4-ورىن: IX قىسقى ازيا ويىندارىندا قازاقستان 20 مەدال جەڭىپ الدى

اۆتور aqshamnews.kz
07:17، 15 اقپان 2025

Cۋرەت: سالي سابيروۆ، نۇرعالي جۇماعازى، تۇرار قازانعاپوۆ. قازاقستان ۇوك باسپا ءسوز قىزمەتى

IX قىسقى ازيا ويىندارى قىتايدىڭ حاربين قالاسىندا اياقتالىپ، جابىلۋ ءراسىمى Harbin International Convention and Exhibition Centre Stadium ستاديونىندا ءوتتى.

قازاقستان قۇراماسى جالپى مەدالدىق ەسەپتە ءتورتىنشى ورىنعا يە بولدى، بارلىعى 20 مەدال جەڭىپ الدى: ءتورت التىن، توعىز كۇمىس جانە جەتى قولا، دەپ حابارلايدى aqshamnews.kz.

مەدالدار سانى بويىنشا ۇزدىك ۇشتىك:

1. جۇڭگو — 85 مەدال (32 التىن، 27 كۇمىس، 26 قولا)

2. وڭتۇستىك كورەيا — 45 مەدال (16 التىن، 15 كۇمىس، 14 قولا)

3. جاپونيا — 37 مەدال (10 التىن، 12 كۇمىس، 15 قولا)

قازاقستان قۇراماسى 137 سپورتشىدان قۇرالدى، ولار 11 سپورت ءتۇرى بويىنشا 34 ەلدەن كەلگەن 1200-دەن استام سپورتشىمەن جارىستى.

چەمپيون اتانعانداردىڭ قاتارىندا بياتلونشى ۆلاديسلاۆ كيرەيەۆ، سونداي-اق ەرلەر اراسىنداعى حوككەي، شورت-ترەك جانە فريستايل-اكروباتيكا كوماندالارى بار.

ايتا كەتەيىك، فريستايلشىلار ازيا ويىندارىنىڭ تاريحىندا تۇڭعىش رەت جەڭىس تۇعىرىنىڭ ەڭ بيىك ساتىسىنا كوتەرىلدى. التىن جۇلدە ءۇشىن تارتىستا ولار قىتايدىڭ الەمدىك دەڭگەيدەگى سپورتشىلارىن باسىپ وزدى.

شورت-ترەكشىلەر دە تاريحي جەتىستىككە قول جەتكىزدى. بۇعان دەيىن قازاقستان بۇل سپورت تۇرىنەن ەشقاشان ازيا ويىندارىنىڭ التىنىن الماعان. ال ەرلەر حوككەي قۇراماسى بۇل جارىستا بەسىنشى رەت چەمپيون اتانىپ وتىر.

حاربيندە كۇمىس جۇلدەنى ەۆگەنيي كوشكين (كونكيمەن جۇگىرۋ سپورتى)، شورت-ترەكتەن ايەلدەر جانە ارالاس كوماندالار، حوككەيدەن قازاقستان ايەلدەر قۇراماسى، شاڭعىشى كونستانتين بورسوۆ، شاڭعى جارىسىنان ايەلدەر قۇراماسى، بياتلونشى ۆاديم كۋرالەس، بياتلوننان ەرلەر قۇراماسى جانە ارالاس كوماندالار اراسىنداعى فريستايلشىلار يەلەندى.

قازاقستان قۇراماسى ازيا ويىندارىن جەتى قولا جۇلدەمەن اياقتادى. ولاردىڭ يەگەرلەرى: شاڭعىشى ولجاس كليمين، كونكيمەن جۇگىرۋ سپورتىنان كوماندالىق سپرينتتە، مانەرلەپ سىرعاناۋشى ميحايل شايدوروۆ، شاڭعى جارىسى بويىنشا ەرلەر قۇراماسى، فريستايل-اكروباتيكادان ايانا جولداس، سينحروندى سەكىرۋدەن ايەلدەر كومانداسى جانە بياتلون ەستافەتاسىنداعى ايەلدەر قۇراماسى.