سۋ تاسقىنىنان زارداپ شەككەن وتباسىلارعا ارنايى سالىنعان جانە ساتىپ الىنعان ۇيلەر مەن پاتەرلەر بەرىلدى
قازاقستان ۇكىمەتى سۋ تاسقىنىنان زارداپ شەككەن وتباسىلارعا تۇرعىن ءۇي سالۋ جانە ساتىپ الۋ، سونداي-اق ولارعا جان-جاقتى كومەك كورسەتۋ بويىنشا وڭىرلەردە جۇرگىزىلىپ جاتقان جۇمىستاردى تۇراقتى باقىلاۋدا ۇستاپ وتىر، دەپ حابارلايدى aqshamnews.kz
قيراعان باسپاناسىنىڭ ورنىنا 4769 وتباسى جاڭا ءۇي مەن پاتەرلەرگە يە بولدى. سونىمەن قاتار زارداپ شەككەن وڭىرلەردە 2568 جاڭا ءۇيدىڭ قۇرىلىسى قارقىندى تۇردە جۇرگىزىلىپ جاتىر، ونىڭ ىشىندە 470 نىسان بويىنشا جۇمىستار تولىعىمەن اياقتالىپ، تۇرعىندارعا كىلتتەر تابىستالدى. بۇل ايماقتار بويىنشا مالىمەتتەر:
- سولتۇستىك قازاقستان وبلىسىندا – 285 ءۇي
- قوستاناي وبلىسىندا – 57 ءۇي
- باتىس قازاقستان وبلىسىندا – 80 ءۇي
- اقتوبە وبلىسىندا – 43 ءۇي
- پاۆلودار وبلىسىندا – 5 ءۇي
بارلىق وبلىستا سۋ باسقان تۇرعىن ۇيلەردى تەكسەرۋ جانە باعالاۋ جۇمىستارى 100% اياقتالدى. جالپى سوماسى 49،3 ملرد تەڭگەگە 8 853 وتباسى تۇرعىن ءۇيدى جوندەۋگە جانە قالپىنا كەلتىرۋگە ءتيىستى تولەم الدى.
34 216 وتباسىعا 12،6 ملرد تەڭگەگە 100 اەك مولشەرىندە ءبىرجولعى وتەماقى تولەندى. سونداي-اق جوعالعان ءبىرىنشى قاجەتتىلىكتەگى زاتتارىن ساتىپ الۋ ءۇشىن 150 اەك-كە دەيىن قوسىمشا تولەمدەر بەرىلۋدە. بۇگىنگى تاڭدا 9،9 ملرد تەڭگەگە 21 869 وتباسى وسىنداي كومەك الدى.
زارداپ شەككەن بيزنەسكە كەلتىرىلگەن زالالدى وتەۋ جۇمىستارى جالعاسۋدا. وڭىرلىك كوميسسيالار جالپى سوماسى 7،9 ملرد تەڭگەگە شوب سۋبەكتىلەرىنىڭ 455 ءوتىنىمىن قاراپ، ماقۇلدادى.
سۋعا كەتكەن مال ءۇشىن بەرىلگەن مەملەكەتتىك كومەك كولەمى 2،8 ملرد تەڭگەدەن استى.
بۇل جۇمىستار تۇرعىنداردىڭ جاعدايىن جاقسارتۋ جانە سۋ تاسقىنىنان زارداپ شەككەن ايماقتاردى قالپىنا كەلتىرۋ ماقساتىندا جۇزەگە اسىرىلۋدا.