بۇل تۋرالى ورتالىق سايلاۋ كوميسسياسىنىڭ ءتوراعاسى نۇرلان ءابدىروۆ ايتتى.
45 اۋدان مەن وبلىستىق ماڭىزى بار قالالاردىڭ اكىمدەرى سايلانادى، دەپ حابارلايدى Almaty-akshamy.kz
«بيىل اۋداندار مەن وبلىستىق ماڭىزى بار قالالاردىڭ اكىمدەرىن سايلاۋى العاش رەت پيلوتتىق رەجيمدە وتەدى. زاڭناماعا سايكەس، پيلوتتىق وڭىرلەردىڭ تىزبەسىن جانە اۋداندار مەن وبلىستىق ماڭىزى بار قالالاردىڭ اكىمدەرىن سايلاۋدى وتكىزۋ كۇنىن بەلگىلەۋ جونىندەگى وكىلەتتىكتەر ءماسليحاتتارعا بەكىتىلگەن. سونىمەن 17 وبلىستىڭ ءماسليحاتتارى پيلوتتىق رەجيمدە سايلاۋ وتكىزۋ ءۇشىن 45 اۋدان مەن وبلىستىق ماڭىزى بار قالالاردىڭ تىزبەسىن بەكىتتى. ونىڭ ىشىندە - 3 قالا جانە 42 اۋدان. سونداي-اق سايلاۋ وتكىزۋ كۇنىن بەلگىلەپ شىقتى. ءماسليحاتتار قابىلداعان شەشىمدەر نەگىزىندە اۋداندار مەن وبلىستىق ماڭىزى بار قالالار اكىمدەرىن سايلاۋ قاراشا ايىنىڭ ءبىرىنشى جەكسەنبىسىندە، ياعني 5 قاراشادا وتەدى»، - دەدى نۇرلان ءابدىروۆ كوميسسيا وتىرىسىندا.
ءابدىروۆتىڭ ايتۋىنشا، «سايلاۋ تۋرالى» كونستيتۋسيالىق زاڭنىڭ نورمالارىنا سايكەس، اۋداندار مەن وبلىستىق ماڭىزى بار قالالاردىڭ اكىمدەرىن سايلاۋدى ءتيىستى اۋماقتىق سايلاۋ كوميسسيالارى ءماسليحاتتىڭ شەشىمىمەن بەلگىلەنگەن سايلاۋدى وتكىزەتىن كۇنگە دەيىن كەمىندە 50 كۇن بۇرىن، ياعني، 15 قىركۇيەكتەن كەشىكتىرمەي تاعايىنداۋى كەرەك.
«سايلاۋدى جاريالاۋ، دايىنداۋ مەن وتكىزۋدى ۇيىمداستىرۋ، سونداي-اق قورىتىندىلاۋ بويىنشا ايرىقشا قۇزىرەت اۋداندار مەن وبلىستىق ماڭىزى بار قالالاردىڭ اۋماقتىق سايلاۋ كوميسسيالارىنا تيەسىلى ەكەنىن تاعى دا اتاپ وتكىم كەلەدى. ورتالىق سايلاۋ كوميسسياسىنىڭ وسى ناۋقان شەڭبەرىندەگى قۇزىرەتى ادىستەمەلىك جانە نورماتيۆتىك قامتاماسىز ەتۋدە. مۇنداي وكىلەتتىكتەردى ءبولۋ «سايلاۋ تۋرالى» كونستيتۋسيالىق زاڭدا كوزدەلگەن جانە 2021 جىلدان باستاپ اۋىلدار، كەنتتەر جانە اۋىلدىق وكۋرگتەر اكىمدەرىن سايلاۋ جونىندە وتكىزىلەتىن ناۋقاندار بارىسىندا ءىس جۇزىندە اسىرىلىپ كەلەدى. بۇل تاسىلدە سايلاۋ كوميسسيالارىنىڭ تاۋەلسىزدىگى تۋرالى سايلاۋ زاڭناماسىنىڭ كونستيتۋسيالىق قاعدياتى، ولاردىڭ ءوز وكىلەتتىكتەرىن جۇزەگە اسىرۋ كەزىندە قىزمەتىنە ارالاسپاۋ تولىق كولەمدە جۇزەگە اسىرىلادى»، - دەدى ول.