كوكونىستەردى سۇيىكتى تاعامداردىڭ سەرىگىنە اينالدىرۋ كەرەك
جاس ۇلعايعان سايىن قىزىل ەتتى جەگەندى ازايتقان دۇرىس. اسقازانداعى اۋىرلىقتى سەزە باستاعاندا ادامدار ونى تاۋىق، بالىق نەمەسە اقۋىزدىڭ باسقا ءبىر كوزدەرىمەن الماستىرا باستايدى. كەيبىر زەرتتەۋلەر ەت ونىمدەرىن شەكتەن تىس پايدالانۋدىڭ ىشەك قاتەرلى اۋرۋىنا اكەلۋى مۇمكىن ەكەنىن كورسەتەدى. دارىگەر-ديەتولوگ مارينا ماكيشا رەن-تۆ-عا بەرگەن سۇحباتىندا تاماقتانۋ راسيونىن قالاي تەڭدەستىرۋگە بولاتىنىن ايتتى، دەپ حابارلايدى Almaty-akshamy.kz.
فەرمەنتتەر بەلسەندىلىگىنىڭ تومەندەۋى
ۋاقىت وتە، ادام جاسى ۇلعايا كەلە، ەت اقۋىزىن سىڭىرەتىن اس قورىتۋ فەرمەنتتەرىنىڭ بەلسەندىلىگى تومەندەي باستايدى. تويىمدى تاماق جەپ العاننان كەيىن اسقازاندى اۋىرلىق سەزىمى باسادى. بۇل ادامنىڭ جاسىنىڭ وزگەرۋىنە بايلانىستى قالىپتى پروسەستەر. ءبىراق كوپتەگەن ادامدار 45-50 جاستان كەيىن سيىر، قوي ەتىنەن مۇلدە باس تارتادى. جىل وتكەن سايىن اس قورىتۋ توقتامايدى، سوندىقتان ديەتولوگ مۇنداي ونىمدەردى ازداعان پورسيامەن – 70-100 گرامعا دەيىنگى مولشەردە قولدانۋعا كەڭەس بەردى.
دەنساۋلىققا پايدالى بالامالار
اقۋىز – اعزانى ءتۇزۋشى ەڭ ماڭىزدى كومپونەنت. اقۋىز جەتكىلىكسىزدىگى جانە ونىڭ ءسىڭىرىلۋ قيىندىعى ماسەلەلەرى كوبىنە جاسى ۇلكەن ادامداردا كەزدەسەدى. سوندىقتان ءوز تاماقتانۋ راسيونىنىن تەڭەستىرىپ، باقىلاپ وتىرۋ وتە ماڭىزدى.
قىزىل ەتتى ادەتتە تەز سىڭىرىلەتىن جەڭىل اقۋىزبەن الماستىرادى. ونىڭ ءداستۇرلى نۇسقاسى – قۇس ەتى نەمەسە بالىق.
«ءسۇت قىشقىلدى ونىمدەر دە جارايدى – مىسالى، سۇزبە. بۇل اقۋىز بەلگىلى ءبىر ماعىنادا، فەرمەنتتەلگەن بولىپ كەلەدى. جۇمىرتقا اقۋىزى دا جەڭىل قورىتىلادى»، - دەيدى ديەتولوگ. بالامالى اس رەتىندە پروتەيندى كوكتەيلدەر كوبىرەك قولدانىسقا يە بولۋدا.
شەكتەن تىس قولدانۋ
ەتتەن شەكتەن تىس كوپ جەۋ اعزانىڭ ونى قورىتىپ ۇلگەرمەۋىنە اكەلەدى جانە بۇل اس قورىتۋ جۇيەسىنە كەرى اسەر ەتىپ، ىشەك جۇمىسىنىڭ بۇزىلۋىنا اكەلۋى مۇمكىن. قورىتىلماعان ەتتىڭ قوزعالىسى اسقازاندا ۇزاق ۋاقىت بويى جايسىزدىق سەزىمىن تۋدىرادى.
اقۋىز جەتىسپەگەن كەزدە، جاس ۇلعايا كەلە، ساركوپەنيا، بۇلشىق ەت ماسساسىنىڭ جوعالۋى بايقالادى. وسىعان بايلانىستى ومىرتقا سەنىمدى تىرەگىن جوعالتادى.
كوكونىستەر - تاماقتانۋ راسيونىنىڭ مىندەتتى ەلەمەنتى
ەتتى جەۋ ىشەكتىڭ قاتەرلى ىسىگىن تۋدىرادى دەگەن پىكىر قالىپتاسقان. شىن مانىندە ينتەرنەت پايدالانۋشىلارى عىلىمي زەرتتەۋلەردى سوڭىنا دەيىن وقىمايدى. سالدارىنان قاتە تۇسىنىك قالىپتاسادى.
«مۇنداي ءقاۋىپ ادام ەتتى كوپ جەگەندە ەمەس، كوكونىستەردى تۇتىنباعاندا پايدا بولادى. ەتتى دە، كوكونىستەردى دە پايدالاناتىن ادامدارعا ەرەكشە ءقاۋىپ جوق»، - دەپ ناقتىلادى مارينا ماكيشا.
اۋرۋدىڭ الدىن الۋ ءۇشىن ەتتەن باس تارتۋدىڭ قاجەتى جوق. قانداي كولەمدەگى ەتتىڭ سالدارسىز سىڭەتىنىن ءتۇسىنۋ، دۇرىس بالامالاردى پايدالانۋ كەرەك جانە وسىمدىك نەگىزىندەگى ونىمدەردى دە ۇمىتپاعان ءجون.