الماتى قالاسى مادەنيەت باسقارماسىنا قاراستى حايۋاناتتار باعىندا 8-18 قاڭتار كۇندەرى ۇيىمداستىرىلعان «شىرشانى تاپسىر» ەكولوگيالىق اكسياسى مارەسىنە جەتتى.
اكسيا اياسىندا قالا تۇرعىندارى جاڭا جىلدىق تابيعي شىرشا، مايقاراعاي جانە قاراعاي اعاشتارىن حايۋاناتتار باعىنا وتكىزىپ، جانۋارلاردىڭ مەكەن ەتۋ ورتاسىن جاقسارتۋعا اتسالىستى، - دەپ حابارلايدى aqshamnews.kz.
جينالعان اعاشتار تۇياقتى جانۋارلاردىڭ كەي تۇرلەرى ءۇشىن ازىق قانا ەمەس، سونىمەن قاتار مايمىلدار، جولبارىستار، ايۋلار مەن لەوپاردتار ءۇشىن «ويىنشىق» رەتىندە قولدانىلدى. بۇدان بولەك، قىلقانجاپىراقتى اعاشتار مەن بۇتاقتار حارزالارعا، اتجالماندارعا، كىرپىلەرگە جانە جايرالارعا جۇمساق توسەنىش قىزمەتىن اتقاردى.
اكسياعا بىرنەشە گۇل ساتاتىن دۇكەندى قوسقاندا، 50-دەن استام ادام قاتىستى. تاپسىرىلعان اعاشتاردىڭ ىشىندە تامىر جۇيەسى ساقتالعان ءۇش شىرشا دا بار – ولار حايۋاناتتار باعىنىڭ اۋماعىنا وتىرعىزىلادى.
«اكسياعا بەلسەندى قاتىسقان بارلىق قالا تۇرعىنىنا جانە شارانى كەڭىنەن جاريالاعان ب ا ق وكىلدەرىنە شىنايى العىس بىلدىرەمىز. وسىلايشا ءبىز كوپ مولشەردە قىلقانجاپىراقتى اعاش پەن بۇتاق جيناي الدىق. جانۋارلار ءۇشىن بۇل قورەك قانا ەمەس، سونىمەن بىرگە مەكەن ەتۋ ورتاسىن جاقسارتۋدا ماڭىزى زور: ۆولەردەگى ءاربىر جاڭا زات – جاڭا ءيىس، جاڭا ءدام جانە زەرتتەۋگە مۇمكىندىك»، – دەدى الماتى حايۋاناتتار باعىنىڭ عىلىمي-ادىستەمەلىك ءبولىمىنىڭ باسشىسى اقجامي ەلەمانوۆا.
«شىرشانى تاپسىر» ەكولوگيالىق اكسياسى تابيعات پەن جانۋارلارعا قامقورلىق جاساۋ ءاربىر ادامعا قولجەتىمدى ءارى قاراپايىم ءىس ەكەنىن تاعى ءبىر مارتە كورسەتتى. الماتى حايۋاناتتار باعى بارلىق قاتىسۋشىعا بەلسەندى ازاماتتىق ۇستانىمى ءۇشىن العىس بىلدىرەدى جانە الداعى ۋاقىتتا دا وسىنداي باستامالاردى جالعاستىرۋدى جوسپارلاپ وتىر. سونىمەن قاتار قالا تۇرعىندارىن مەرەكە اياقتالعاننان كەيىن دە قورشاعان ورتاعا جاۋاپكەرشىلىكپەن قاراپ، ەكولوگيالىق تۇرعىدان ءتيىمدى شەشىمدەر تابۋعا شاقىرادى.