، ماركەتينگ جانە تۋريزم سياقتى باعىتتار بويىنشا 120-دان استام كۋرستار بار. پايدالانۋشىلارعا كۋرستان وتكەنى تۋرالى سەرتيفيكات بەرۋ كوزدەلگەن. ول Enbek.kz پورتالىنداعى تۇيىندەمەدە اۆتوماتتى تۇردە كورسەتىلەدى. جۇمىس بەرۋشى جۇمىسكەردى ىزدەگەن كەزدە ىزدەنۋشىنىڭ تۇيىندەمەسىنەن سەرتيفيكاتتارى مەن العان داعدىلارىن كورە الادى"، دەلىنگەن ەڭبەك جانە حالىقتى الەۋمەتتىك قورعاۋ مينيسترلىگى تاراتقان اقپاراتتا.