Armani كومپانياسىنىڭ نەگىزىن قالاعان يتاليالىق مودەلەر ءارى كاسىپكەر دجوردجو ارماني 91 جاسىندا ومىردەن ءوتتى. قايعىلى حاباردى Armani Group جەتكىزدى. دجوردجو ارماني قالاي يتاليانىڭ ەڭ باي ادامدارىنىڭ بىرىنە اينالدى؟ ونىڭ ەسىمى نەگە تابىستىڭ سينونيمىنە اينالدى؟ اqshamnews.kz رەداكسياسى ارماني تۋرالى ءسىز بىلمەيتىن قىزىقتاردى جيناپ شىقتى.
برەند قىزمەتكەرلەرىنىڭ ايتۋىنشا، كاسىپكەر ءومىرىنىڭ اياعىنا دەيىن جاڭا كوللەكسيالار شىعارعان. الايدا 2 قىركۇيەكتە دەنساۋلىعىنا بايلانىستى برەندتىڭ نەگىزگى جۇمىسىن وزگە ادامدارعا تاپسىراتىنىن مالىمدەدى.
كەيىنگى 50 جىل بويى ارماني ءوزىن ءسان يندۋسترياسىنا تولىق ارنادى. ول بىرنەشە ءىرى جوبانى جاسايمىن جوسپارلاعانىمەن، ولاردى اياقتاپ ۇلگەرمەدى.
"مەنىڭ جوسپارىم – ۇنەمى ءوزىم كوتەرىپ كەلگەن جاۋاپكەرشىلىكتى بىرتىندەپ ماعان ەڭ جاقىن ادامدارعا تاپسىرۋ. ولاردىڭ اراسىندا لەو دەلل'وركو، وتباسىمنىڭ مۇشەلەرى مەن جۇمىس توبى بار"، – دەپ ايتقان ەدى ديزاينەر سۇحباتتارىنىڭ بىرىندە.
سىمبات پەن كۋلتكە اينالعان ەسىم
كوبى دجوردجو ءارمانيدى تالعامپازدىقپەن، قاراپايىمدىقپەن جانە ءمىنسىز ستيلمەن بايلانىستىرىلادى. ءقازىر ونى ءسان يكوناسى، سيلۋەت شەبەرى جانە ارحيتەكتۋرا ۇستاسى دەپ اتايدى. ءبىراق كوپشىلىك ونىڭ تابىس جولى ءسان ساحناسىنان باستالماعانىن بىلە بەرمەيدى. 1960 جىلداردىڭ باسىندا ارماني ميلانداعى La Rinascente امبەباپ دۇكەنىندە قاراپايىم كومەكشى بولىپ جۇمىس ىستەدى. ونىڭ ارنايى ءبىلىمى دە، ىقپالدى تانىستارى دا بولماعان.
جاستايىنان دجوردجو جالعىز ءجۇرۋدى ۇناتاتىن، كوپشىلىك الدىنا شىققاندى ۇناتپايتىن. بۇل مىنەزى باستاپقىدا كەدەرگى سياقتى كورىنگەنىمەن، كەيىننەن ونىڭ باستى ارتىقشىلىعىنا اينالدى. ول الەمگە ءسان شۋسىز-اق ماڭگىلىك بولا الاتىنىن دالەلدەدى.
مەديسينادان سانگە: العاشقى قادامدار
جاستىق شاعىندا ارماني دارىگەر بولۋدى ارماندادى. اسكەردە جۇرگەندە ونى ۆەروناداعى گوسپيتالعا جىبەرگەن، بۇل وعان مەديسينالىق فاكۋلتەتكە تۇسۋگە تۇرتكى بولدى. ءبىراق ءۇش جىل وقىعان سوڭ بۇل ماماندىقتىڭ وزىنە ساي ەمەسىن ءتۇسىنىپ، ۋنيۆەرسيتەتتەن كەتتى.
بۇدان كەيىن دجوردجو La Rinascente دۇكەنىندە جۇمىس ىستەي باستادى. تابيعي تالعامى مەن اسەمدىككە دەگەن سەزىمى ونىڭ مانسابىن ءوسىردى: ول كومەكشىدەن ۆيزۋال مەرچەندايزەرگە، كەيىننەن ستيليست-كونسۋلتانتقا دەيىن كوتەرىلدى.
جەتكەن تاجىريبەسىنە سۇيەنىپ، باتىل شەشىم قابىلداپ، كيىم ديزاينىن جاساپ كورۋگە بەل بۋدى. وسىلايشا ءارمانيدىڭ ءسان الەمىندەگى جولى باستالدى. ول ميلاندىق اتاقتى مودەلەر نينو چەررۋتيدىڭ قول استىنا جۇمىسقا تۇرىپ، ديزاين شەبەرلىگىن شىڭدادى. قاراپايىمدىلىعىنا قاراماستان، ارماني تاباندىلىق تانىتىپ، ىسىنە ادالدىعىن كورسەتتى.
Giorgio Armani برەندى: ءوز ءىسىن باستاۋ
ءارمانيدىڭ مانسابىنداعى بەتبۇرىس ءسات ونىڭ ىسكەر سەرىكتەسى سەردجو گالەوتتيمەن بىرگە ءوز برەندىن قۇرۋ تۋرالى شەشىم قابىلداعان كەزدە باستالدى. باستاپقىدا جيناعان جانە ساتقان كولىگىنەن تۇسكەن اقشاسىن قولدانعان. ءسويتىپ، 1975 جىلى Giorgio Armani برەندى العاشقى كوللەكسياسىن شىعاردى.
بۇل توپتاما بىردەن كوزگە ءتۇستى. سىزىقتار، مونوحروم تۇستەر پاليتراسى مەن ۇستامدى سىمباتتىلىق ونىڭ ايرىقشا بەلگىسىنە اينالدى. كلاسسيكاعا جاڭا كوزقاراس ديزاينەرگە تەز ارادا تانىمالدىق اكەلدى. ارحيتەكتۋرالىق سيلۋەتتەر مەن مينيماليزم ارقاسىندا ارماني ءوز برەندىنە ءتان قايتالانباس ستيل قالىپتاستىردى.
ارماني جانە گولليۆۋد: ءسان كينو ونەرىندە
برەندتىڭ دامۋىنا گولليۆۋدپەن ارىپتەستىك ۇلكەن ءرول اتقاردى. ارماني كوستيۋمدەردى تەك تىگىپ قويعان جوق، ولاردى كەيىپكەرلەردىڭ مىنەزىن اشاتىن ەلەمەنتكە اينالدىردى. ونىڭ العاشقى جوبالارىنىڭ ءبىرى – «امەريكالىق جيگولو» فيلمىندەگى ريچارد گيردىڭ وبرازى. 1980 جىلعى اتاقتى كورىنىستە باستى كەيىپكەردىڭ Armani پيدجاكتارىن تاڭداپ جاتقان ءساتى جاڭا ەرلەر ءسانىنىڭ بەلگىسىنە اينالدى.
كەيىن ديزاينەر «مايامي پوليسەيى» سەريالىنا جۇمىس ىستەپ، «جاعالاۋداعى تىڭشىلار»، «ۆولك س ۋولل-ستريت» سياقتى 200-دەن اسا فيلمگە كوستيۋمدەر تىكتى. بۇل ارقىلى ارماني گولليۆۋدتاعى ەڭ ىقپالدى ءسان رەجيسسەرلەرىنىڭ بىرىنە اينالدى.
قىزىل كىلەم جانە ارماني
كينويندۋستريامەن بايلانىس ارمانيگە الەمدىك جۇلدىزدارمەن تىعىز جۇمىس ىستەۋىنە جول اشتى. ونىڭ تۋىندىلارى قىزىل كىلەم سانىنە اينالدى. دجۋليا روبەرتس، دايان كيتون، ميشەل پفايففەر، كەيت بلانشەتت، سوفي لورەن، سيندي كروۋفورد، بەيونسە، لەدي گاگا، كيفەر سازەرلەند، دجودي فوستەر، ريچارد گير سياقتى جۇلدىزدار ءارمانيدىڭ كيىمدەرىن تاڭدادى. ءمىنسىز ءپىشىن مەن ۇستامدى، ءبىراق اسەرلى ستيل ونىڭ كيىمىن حالىقارالىق دەڭگەيدەگى سيمۆولعا اينالدىردى.
Giorgio Armani يمپەرياسى: ساننەن دە اۋقىمدى
ءقازىر Giorgio Armani برەندى ساننەن بولەك جيھاز، پارفيۋمەريا، مەيرامحانا جانە ءقوناقۇي بيزنەسىن قامتيتىن تۇتاس الەمگە اينالدى. ارحيتەكتۋرا، كوسمەتيكا، زەرگەرلىك بۇيىمدار مەن اكسەسسۋارلار دا يمپەرياسىنىڭ بولىگىنە اينالدى.
ءقازىر ونىڭ ەكسكليۋزيۆ بولشەك ساۋدا جەلىسى 37 ەلدى قامتىدى:
-
Giorgio Armani – 59 بۋتيك؛
-
Armani Collezioni – 11 دۇكەن؛
-
Emporio Armani – 122 دۇكەن؛
-
A/X Armani Exchange – 71 دۇكەن؛
-
AJ | Armani Jeans – 13 دۇكەن؛
-
Armani Junior – 6 دۇكەن؛
-
Giorgio Armani Accessori – 1 دۇكەن؛
-
Armani Casa – 17 دۇكەن.
بارلىعى – 386 دۇكەن.
دەنساۋلىعى
2025 جىل ارماني ءۇشىن وزگەرىستەرگە تولى بولدى. ول مانسابىندا العاش رەت دەنساۋلىعىنا بايلانىستى ءسان كورسەتىلىمدەرىنە قاتىسا المادى. ماۋسىمدا ديزاينەر ميلاندا اۋرۋحاناعا ءتۇستى.
ءبىر ايدان سوڭ پاريجدەگى كورسەتىلىم الدىندا دجوردجو برونحيتكە شالدىعىپ، دارىگەرلەر وعان ساپاردان باس تارتۋدى ۇسىندى. وسىلايشا ول 20 جىلدا العاش رەت پاريج شوۋىن جىبەرىپ الدى.
2021 جىلى 86 جاسىندا ارماني اۋىر جاراقات الىپ، كينوتەاتر ساتىسىنان قۇلاپ، سول جاق يىق سۇيەگىن سىندىرىپ الدى. ول اۋرۋحانادا ەكى اپتا جاتىپ، قولىنا 17 تىگىس سالدىردى.
ايتا كەتەيىك، كەشە اتى اڭىزعا اينالعان يتاليالىق ديزاينەر دجوردجيو ارماني 91 جاسىندا دۇنيەدەن وتكەنى بەلگىلى بولدى.
"برەندتىڭ نەگىزىن قالاۋشى ءارى شابىت بەرۋشىمىز دجوردجيو ءارمانيدىڭ ومىردەن وزعانىن اۋىر قايعىمەن حابارلايمىز. ول سوڭعى كۇنىنە دەيىن تىنىمسىز ەڭبەك ەتىپ، كومپانياسىنا، توپتامالارىنا جانە ءتۇرلى جوبالارىنا بار ءجان-تانىن ارنادى"، – دەپ مالىمدەدى Armani Group ۇجىمى.