ساياحاتشى دەنيس جەلنين 2024 جىلعى 24 تامىزدا الماتىدان ۆەلوسيپەدپەن ەۆەرەستكە، ياعني ايگىلى گيمالاي تاۋىنا اتتاندى. بۇل - ونىڭ مۇنداي اۋقىمداعى العاشقى ساپارى. وعان دەيىن ول ەل اۋماعىندا پاۆلوداردان شىعىس قازاقستان ارقىلى الماتىعا، پاۆلوداردان موڭعوليا شەكاراسىنا دەيىن، سونداي سەكىلدى ءوزى ءۇشىن كىشىگىرىم ساپارلارعا شىعىپ جۇرگەن. بۇل تۋرالى Aqshamnews.kz ءتىلشىسى ساياحاتشىمەن تىلدەسىپ كوردى.
پاۆلودار تۋماسى دەنيس ءقازىر 34 جاستا. كەيىنگى 4 جىل الماتىدا تۇرادى. كەيىپكەردىڭ اسەم شاھارعا قونىس اۋدارۋى دا بەكەر ەمەس. سەبەبى ونىڭ تاۋعا دەگەن ىقىلاسى ەرەكشە. تاۋدى جاقسى كورەتىن دەنيسكە 2024 جىلى گيمالايعا ۆەلوسيپەدپەن بارۋ ويى كەلەدى. باستاپقىدا ويعا العان باعىتى وزىنە دە قورقىنىشتى بولىپ كورىنگەنمەن، "شەشىنگەن سۋدان تايىنبايتىنىن" الدىمەن وزىنە دالەلدەۋ ءۇشىن بەلدى بەكەم بۋىپ، دايىندىقتى باستاپ كەتەدى. بۇل جولدا ونىڭ تاڭداعان باعىتى - ءبىرىڭعاي تاۋ ارقىلى وتەتىن جوندار مەن جوتالار.
سۋرەتتە: ساياحاتتىڭ العاشقى كۇندەرى
"ەۆەرەستكە دەيىن ۆەلوسيپەدپەن جەتۋ يدەياسى ساياحاتشىنى قاتتى قىزىقتىرسا كەرەك. سەبەبى بۇل باعىت بويىندا الەمدەگى ەڭ بيىك تاۋلى جۇيەلەر ورنالاسقان.
"ساپارىمنىڭ بارلىعى دەرلىك تاۋلى باعىتتا ءوتتى. باستاپقىسى – تيان-شان. بۇل – الماتى مەن قىرعىزستان اۋماعى. تيان-شان تاۋلارى ايتارلىقتاي بيىك تاۋ جۇيەسىنە جاتادى. ال تيان-شاننان كەيىن تاۋلار بىرتىندەپ پاميرگە ۇلاسادى. پامير تاۋلارى مەن ايگىلى پامير جولى – بۇكىل الەمگە تانىمال باعىت. پامير تاۋلارى ودان دا بيىك. بۇل جەردە لەنين شىڭى ورنالاسقان. بۇل – بيىكتىگى جەتى مىڭ مەتردەن اساتىن شىڭ.ودان كەيىن پامير بىرتىندەپ قاراقورىم تاۋلارىنا ۇلاسادى. قاراقورىم – الەمدەگى ەكىنشى بيىك تاۋ جۇيەسى. بۇل ايماق قىتايدىڭ ءبىر بولىگى مەن پاكىستان اۋماعىندا ورنالاسقان. قاراقورىمنىڭ باسىم بولىگى پاكىستاندا.
كەيىن قاراقورىم دا بىرتىندەپ گيمالايعا وتەدى. ال گيمالاي – الەمدەگى ەڭ بيىك تاۋ جۇيەسى. مەنىڭ مارشرۋتىم وسىنىڭ بارىنەن ءوتتى"، – دەيدى دەنيس.
قىرعىزستان اۋماعىنان ءوتىپ بارا جاتقان كەز
باستاپقى جوسپارى بويىنشا، بۇل ساپارىن ول 150 كۇندە ەڭسەرۋگە بەل بۋعان. الايدا جولدا كەزدەسكەن تابيعي كەدەرگىلەر، شەكارالىق شەكتەۋلەر، اۋا رايىنىڭ قۇبىلۋى مەن بيىكتىكتىڭ اسەرى بۇل ساپاردى قيىنداتىپ، ءقازىر ساياحاتتىڭ شامامەن 420-كۇنىنە جەتكەن.
تاجىكستان اۋماعى، تەڭىز دەڭگەيىنەن 4000 كم بيىكتىكتە ورنالاسقان، بۇزىلىپ قالعان ۆەلوسيپەد دوڭگەلەگىن جوندەۋ بارىسى
ءقازىر دەنيس ەۆەرەستكە تاياۋ جەردە. دىتتەگەن جەرگە جەتۋگە بار بولعانى 60 شاقىرىمداي عانا قالىپتى.
"جوعارىلاعان سايىن اتموسفەرالىق قىسىم ارتىپ، وتتەگىنىڭ مولشەرى ازايا تۇسەدى. سايكەسىنشە، تىنىس الۋ دا قيىندايدى. ءار باسقان قادام اۋىرلاپ، تىنىس جەتىسپەي، جۇرەك سوعىسى جيىلەيدى. سوندىقتان وسى سوڭعى 60 شاقىرىمدى ەڭسەرۋ ءۇشىن كەمىندە 10–15 كۇن قاجەت بولۋى مۇمكىن"، – دەيدى دەنيس.
العان باعىت ايقىن: ەۆەرەست قايداسىڭ؟
دەنيس جەلنيننىڭ ساپارى قازاقستاننان باستالىپ، ورتالىق ازيا مەن وڭتۇستىك ازيا ارقىلى ءجۇرىپ ءوتىپ، مەجەگە جەتۋىنە ءسال قالدى. جول بويىنداعى ءار ەلدىڭ ءوز سىناعى، ءوز قيىندىعى مەن ەرەكشەلىگى بولعان.
سۋرەت: پامير تاۋى، تاجىكستان اۋماعى
"ءجۇرىپ وتكەن جولىمدى قىسقاشا ايتاتىن بولسام، مەن الماتىدان شىعىپ، بىشكەككە قاراي جول تارتتىم. ءبىراق بىشكەككە مەن باسقا جاعىنان باردىم. قىرعىزستاندى تۇگەل ءجۇرىپ ءوتتىم. كەيىن تاجىكستانعا باردىم. تاجىكستاننان قىتايعا ءوتتىم. قىتايدا كوپ بولعان جوقپىن. قىتايدان پاكىستانعا اۆتوبۋسپەن ءوتتىم، ويتكەنى بۇل اۋماقتان جاياۋ نەمەسە ۆەلوسيپەدپەن ءوتۋ مۇمكىن ەمەس. پاكىستاندا قاراقورىم تاس جولىنىڭ بويىمەن يسلاماباد قالاسىنا دەيىن تولىق ءجۇرىپ ءوتتىم.
سۋرەت: پاكىستانعا جەتكەن كەز
كەيىن دەنيس پاكىستاننان ۇشاقپەن دۋبايعا ۇشقان. دۋبايدان – دەليگە (ءۇندىستان). دەليدەن قايتادان پاكىستانعا، يسلامابادقا ۇشىپ بارعان.
سۋرەت: ءۇندىستان ۆيزاسى الدىن الا راسىمدەلمەگەن سوڭ تۋريستكە دۋباي ارقىلى ۇشاقپەن قاتىناۋعا تۋرا كەلگەن. ۆەلوسيپەد پەن باسقا جابدىقتاردى يسلامابادتا قالدىرۋعا تۋرا كەلگەن كەز
"ۆەلوسيپەدىن كۇتىپ الىپ، وسى جولى ءۇندىستانعا ءوز اياعىممەن قايتا كىردىم. شەكارانى ەكىنشى رەت كەسىپ ءوتتىم. امريتسار قالاسىنا دەيىن ۆەلوسيپەدپەن باردىم. ول جەردەن گواعا پويىزبەن اتتاندىم. گوادا ءبىر جارىم اي بولدىم. سول جەردەن كەيىن موتوسيكلمەن جولعا شىعىپ، ونى ساتىپ جىبەرىپ، قايتادان ۆەلوسيپەدكە وتىردىم"، - دەيدى ساياحاتشى.
ءبىر قىزىعى، وسى ساياحات بارىسىندا ول موتوسيكلدى ءبىرىنشى رەت جۇرگىزگەن جانە ونى ۇيرەنۋگە 3 كۇن جۇمساعان.
"وسىلايشا، نەپالعا دا جەتتىم. بۇل ەلدە 700 شاقىرىمداي جول ءجۇرىپ ءوتتىم. پوكحارادان كاتماندۋعا بارىپ، كەيىن ەۆەرەست باعىتىندا جولعا شىقتىم. ءقازىر كىشكەنتاي ءبىر ەلدى-مەكەندەمىن، بۇل جەردەن ادامدار، ادەتتە، ەۆەرەستكە دەيىن تىكۇشاقپەن جەتەدى ەكەن. ال مەن ادەتتەگىدەي ۆەلوسيپەدپەن اياڭدايمىن"، - دەيدى ماقساتىنا جەتۋگە از قالعان تۋريست.
شەكارالىق شەكتەۋلەر مەن ەرەكشە وتكەلدەر
"جولاۋشى ءوز ۇيىنەن 40 قادام اتتاپ شىققاسىن ءمۇساپىر" دەگەن ءتامسىل تەگىن ەمەس. جول ماشاقاتىن ابدەن تارتقان تۋريست ونىڭ ءمانىن ابدەن ۇققان سىڭايلى. كەي كەزدەرى اس-سۋسىز قالىپ ،ەكى كۇندە ءبىر رەت تاماقتانعان كەزدەرى دە بولىپتى. تاۋ جولدارىندا بىرنەشە كۇن جاۋىن جاۋىپ، بايلانىسقا شىعا الماي قالعان كەزدەردى دە باسىنان وتكەرگەن. ءتىپتى قولىنداعى بار اقشاسىن ۇرلاتىپ العان وقيعالار دا بولىپتى. پاكىستان شەكاراسىندا تەكسەرىستەن وتكەندە دورباسىنداعى شۇجىق پەن جۇمىرتقانى الىپ قالىپ، بوس قايتارعان وقيعالار دا وتكەن.
ساپار بارىسىندا ءار ەلدىڭ شەكاراسىنان وتكەن كەزدە اكىمشىلىك شەكتەۋلەر دە ساپارىن ءبىراز قيىنداتقان. سونىڭ ءبىرى – جۇڭگو مەن پاكىستان اراسىنداعى شەكاراسى.
"قىتايدان پاكىستانعا ءوز كولىگىڭمەن وتۋگە مۇلدە رۇقسات جوق. ءابسوليۋتتى تۇردە. ول - جابىق، كۇزەتىلەتىن اۋماق. بار بولعانى ءبىر عانا مۇمكىندىك بار - ارنايى اۆتوبۋسپەن 200 شاقىرىمداي جول ءجۇرۋ. سوندىقتان حۋندجەراب اسۋىنا مەن اۆتوبۋسپەن كوتەرىلدىم، ال كەرى قايتقاندا عانا ۆەلوسيپەدپەن ءتۇستىم"، - دەيدى ول.
سۋرەت: ساياحات بارىسىنداعى قىزىقتار
جولداعى سەنىمدى سەرىك - استىڭداعى كولىگىڭ
دەنيس جەلنين ساپارعا بارىنشا دايىندىقپەن شىققان. دەسە دە، بۇل جولدا وعان سەرىك بولعان كولىگى ءبارى ويلاعانداي سۋ جاڭا ۆەلوسيپەد ەمەس. ايتۋىنشا، بۇل ساياحاتقا وزىندە بۇرىننان بار ۆەلوسيپەدپەن شىققان. ونى OLX سايتىنان ساتىپ العانىنا توعىز جىل بولعان.
"ۇزاق ساپار الدىندا تەك تىزبەگىن اۋىستىرىپ، قوسىمشا جۇك سالعىش ورناتىپ، دوڭگەلەكتەرىن تەكسەردىم. بولدى. بۇل – كادىمگى قاراپايىم ۆەلوسيپەد. ارنايى تەحنيكا ەمەس"، – دەيدى ول.
وسى قاراپايىم كولىكپەن ول ونداعان مىڭ شاقىرىمدى ارتتا قالدىردى.
ەرىك-جىگەر مەن شىدامدىلىق پەن تاباندىلىققا ۇيرەتكەن ساپار
دەنيس جەلنين ءۇشىن بۇل ساياحات جاي عانا مارشرۋت ەمەس. بۇل - ىشكى ەركىندىككە باستايتىن، ادام مۇمكىندىگىنىڭ شەگىن سىنايتىن رۋحاني جول. ءاربىر شاقىرىم، ءاربىر ەل، ءاربىر شەكارا - ءبىر تاجىريبە، ءبىر ساباق.
سۋرەت: ماقساتقا جەتۋگە از قالدى، الدا - 60 شاقىرىم
"ساپاردىڭ ءمانى - بارعان جەرىڭدە ەمەس، جولدىڭ وزىندە. ءار كەزدەسكەن ادام، ءار كورگەن تاۋلى اسۋ - مەنىڭ ءبىر بولشەگىمە اينالدى"، – دەيدى ول.
421 كۇن، ونداعان ەل، مىڭداعان شاقىرىم، ۆەلوسيپەد، موتوسيكل، پويىز، ۇشاق - ءبارى ءبىر ماقسات ءۇشىن: ەۆەرەست ەتەگىنە جەتۋ. ءبىراق بۇل ساپاردىڭ ەڭ قۇندىسى - ەل كورۋ، جەر كورۋ عانا ەمەس، ادامنىڭ تاباندىلىعى مەن ەركىن رۋحىنىڭ كورىنىسى.
ءقازىر دەنيس جەلنين ەۆەرەستكە وتە جاقىن. الدا سوڭعى 60 شاقىرىم بار – ەڭ قيىن ءارى ەڭ ماڭىزدى كەزەڭ. ول بۇل جولدى اياعىنا دەيىن جەتكىزۋگە بەلدى بەكەم بۋعان. جىلدان اسقان بۇل ساپارىندا ونىڭ تۋعان ەلگە، تۋعان ۇيگە دەگەن ساعىنىشى دا سىنالعان. ماقساتىنا جەتكەسىن دەنيس ەلگە قاراي ۇشاقپەن قۇستاي الىپ-ۇشىپ جەتپەك.