استانادا حالىقارالىق ۆولونتەرلەر كۇنى اياسىندا «جىل ۆولونتەرى» حالىقارالىق سىيلىعىنىڭ جەڭىمپازدارىن ماراپاتتاۋ ءراسىمى ءوتتى.
ءىس-شاراعا ق ر پارلامەنتى ءماجىلىسىنىڭ دەپۋتاتتارى ۆەرا كيم، كونستانتين اۆەرشين، مادەنيەت جانە اقپارات ۆيسە-مينيسترى دانيار قادىروۆ، توتەنشە جاعدايلار ۆيسە-مينيسترى ەرلان نۇرپەيىسوۆ، وزبەكستان رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى سايديكرام نيازحودجايەۆ، بۇۇ-نىڭ ەۋروپا جانە تمد ەلدەرى بويىنشا ەرىكتىلەر باعدارلاماسىنىڭ وڭىرلىك مەنەدجەرى ريمما سابايەۆا قاتىستى، دەپ حابارلايدى Almaty-akshamy.kz.
حالىقارالىق ۆولونتەرلەر كۇنى اياسىندا مادەنيەت جانە اقپارات ءمينيسترى ايدا بالايەۆا الەۋمەتتىك جەلىدە ۇندەۋ جاسادى.
«قازاقستاندا ۆولونتەرلىك قوزعالىس بەلسەندى دامىپ كەلەدى جانە قوعام ومىرىندە ۇلكەن ءرول اتقارادى. ۆولونتەرلەر قوزعالىسىن بەلسەندى قولدايتىن مەملەكەت باسشىسىنىڭ باستاماسىمەن 2020 جىل «ۆولونتەر جىلى» اتالىپ ءوتتى. سوڭعى 3 جىلدا قابىلدانعان شارالار ۆولونتەرلىك ۇيىمداردىڭ 3 ەسە، بەلسەندى ۆولونتەرلەردىڭ 5 ەسە وڭ ءوسۋ سەرپىنىنە ىقپال ەتتى. ەلىمىزدە 700-گە جۋىق ۆولونتەرلىك ۇيىم، 1000-نان استام باستاماشىل توپتار جانە 1000-نان استام «كۇمىس ۆولونتەر» بار. وسى كەزەڭدە 300 مىڭنان استام ءتۇرلى فورماتتاعى ءىس-شارالار وتكىزىلدى. ۆولونتەرلىك قوعامداستىق وكىلدەرىنىڭ، بيزنەس-قۇرىلىم وكىلدەرىنىڭ، جاستاردىڭ قاتىسۋىمەن ۆولونتەرلىك قىزمەت تاقىرىبى قازاقستاندىقتاردىڭ كۇندەلىكتى ومىرىنە جانە جاڭالىقتاردىڭ كۇن تارتىبىنە ەنگىزىلدى. بۇعان باق-تا جاريالانعان 200 مىڭنان استام ءتۇرلى ماتەريالدار دالەل بولا الادى»،- دەپ اتاپ ءوتتى ءوز ۇندەۋىندە مينيستر.
الەۋمەتتىك ماڭىزى بار 15 نوميناسيا بويىنشا جەڭىمپازدار انىقتالدى.
«ۇزدىك ۆولونتەرلىك ۇيىم» نوميناسياسى بويىنشا «ۆولونتەرى استانى LIDER.KZ» قب جەڭىمپاز اتاندى. 7 جىل ىشىندە ۇيىمنىڭ ۆولونتەرلەرى قۇلدىقتان 120 ادامدى قايتارىپ الىپ، 2000 ادامدى ىزدەستىردى.
«توتەنشە جاعدايلاردى جويۋعا بەلسەندى قاتىسقانى ءۇشىن» نوميناسياسى بويىنشا «زەرەك» قوعامدىق قورى (تۇركىستان وبلىسى) ۇزدىك دەپ تانىلدى. سونداي-اق، اتالعان قور «تج ۆولونتەرلىگى: جاقسىلىق جاسا» جوباسىن جۇزەگە ىسكە اسىردى.
«دەنساۋلىق ساقتاۋدى دامىتۋعا بەلسەندى قاتىسقانى ءۇشىن» نوميناسياسىن وزبەكستاننان كەلگەن جاسۇربەك كاميلوۆ جەڭىپ الدى. ول «جاقسىلىق جاسا» قايىرىمدىلىق توبىن اشىپ، وندا حالىققا، جالعىزباستى قارتتارعا، از قامتىلعان وتباسىلارعا قاجەتتى دارى-دارمەكتەردى ساتىپ الۋعا كومەكتەسۋ ءۇشىن ستۋدەنتتەردى جينادى.
«تاريحي-مادەني مۇرالاردى ساقتاۋعا جانە دامىتۋعا قوسقان ۇلەسى ءۇشىن» نوميناسياسى بويىنشا 200-دەن استام اۋقىمدى ءىس-شارالار ۇيىمداستىرعان «التىن ادام جەتىسۋ شەبەرلەر ورتالىعى» قوعامدىق بىرلەستىگى جەڭىمپاز اتاندى.
ەستەرىڭىزگە سالا كەتەيىك، «جىل ۆولونتەرى» سىيلىعى ۆولونتەرلەر قوزعالىسىن دامىتۋعا جانە قولداۋعا ەلەۋلى ۇلەس قوسقان وتاندىق جانە حالىقارالىق ۆولونتەرلەردى كوتەرمەلەۋگە جانە ىنتالاندىرۋعا باعىتتالعان.
سوڭعى ءۇش جىلدا ەلىمىزدىڭ ءار وڭىرىنەن، سونداي-اق وزبەكستان، قىرعىزستان جانە رەسەيدەن كەلگەن 185 ۆولونتەر سىيلىقتارمەن ماراپاتتالدى.