5 جىلعا سوتتالدى.
شىمكەنتتە جۇرگىزۋشىسىز ءجۇرىپ كەتىپ، التى ادامدى قاعىپ كەتكەن اۆتوبۋس جۇرگىزۋشىسىنە قاتىستى سوت ۇكىمى شىقتى، - دەپ حابارلايدى اlmaty-akshamy.kz "وتىرار" سايتىنا سىلتەمە جاساپ.
ءىستىڭ ءمان-جايىن بەس اي بويى شىمكەنتتىڭ ارنايى پروكۋراتۋراسى زەرتتەدى. ايىپتالۋشى - 49 جاستاعى جۇرگىزۋشى حايرۋللا يۋلداشيەۆ.
زارداپ شەككەن تاراپ اۆتوبۋس جۇرگىزۋشىسىن قاتاڭ جازالاۋدى تالاپ ەتكەن. الايدا سوڭعى سوت وتىرىسىندا مارقۇمداردىڭ وتباسى ايىپتالۋشىنى كەشىرگەن بولاتىن. ال پروكۋرور جۇرگىزۋشىنى 8 جىلعا باس بوستاندىعىنان ايىرۋدى سۇراعان بولاتىن.
"ايىپتالۋشىنىڭ كىناسى دالەلدەندى. سوت ۇكىمىمەن ول كىنالى دەپ تانىلىپ، 5 جىلعا باس بوستاندىعىنان ايىرىلدى. سونىمەن قاتار، ايىپتالۋشى 7 جىلعا كولىك جۇرگىزۋ قۇقىعىنان ايىرىلدى"، - دەيدى سۋديا جانات ءمۇسىرالى.
ايتا كەتەيىك، حايرۋللا يۋلداشيەۆ ابايسىزدا بەس جاياۋ جۇرگىنشىنىڭ ولىمىنە اكەپ سوقتىرعان جول ەرەجەسىن بۇزدى دەپ ايىپتالىپ وتىر. بۇعان دەيىن ەكىنشى سوت پروسەسىندە كۋاگەرلەردەن جاۋاپ الىندى. شامامەن 20 كۋاگەر بار.
سوت وتىرىسىندا ەڭ الدىمەن Shymkent Bus اۆتوپاركىنىڭ باسشىسى ەرعالي يستامبەكوۆ جاۋاپ بەرگەن. ونىڭ سوزىنشە، 8 ءساۋىر كۇنى ايىپتالۋشىدا دەمالىس كۇنى بولعان جانە №21 اۆتوبۋستى مامىرجان جولداسوۆ تىزگىندەۋى كەرەك بولعان.
الايدا ولار باسشىلىققا ەسكەرتپەي كەزەكشىلىك كۇنىمەن اۋىسقان ەكەن. بۇل تۋرالى اۆتوپاركتەگىلەر جول اپاتىنان كەيىن بىلگەن. كۋاگەر حايرۋللا يۋلداشيەۆ اۆتوبۋستى ايداماس بۇرىن كولىكتى تەكسەرىپ الۋى كەرەك ەدى دەيدى. ودان بولەك، بەلگىلەنگەن جەردە تۇراققا قويىپ نەمەسە اۆتوبۋستى قول تەجەگىشىنە قويى قاجەت ەدى. سونىمەن قاتار، جۇرگىزۋشىنىڭ ارەكەتىن ءتۇسىرىپ تۇراتىن كامەراداعى جازبانى الۋ مۇمكىن بولماعان. جۇرگىزۋشىلەردىڭ ءبىرى كامەرانى باسقا جاققا بۇرىپ قويعانى انىقتالعان.
ەسكە سالايىق، 8ء-ساۋىر كۇنى شىمكەنتتە بوس اۆتوبۋس ءجۇرىپ كەتىپ، 6 ادامدى قاعىپ كەتكەن ەدى. وقيعا ورنىندا 3 ادام، اۋرۋحانادا 2 ادام قايتىس بولدى. ولاردىڭ ەڭ ۇلكەنى 43 جاستاعى جالعىزباستى 5 بالانىڭ اناسى. ەڭ كىشكەنتايى 14 جاستاعى 9-سىنىپ وقۋشىسى.
اجال قۇشقان ەرەسەكتەردىڭ ءبارى وتباسىلارىنىڭ اسىراۋشىسى بولعان. ال، قايعىلى وقيعادان امان قالعان جالعىز ادام بۇگىن اۋرۋحانادان ۇيىنە شىقتى. 18 جاستاعى بويجەتكەن دە 6 باۋىرى مەن اناسىنىڭ جالعىز اسىراۋشىسى. اناسىنىڭ ايتۋىنشا، ازىرگە جاۋاپتىلاردان ەشقانداي كومەك كەلمەگەن جانە ەم-دومعا دا ءبىرشاما قارجى كەرەكتىگىن جەتكىزدى.