چەمپيونات اقش-تىڭ حيۋستون قالاسىندا وتەدى
ق ر وقۋ-اعارتۋ مينيسترلىگى مەن «USTEM Robotics» قوعامدىق قورىنىڭ قولداۋىمەن وتكەن «Central Asia FIRST CHAMPIONSHIP – 2023» روبوتوتەحنيكادان ورتالىق ازيا ويىندارى ءوز مارەسىنە جەتتى، دەپ حابارلايدى Almaty-akshamy.kz.
اقش-تىڭ حيۋستون قالاسىندا وتەتىن FIRST دۇنيەجۇزىلىك چەمپيوناتىندا ەل نامىسىن 50-گە جۋىق وقۋشى قورعايدى. ولار جەڭىمپاز اتانعان 4 كوماندانىڭ مۇشەلەرى. سونداي-اق تاعى 9 كوماندا اۆستراليا، ماروككو، اقش، ينديادا وتەتىن حالىقارالىق اشىق چەمپيوناتتارعا جولداما الدى.
«چەمپيونات ءۇش جاس ساناتىنا وراي ءوتتى. كىشكەنتاي بالالار ساناتى بويىنشا الماتى قالاسىنىڭ وقۋشىلارىنان قۇرىلعان Adeptus Mechanicus توبى اقش-تىڭ وتەتىن باستى جارىسقا جولداما جەڭىپ الدى. ورتاڭعى ساناتتا باستى جۇلدەنى الماتىلىق «Play 4 Energy» توبى يەلەندى. بۇل ساناتتاردا شىمەنت قالاسىنىڭ Clutch جانە قاراعاندىلىق JelToqSun توپتارى اقش-تىڭ Worcester Polytechnic Institute-دە وتەتىن اقش-تىڭ اشىق چەمپيوناتىنا جولداما الدى. ال 12-18 جاس ساناتىنداعى باستى جۇلدەگەرلەر - الماتىلىق AENTA جانە NIS Kyran توپتارى. ءۇش كۇنگە سوزىلعان سايىس تارتىستى ءوتتى. جىل سايىن روبوتوتەحنيكامەن اينالىساتىن وقۋشىلار قاتارىنىڭ ارتقانى قۋانتادى»،– دەيدى USTEM Robotics قورىنىڭ جەتەكشىسى اسىلبەك مۋرزاحمەتوۆ.
❕ايتا كەتەيىك، استانا قالاسىندا اقپان ايىنىڭ 24-26 ارالىعىندا «Central Asia FIRST CHAMPIONSHIP – 2023» روبوتوتەحنيكادان چەمپيونات وتكەن بولاتىن. وعان ەلىمىزدىڭ ءار ايماعىنان 1200 وقۋشى قاتىستى. بيىلعى جارىس ەنەرگيا تاقىرىبىنا ارنالدى.