«كۇمىس جاس» جوباسى اياسىندا 50 جاستان اسقان قازاقستاندىقتارعا جاڭا داعدىلاردى يگەرىپ، ودان ءارى جۇمىسقا ورنالاسۋ ءۇشىن Skills Enbek پلاتفورماسىندا تەگىن وقۋعا مۇمكىندىك بەرىلدى.
پلاتفورمادا ارنايى ءبولىم ەكى اي بۇرىن ىسكە قوسىلدى، وسى ۋاقىت ىشىندە وعان 4،5 مىڭنان استام ادام تىركەلدى، ونىڭ 3،2 مىڭى وقۋدى ءساتتى اياقتاپ، سەرتيفيكات الدى، دەپ حابارلايدى Almaty-akshamy.kz.
ەڭبەك جىنە حالىقتى الەۋمەتتىك قورعاۋ مينيسترلىگىنىڭ مالىمەتىنشە، كۋرستان وتكەنى تۋرالى سەرتيفيكات الىنعان بارلىق داعدىلار كورسەتىلىپ، Enbek.kz جۇمىسقا ورنالاستىرۋ پورتالىنداعى تۇيىندەمەدە اۆتوماتتى تۇردە كورسەتىلەدى. جۇمىس بەرۋشى وزىنە قاجەتتى جۇمىس ىزدەۋشىنىڭ تۇيىندەمەسىندە قولدا بار سەرتيفيكاتتار مەن العان داعدىلارىن كورەدى.
مۇگەدەكتىگى بار ازاماتتاردىڭ جەكە كومەكشىسى بولعىسى كەلەتىندەر جانە مۇگەدەكتىگى نەمەسە سوزىلمالى اۋرۋى بار وتباسى مۇشەسىمەن بىرگە ەرىپ جۇرەتىندەرگە ارنالعان كاسىپتىك كۋرستار وسى ساناتتاعى ازاماتتار اراسىندا كوبىرەك سۇرانىسقا يە.
سونىمەن قاتار، جوباعا قاتىسۋشىلار «تاماقتانۋ» باعىتى بويىنشا «اسپاز»، «ناۋبايحانا ءىسىنىڭ نەگىزدەرى» جانە «كونديتەرلىك شەبەرحانا» كۋرستارىندا، «اۋىل شارۋاشىلىعى» سالاسىندا – «ۇيرەك، قاز ءوسىرۋ»، «قۇس شارۋاشىلىعى»، «جىلىجايلاردا ليمون ءوسىرۋ» كۋرستارىندا وقۋدى ءجون كورەدى. «قارجى جانە ەسەپ» باعىتى بويىنشا ازاماتتاردى «ساقتاندىرۋ اگەنتى»، «كاسسير» جانە «بۋحگالتەر» سياقتى كۋرستار قىزىقتىرادى.
ەستەرىڭىزگە سالا كەتەيىك، Skills Enbek پلاتفورماسىنداعى «كۇمىس جاس» قوسىمشا پاراعىندا اۋىل شارۋاشىلىعى، قارجى، ءبىلىم بەرۋ، الەۋمەتتىك قىزمەت كورسەتۋ، ماركەتينگ جانە تۋريزم، اقپاراتتىق تەحنولوگيالار، ەنەرگەتيكا سياقتى باعىتتار بويىنشا 130-دان استام كۋرس بار.