ەندى سمارتفونعا بايلانعان بۇلدىرشىندەر قازاقشا جاڭا سوزدەر جاتتاي الادى.
يمانعالي بەكتۇرسىن اتتى ۆاشينگتوندا تۇراتىن 5-سىنىپ وقۋشىسى قازاق ءتىلىن بالالارعا ۇيرەتۋدىڭ تىڭ ءتاسىلىن ويلاپ تاپتى، دەپ حابارلايدى Almaty-akshamy.kz «حابار 24» ارناسىنا سىلتەمە جاساپ.
جالپى، اقش-تا تۇراتىن قازاقتار ءۇشىن انا ءتىلىن ۇمىتپاۋ - وزەكتى ماسەلە. بالاسىنىڭ قازاقشا سويلەۋىنە اتا-انالار دا مۇددەلى بولعاندىقتان، جىل سايىن تىلدىك كۋرستارعا سۇرانىس تا ارتىپ كەلەدى. ۆاشينگتون قالاسىندا ەكى بىردەي ءتىل كۋرسى جۇمىس ىستەيدى. قازاقستان ەلشىلىگى وزگە شتاتتاردان تۇسكەن وتىنىشتەردى ەسكەرە وتىرىپ، "وتانداستار" قورىمەن بىرلەسىپ، ونلاين فورماتتا قازاق ءتىلىن ۇيرەتۋ ماسەلەسىن پىسىقتاپ جاتىر.
يمانعالي بەكتۇرسىن اقش-قا بىلتىر كۇزدە كەلگەن. 500 عالىم جوباسى بويىنشا تاعىلىمدامادان ءوتىپ جاتقان اناسى جازيرا سايىن سەنبى سايىن امەريكاداعى بالالارعا قازاقشا ۇيرەتەدى. ول قۇرداستارى مەن ءىنى-قارىنداستارىنىڭ قازاقشاعا شورقاق ەكەنىن كۇندە كورىپ ءجۇر. ءبىر جاعىنان، اناسىنا كومەكتەسكىسى كەلىپ، ەكىنشى جاعىنان، ويىن ارقىلى ءتىلدى وڭاي مەڭگەرۋگە بولاتىنىن تۇسىنەدى. ءسويتىپ، Roblox-تا قاراپايىم تاپسىرمالار جاسايدى.
"ول - ويىن پلاتفورماسى، قالاعان ادام ءوزى ويىن ىستەپ، سول پلاتفورماعا سالا الادى"، - دەيدى يمانعالي بەكتۇرسىن.
بالالار اراسىندا وتە تانىمال Roblox پلاتفورماسىنىڭ مۇمكىندىگى مول. كەز كەلگەن پايدالانۋشى ءوزىنىڭ ويىنىن قۇراستىرىپ، ۆيرتۋالدى الەمدە ءتۇرلى تاپسىرما ورىنداي الادى. مەتاكەڭىستىكتە ءوزارا كەزدەسىپ، ساۋدا جاساپ، ءۇي جانۋارلارىن اسىراپ، ءتۇرلى مامان يەسى سياقتى جۇمىسقا دا بارۋعا بولادى.
"تاۋىقتىڭ قازاقشاسى قالاي بولادى؟ مۇندا تاڭداۋ بار. باقا نەمەسە تاۋىق. باقاعا كىرسە، ويىن قايتا باستالادى. تاۋىققا كىرسە، ويىن جالعاسا بەرەدى"، - دەپ ءتۇسىندىردى 5-سىنىپ وقۋشىسى.
قازاق ءتىلى كلۋبىنا كەلىپ جۇرگەن بۇلدىرشىندەردىڭ كوبى شەت ەلدە دۇنيەگە كەلگەن. ساباق بارىسىندا وزدەرىن تانىستىرعان بالالاردىڭ ءبىرى لوندوندا، ەندى ءبىرى مالايزيادا، مونعوليادا تۋعان. ديپلومات اتا-انا بالاسىنىڭ انا ءتىلىن قۇرمەتتەيتىن ازامات بولىپ وسكەنىن قالايدى. سوندىقتان سەنبى سايىن ەشكىم ساباقتان قالمايدى.
قازاقي ورتا جوق، ارينە، ولارعا قازاق ءتىلىن ۇيرەنۋ قيىن. سوندىقتان اقش-تاعى ەلشىلىك قازاق ءتىلى كلۋبىن اشىپ، ەرىكتىلەردى تارتىپ جاتقانى جاقسى باستاما"، - دەيدى دج. ۆاشينگتون ۋنيۆەرسيتەتىندە تاعىلىمدامادان ءوتۋشى جازيرا سايىن.
جازيرا سايىن اقش-تا ساباق وقۋ ءۇشىن مەكتەپكە قۋانا باراتىن بۇلدىرشىندەر قازاقشا كلۋبقا دا ءوز ەرىكتەرىمەن، جايدارى كوڭىل-كۇيمەن كەلگەنىن قالايدى. سول ءۇشىن تاپسىرمانى ۇيىپ-توكپەي، ەركىن فورماتتا، ويىن تۇرىندە وتكىزەدى. باستى مىندەت – ءار بالانىڭ كوكەيىنە قازاق ەلىنە دەگەن سۇيىسپەنشىك قالىپتاستىرىپ، ەرتەدەن انا ءتىلىن ءسىڭىرۋ.